Usa ka “Tapok sa Saksi” Diha sa Yuta sa “Bukid sa Diyos”

DIHA sa mapa sa kontinente, kon imong subayon ang baybayon sa Kasadpang Aprika ug mopaingon sa silangan ubay sa Gulpo sa Guinea, diha sa dapit diin ang baybayon moliko pahabagatan, imong makita ang Cameroon. Kon padayon nimong subayon ang baybayon pahabagatan, moabot ka sa halapad nga hawan sa itom ug balas nga mga baybayon. Ang itom nga balas maoy resulta sa mga kalihokan sa bolkan sa Bukid sa Cameroon.

Kining pormag-kono, 4,070-metros nga taluktok sa bukid mao gayoy nangibabaw sa maong dapit. Sa dihang liminan sa kahayag sa nagsalop nga adlaw ang mga bakilid sa Bukid sa Cameroon, mohatag kinig talagsaong pasundayag sa hayag nga mga bulok​—morado, orens, bulaw, ug lutong pagkapula. Ang dagat ug kalamakan sa duol nagpabanaag niining tanang bulok samag salamin, nga halos dili mailhan ang langit gikan sa yuta. Dali nga masabtan kon nganong ang mga tribong nagsimbag mga mananap sa rehiyon nagngalan sa bukid nga Mongo Ma Loba, nga gihubad nga “Karwahe sa mga diyos,” o sa mas kasagaran, “Bukid sa Diyos.”

Sa unahan pa sa habagatan, milyamilya ang mga baybayon nga puti ug balas, nga nalinyahan ug mga punoan sa lubi. Gawas pa sa banikanhong baybayon, ang dakong bahin sa nasod natabonan sa bagang kalasangan sa ekwetor, nga nanganawkanaw hangtod sa utlanan sa Congo ug Sentral nga Republika sa Aprika ug sa amihanan sa Nigeria ug sa duol-Sahara nga Chad. Ang kasadpang bahin sa nasod maoy bukiron, nga magpahinumdom sa mga biyahedor sa mga bahin sa Uropa. Ang init nga klima, hinunoa, magpahinumdom kanimo nga ikaw duol sa ekwetor. Ang panagkadaiya sa dagway sa yuta niini miagak sa daghang giya sa turista sa paghubit sa Cameroon ingong gamayng Aprika. Kini nga impresyon gipalig-on sa nagkalainlaing etnikong mga grupo ug sa kapin sa 220 ka rehistradong mga pinulongan ug mga diyalekto.

Kon mobisita ka sa Cameroon, ikaw tingali mopuyo sa usa sa dagkong mga hotel sa dunggoanan sa Douala, o sa kaulohang siyudad, ang Yaoundé. Apan masayloan nimo ang kahigayonan nga makakat-on labot sa mga kinabuhi sa mga tawo, ilabina sa kapin sa 24,000 ka mga Saksi ni Jehova, nga puliki sa pagtukod ug usa ka “tapok sa saksi” sa tibuok niining yuta sa “Bukid sa Diyos.”a Nganong dili mobiyahe sa tibuok nasod aron mahibalag ang pipila kanila? Ang imong pagsuhid niining yutaa sa Kasadpang Aprika tugob gayod nga pagagantihan.

Pinaagi sa Bangka, Bush Taxi, o Bisikleta?

Sa dihang ang Sanaga, ang kinatas-ang suba sa Cameroon, makaabot sa dagat, nagporma kinig usa ka dakong sabang. Aron maabot ang tanang molupyo niining halapad nga rehiyon, ang mga Saksi ni Jehova sagad nagabiyahe pinaagig mga bangka. Mao kini ang gibuhat sa siyam ka magmamantala sa Gingharian sa gamayng grupo sa Mbiako. Duha kanila nagpuyo sa 25 kilometros ang gilay-on, sa balangay sa Yoyo. Aron sila makaabot sa Mbiako gikinahanglan ang kusog nga pamugsay, bisan pa niana sila nagatambong kanunay sa Kristohanong mga tigom. Samtang nagduaw niining grupoha, usa ka nagapanaw nga magtatan-aw misugyot sa pagpasalida sa video nga Jehovah’s Witnesses​—The Organization Behind the Name. Apan kana sayong isulti kay sa buhaton. Sa maong hilit nga balangay, asa siya mangitag videocassette rekorder, telebisyon, ug koryente sa pagpaandar niini?

