Ang mga Damgo Makatagna ba sa Umaabot?

SUKAD sa karaang kapanahonan, ang katawhan maikagon kaayo sa mga damgo. Ang mga Ehiptohanon nagbuhat ug kuting mga libro alang sa badbad sa damgo, ug ang mga Babilonyanhon dunay ilang mga magbabadbad ug damgo. Taliwala sa mga Grego ang kostumbre mao nga ang masakitong mga tawo pakatulogon sa mga halaran ni Asclepius aron makadawat ug mga instruksiyon bahin sa panglawas diha sa ilang mga damgo. Sa ikaduhang siglo sa atong Komong Panahon, si Artemidorus nagbuhat ug usa ka libro diin gihatag niya ang mga badbad sa mga simbolo sa damgo. Daghang susamang mga libro nga nabuhat sukad gipasukad sa iyang libro. Hangtod karong adlawa, gihimo ang mga paningkamot sa pagbadbad sa mga damgo, apan sila ba aktuwal nga maghatag ug kasayoran sa umaabot nga mga panghitabo?

Aron sila adunay umaabot nga kahulogan, kinahanglang sila maimpluwensiyahan sa usa ka labawng gahom. Sa Bibliya kita makakaplag ug daghang kahimtang diin gitagana sa Diyos kanang gahoma mismo. Siya mihatag ug matagnaong mga damgo sa iyang mga alagad ingon man sa pipila nga wala magsimba kaniya. Sa pagkamatuod, ang Job 33:14-16 nag-ingon: “Ang Diyos nagsulti . . . diha sa usa ka damgo, usa ka panan-awon sa kagabhion, sa dihang ang mga tawo nahinanok sa pagkatulog, sa mga panahon sa pagkatulog sa higdaanan. Maoy sa maong panahon nga ginabuksan niya ang igdulungog sa mga tawo.”

Gihimo kadto sa Diyos sa kahimtang sa Ehiptohanong Paraon sa mga adlaw ni Jose, kinsa nagkinabuhi kapig 1,700 ka tuig sa wala pa ang Komong Panahon. Ang damgo ni Paraon makaplagan sa Genesis 41:1-7, ug sa mga bersikulo 25 hangtod 32, gibadbad kini ni Jose ingong nagtagnag pito ka tuig “sa dakong kadagaya sa tibuok yuta sa Ehipto,” nga sundan sa pito ka tuig nga kagutmanan. Si Jose mipatin-aw kang Paraon: “Kon unsay ginabuhat sa matuod nga Diyos iyang gipakita kang Paraon.” (Genesis 41:28) Ang damgo nagtagna kon unsa gayod ang nahitabo.

Usa ka iladong hari sa mga Babilonyanhon ang may susamang kasinatian. Si Nabukodonosor may usa ka damgo nga nakapasamok pag-ayo kaniya, apan siya dili makahinumdom niana. Mao nga iyang gipatawag ang iyang mga mananag-an aron isulti kaniya ang damgo ug ang badbad niana. Kadto usa ka hangyo nga imposible nilang matuman.​—Daniel 2:1-11.

Sanglit ang Diyos maoy naghatag sa damgo ngadto sa hari, Iyang gipahinabo nga si propetang Daniel magbutyag sa damgo ug sa badbad niini. Ang Daniel 2:19 nag-ingon: “Unya nahitabo nga sa usa ka panan-awon sa gabii ang tinago gibutyag kang Daniel.” Gipasidungog ni Daniel ang maong damgo ngadto sa Diyos: “Ang tinago nga ginapangutana mismo sa hari, ang mga tawong makinaadmanon, ang mga salamangkero, ang tigmadyik nga mga saserdote ug ang mga astrologo mismo wala makapadayag sa hari. Bisan pa niana, nagalungtad ang Diyos sa mga langit nga maoy usa ka Tigpadayag sa mga tinago, ug iyang gipahibalo kang Haring Nabukodonosor kon unsay mahitabo sa kataposang bahin sa mga adlaw.”​—Daniel 2:27, 28.