Sa semana sa pagduaw, ang pipila ka magmamantala miduaw sa usa ka pastor sa lokal nga simbahan. Sa ilang katingala ang pastor mainitong miabiabi kanila, ug sila may bibong panaghisgot sa Bibliya uban kaniya. Nakamatikod nga ang pastor wala lamang manag-iya ug VCR apan usab may generitor sa koryente, ang mga igsoon nagbatog kaisog sa paghangyo kon sila makahulam ba sa iyang mga himan. Kay nalipay sa dili pa dugay nga panaghisgot sa Bibliya, ang pastor misugot nga motabang. Sabado sa gabii 102 ka tawo ang miabot sa pagtan-aw sa salida, apil ang pastor ug ang kadaghanang membro sa iyang simbahan. Ang duha ka Saksi gikan sa Yoyo nagdalag daghang interesado sa duha ka bangka. Wala na nila isipa ang lisod nga pagbugsay nga pasungsong sa sulog sa nagtaob nga dagat. Human makita ang video, sila natandog ug nadasig pag-ayo, ug sila magarbohon nga nahisakop sa ingon niana ka dakong organisasyon kansang tumong mao ang pagpasidungog kang Jehova.

Aron makaabot sa dapit nga dili maabot sa mga bangka, ang usa mahimong mosakay sa bush taxi. Ang mga parkinganan diin kining mga taksiha naghulat ug mga pasahero okupado kaayo. Nalibotan sa mga namaligyag bugnaw nga tubig, mga namaligyag saging, ug mga kargador sa bus, maglibog ka gayod. Ang trabaho sa mga kargador sa bus mao ang pagpasakay sa mga pasahero ngadto sa naghulat nga mga bush taxi, diin ang tanan, matod nila, “hapit na nga molarga.” Ugaling, ang “hapit na” dili angayng isipon nga mao gayod kana ang ipasabot sa pulong. Ang mga sumasakay mogugol pa ug daghang oras, usahay mga adlaw, sa paghulat. Sa dihang ang tanang pasahero naghuot na sa sulod ug napahimutang na sa drayber ang mga bagahe, mga sakosako sa abot, ug usahay mga buhing manok ug mga kanding, sa taplod, ang bush taxi mobiyahe na diha sa libaongon, abogon nga mga kalsada.

Usa ka nagapanaw nga magtatan-aw, gikapoy niining matanga sa pagbiyahe, mihukom nga magkinaugalingon. Siya karon nagbiyahe na pinaagig bisikleta. Siya miingon: “Sukad nga mihukom ako sa pagbisikleta sa pagbiyahe gikan sa usa ka kongregasyon ngadto sa lain, kanunay na akong moabot sa untop nga panahon sa pagduaw. Tinuod, ang biyahe mogugol ug daghang oras, apan labing menos dili na ako mogugol ug usa ka adlaw o duha sa paghulat sa mga bush taxi. Sa panahon sa ting-ulan, ang pipila ka kalsada halos bug-os nga mawagtang tungod sa pagbaha. Kinahanglang magtiniil ka sa pagtabok niining mga dalana sa lapok ug tubig. Usa ka adlaw ang usa sa akong sapatos nahulog sa sapa ug wala na makita hangtod sa daghang semana sa ulahi, sa dihang ang anak nga babaye sa usa sa mga Saksi sulagmang nakakita niini samtang nangisda! Nalipay ako nga masul-ob pag-usab kining paris sa sapatos, human nga ang usa niini migugol ug pipila ka panahon uban sa mga isda. Usahay ako makaagig mga dapit nga wala pa gayod masangyawi sa mga Saksi ni Jehova sa miagi. Ang mga taga-balangay kanunay mangutana kanako kon unsay akong dala. Busa nagdala ako kanunay ug mga magasin ug mga brosyur. Matag hunong nako, itanyag ko kining pinasukad-sa-Bibliya nga mga publikasyon ug mohatag ug mubong pamatuod. Nagtuo ako nga si Jehova magpatubo niining mga binhi sa kamatuoran.”

Kinapusoran sa Interyor

Ang mga Saksi ni Jehova naningkamot nga ipaambit ang maayong balita sa Gingharian sa uban bisan sa kinapusorang bahin sa Cameroon, sa mga balangay nga natago sa kinatung-an sa lasang. Nagkinahanglan kini ug kahago, apan ang mga resulta makalilipay.

Si Marie, usa ka bug-os-panahong ministro, nagsugod sa pagtuon sa Bibliya uban sa usa ka dalagita nga ginganlag Arlette. Human sa unang pagtuon, gipangutana ni Marie si Arlette kon ihatod ba niya siya sa pultahan, sanglit kini maoy kostumbre niining bahina sa Aprika. Apan, ang dalagita nag-ingon nga siya halos dili makalakaw tungod sa kasakit sa iyang tiil. Ang mga tiil ni Arlette naimpeksiyon sa usa ka matang sa pulgas diin ang baye mokutkot ngadto sa unod, nga magpahinabog mga hubag. Sa walay kokahadlok gikuha ni Marie ang mga pulgas nga tinagsatagsa. Sa ulahi, nahibaloan usab niya nga magabii kini nga dalagita gisamok sa mga demonyo. Gipatin-aw ni Marie nga mapailobon kon unsaon pagsalig kang Jehova, ilabina ang pagsangpit sa makusog sa iyang ngalan diha sa pag-ampo.​—Proverbio 18:10.

Si Arlette nakahimog kusog nga pag-uswag. Sa sinugdan walay nakitang sayop ang iyang pamilya sa pagtuon tungod sa talagsaong pag-uswag nga nahimo niya sa pisikal ug sa hunahuna. Apan sa dihang nahibaloan nila nga buot niyang mahimong usa sa mga Saksi ni Jehova, gidid-an nila siya sa pagpadayon sa pagtuon. Tulo ka semana sa ulahi ang inahan ni Arlette, kay nakaamgo nga dako gayod ang kasubo sa iyang anak nga babaye, mikontak kang Marie ug naghangyo kaniya nga ipadayon ang pagtuon.

Sa dihang miabot ang panahon sa pagtambong sa sirkitong asembliya, gibayran ni Marie ang usa ka drayber sa paghatod kang Arlette sa duha ka adlaw. Apan, midumili ang drayber sa pag-adto sa balay ni Arlette, kay nakakita nga ang dalan paingon sa ilang balay dili maagian. Busa mihukom si Marie sa pagdala sa dalagita sa kalsada. Gipanalanginan gayod ni Jehova kini nga mga paningkamot. Karon si Arlette nagatambong na sa tanang tigom sa kongregasyon. Aron tabangan siya sa paghimo niini, si Marie sa walay kakapoy nagahapit kaniya. Silang duha mobaktas ug 75 minutos sa matag lakat. Sanglit ang tigom sa Dominggo magsugod sa 8:30 s.b., si Marie kinahanglang mobiya sa balay sa alas 6:30; bisan pa niana sila moabot sa untop nga panahon. Naglaom si Arlette nga sa dili madugay pasimbolohan niya ang iyang pagpahinungod pinaagig bawtismo sa tubig. Si Marie nag-ingon: “Si bisan kinsa nga wala makakita kaniya sa nagsugod siyag pagtuon dili makapalandong kon unsa ka dako ang nahimo niyang kausaban. Gipasalamatan ko gayod ug dako si Jehova sa paagi sa iyang pagpanalangin kaniya.” Si Marie tinong usa gayod ka maayong panig-ingnan sa nagasakripisyo-sa-kaugalingong gugma.

Sa Halayong Amihanan

Ang amihanang Cameroon maoy puno sa mga kalainan ug mga sorpresa. Sa panahon sa ting-ulan, kini mabag-o ngadto sa dako, lunhaw nga tanaman. Apan sa dihang mohulip ang naglagiting nga kainit sa adlaw, ang mga sagbot mangamatay. Sa ting-udto, sa dihang ang adlaw anaa sa udtong tutok ug lisod makita ang landong, ang mga karnero magdutdotay diha sa pulag-lapok nga mga bungbong sa mga balay. Taliwala sa balas ug patayng sagbot, ang nahibiling lunhaw lamang mao ang pipila ka dahon sa mga kahoyng baobab. Bisag kini dili ingon ka dako sa mga kahoy nga sama niinig matang didto sa lasang sa ekwetor, kini sama ka manggibuhion. Ang katakos niini sa paglahutay sa dili maayong palibot nag-ilustrar ug maayo sa kasibot ug kadasig sa pipila ka mga Saksi nga dinhi nagpuyo niining rehiyona aron ipasidlak ang kahayag sa kamatuoran.

Ang ubang mga kongregasyon niining dapita nahimulag gikan sa 500 ngadto sa 800 kilometros, ug ang pagbati nga nahilain tinuod kaayo. Apan adunay dakong interes. Ang mga Saksi gikan sa ubang mga lugar namalhin dinhi aron motabang. Aron mahimong epektibo sa ministeryo, kinahanglang magtuon sila ug Foufouldé, usa ka lokal nga pinulongan.

Usa ka Saksi gikan sa Garoua mihukom nga mogugol ug pipila ka adlaw sa pagsangyaw sa iyang lumad nga balangay, mga 160 kilometros ang gilay-on. Nakakaplag siyag pipila ka interes, apan ang kamahal sa plete nagpugong kaniya sa pagbalik didto nga regular. Pipila ka semana sa ulahi, ang Saksi nakadawat ug sulat gikan sa usa sa interesadong mga tawo nga nagpakiluoy kaniya sa pag-adto ug sa pagduaw pag-usab. Kay wala pay kuwarta nga ikaplete, wala siya makaadto. Hunahunaa ang kakurat sa Saksi sa dihang ang tawo mitungha sa iyang balay sa Garoua nga nagpahibalo kaniya nga napulo ka tawo sa balangay ang nagpaabot sa iyang pagduaw!

Sa laing balangay, duol sa utlanan sa Chad, usa ka grupo sa 50 ka interesadong mga tawo ang nag-organisar ug ilang kaugalingong pagtuon sa Bibliya. Naghikay sila nga ang tulo kanila motambong sa mga tigom sa kinaduolang kongregasyon sa Chad. Sa pagbalik, sila ang modumala sa pagtuon sa Bibliya uban sa tibuok grupo. Sa pagkatinuod, ikapadapat ug maayo ang mga pulong ni Jesus dinhi: “Dako ang anihon, apan diyutay ang mga mamumuo. Busa, pangamuyo kamo sa Agalon sa pag-ani nga magpadalag mga mamumuo ngadto sa iyang pag-ani.”​—Mateo 9:37, 38.

Pagsangyaw Diha sa mga Siyudad

Human sa daghang tuig nga kulang ang literatura, mga duha ka tuig nga miagi, ang mga magasing Bantayanang Torre ug Pagmata! sa lokal nga pinulongan dagayang mabatonan sa Cameroon. Dako ang kaikag ug interes alang niining mga magasina sanglit daghang tawo ang nagbasa niini sa unang higayon. Ang usa ka batan-ong magtiayon nga espesyal payunir nga gitudlo sa usa sa mga siyudad nakapahimutang ug 86 ka magasin sa ilang unang buntag sa pagsangyaw sa ilang bag-ong teritoryo. Ang ubang mga magmamantala nakapahimutang ug hangtod sa 250 ka magasin sa usa ka bulan! Unsay sekreto sa ilang kalamposan? Itanyag ang mga magasin ngadto sa tanan.

Usa ka Saksi nga nagtrabaho sa opisina nga bukas alang sa publiko kanunay nga magdispley ug magasin. Usa ka babaye ang mitan-aw sa magasin apan walay gikuha. Nasabtan sa Saksi ang iyang interes ug nagtanyag kaniya ug usa ka kopya, nga iyang gidawat. Siya nakurat nga mibalik siya pagkasunod adlaw. Dili lamang buot niya nga moamot alang sa magasin nga iyang gikuha kondili usab naghangyo pa ug dugang. Ngano? Kay usa ka biktima sa paglugos, gipili niya ang magasin nianang ulohana. Gigugol niya ang tibuok gabii sa pagbasa ug pagbasa pag-usab sa tambag nga gihatag. Kay nahupayan ug dako sa iyang gibati, buot niya nga mahibalo pag dugang bahin sa mga Saksi ni Jehova.

Bisan ang gagmayng bata makaambit sa pagpakaylap sa mensahe sa paglaom sa Bibliya. Sa dihang ang sayis anyos nga batang babayeng Saksi gihangyo sa iyang magtutudlo sa pag-awit ug usa ka awit sa Katoliko, siya mibalibad, nga miingon nga siya usa sa mga Saksi ni Jehova. Unya gihangyo siya sa magtutudlo sa pag-awit ug usa sa mga awit sa iyang kaugalingong relihiyon aron siya magradohan niana. Iyang gipili ang awit nga nag-ulohang “Ang Gisaad sa Diyos nga Paraiso” ug giawit kana nga sinag-ulo. Ang magtutudlo nangutana kaniya, nga nag-ingon: “Naghisgot ka ug paraiso sa imong awit. Hain ba kining paraiso?” Gipatin-aw sa batang babaye ang katuyoan sa Diyos nga magtukod ug Paraiso sa yuta sa dili madugay. Nahibulong sa iyang tubag, iyang gihangyo ang iyang mga ginikanan sa libro nga iyang gitun-an. Buot niyang gradohan siya sa iyang nakat-onan bahin niana imbes sa gitudlo kaniya panahon sa mga klase labot sa relihiyon. Gisugyot sa mga ginikanan sa magtutudlo nga kon buot niyang gradohan siya nga husto, siya mismo kinahanglang magtuon una. Usa ka pagtuon sa Bibliya ang gisugdan uban kaniya.

Nagplano sa Pagduaw?

Sa daghang bahin sa kalibotan karong adlawa, ang mga tawo walay interes sa maayong balita sa Gingharian. Sila walay interes sa Diyos ni sa Bibliya. Ang uban naparalisar sa kahadlok ug yanong dili motubag ngadto kang bisan kinsang estranghero diha sa pultahan. Kining tanan maoy tinuod nga hagit sa mga Saksi ni Jehova diha sa ilang ministeryo. Apan pagkalahi sa Cameroon!

Ang pagsangyaw gikan sa ganghaan ug ganghaan maoy usa ka kalipay dinhi. Imbes manuktok, naandan ang pagtawag, “Kong, kong, kong.” Dayon gikan sa sulod usa ka tingog mangutana, “Kinsa kana?” nga human niana among ipailaila ang among kaugalingon ingong mga Saksi ni Jehova. Sagad, sugoon sa mga ginikanan ang mga bata sa pagkuhag mga bangko ug ibutang kini sa landong sa usa ka kahoy, tingali sa punoan sa mangga. Usa ka maayong panahon sa ingon ang magugol sa pagpatin-aw kon unsa ang Gingharian sa Diyos ug kon unsay himoon niini sa paghupay sa alaot nga kahimtang sa katawhan.

Human sa ingon niini nga panaghisgot, gipahungaw sa usa ka babaye ang iyang gibati, nga nag-ingon: “Ako nasubo nga masayod nga ang kamatuoran nga akong gipangita dili makita sa relihiyon nga akong namat-an ug natigulangan. Ako nagpasalamat sa Diyos nga iyang gipakita kanako ang kamatuoran. Usa ako ka diakonisa sa akong simbahan. Ang larawan sa Birhen Maria mogugol ug usa ka semana diha sa balay sa matag diakono aron ang matag usa makahangyo kaniya. Alang kanako, naghangyo ako kanunay kang Maria nga tabangan ako nga masayod sa kamatuoran. Karon gipakita sa Diyos kanako nga ang kamatuoran wala diha kaniya. Ako nagpasalamat kang Jehova.”

Busa kon sa umaabot gusto mong makasinati sa tuman nga kalipay nga mabatonan sa pagsangyaw sa maayong balita sa Gingharian sa Diyos, nganong dili moduaw niining bahina sa Kasadpang Aprika? Gawas pa nga masinati sa “Aprika diha sa gamayng hulad,” pinaagi man sa bangka, sa bush taxi, o sa bisikleta, ikaw makaamot usab ngadto sa “tapok sa saksi” nga gitukod diha sa yuta sa “Bukid sa Diyos.”

[Footnote]

[Credit Line on page 22]

Mapa: Mountain High Maps® Copyright © 1995 Digital Wisdom, Inc.