May mga panahong ang Diyos mihatag ug mga instruksiyon ngadto sa iyang katawhan pinaagi sa mga damgo, ug sa ubang mga panahon siya mipasalig sa balaang pag-uyon o mitabang kanila sa pagsabot kon giunsa niya pagtabang kanila. Sa kahimtang ni Jacob, gipadayag sa Diyos ang iyang pag-uyon pinaagi sa usa ka damgo.​—Genesis 48:3, 4.

Sa dihang si Jose, ang amaama ni Jesus, nakadiskobre nga mabdos si Maria, siya mihukom nga diborsiyohan siya. Unya siya nakadawat ug mga instruksiyon diha sa usa ka damgo nga dili kana buhaton. Ang Mateo 1:20 nag-ingon: “Human niya mahunahuna pag-ayo kining mga butanga, tan-awa! usa ka anghel ni Jehova ang nagpakita kaniya sa damgo, nga nag-ingon: ‘Jose, anak ni David, ayaw kahadlok nga dad-on sa inyo si Maria nga imong asawa, kay ang gisamkon diha kaniya maoy pinaagi sa balaang espiritu.’” Sa ulahi iyang nadawat ang usa ka pasidaan diha sa usa ka damgo: “Ang anghel ni Jehova mipakita diha sa usa ka damgo ngadto kang Jose, nga nag-ingon: ‘Bangon, dad-a ang bata ug ang inahan niini ug kalagiw ngadto sa Ehipto.’”​—Mateo 2:13.

Mga Damgo nga Dili Gikan sa Diyos

Ang kamatuorang ang pagbadbad sa damgo maoy kasagaran taliwala niadtong dili katawhan sa Diyos nagpailang ang mga damgo sa katibuk-an dili maisip nga kasaligang mga tigpadayag sa umaabot. Sa mga adlaw sa propeta sa Diyos nga si Jeremias, ang mini nga mga propeta nag-ingon: “Ako may usa ka damgo! Ako may usa ka damgo!” (Jeremias 23:25) Ang ilang mga tuyo mao ang pagpahisalaag sa mga tawo sa paghunahuna nga ang Diyos nagpahayag pinaagi kanila. Mahitungod sa maong mga magdadamgo, si Jeremias gidasig sa pag-ingon: “Mao kini ang giingon ni Jehova sa mga panon, ang Diyos sa Israel: ‘Ayaw kamo pagpalimbong sa inyong mga propeta nga anaa sa inyong taliwala ug sa inyong mga tighimog panagna, ug ayaw kamo patalinghog sa ilang mga damgo nga ilang ginadamgo. Kay “sa kabakakan sila nagapanagna alang kaninyo diha sa akong ngalan . . . ,” mao ang giingon ni Jehova.’”​—Jeremias 29:8, 9.

Sanglit ang maong mini nga mga propeta maoy “mga tighimog panagna,” ang ilang mga damgo mahimong naimpluwensiyahan sa tuman-kadaotang espiritung mga gahom sa tuyo nga limbongan ang katawhan. Ang samang butang gipaila diha sa giingon sa Zacarias 10:2: “Ang terapim mismo nagpahayag sa butang misteryoso; ug ang mga tighimog panagna, sa ilang bahin, nakapanan-aw ug kabakakan, ug sila nagpadayon sa pagpahayag sa way-pulos nga mga damgo.”

Ang Yawa mao ang pangunang-maglilimbong nga sa libolibong katuigan naggamit ug relihiyosong mga pangulo sa pagpangangkon sa binakak nga ang Diyos nakigsulti kanila pinaagi sa mga panan-awon ug mga damgo, sama sa gihimo sa mini nga mga propeta sa mga adlaw ni Jeremias ug Zacarias. Mahitungod kanila, ang dinasig nga tagsulat sa Bibliya nga si Judas misulat ngadto sa mga Kristohanon sa unang siglo: “Adunay mga tawo nga nakayuhot sa sulod kinsa dugay na kanhing gikatudlo sa mga Kasulatan ngadto niini nga paghukom, mga tawong dili-diyosnon, nga nagahimo sa dili-takos nga kalulot sa atong Diyos nga katarongan alang sa malaw-ayng panggawi ug nagapamatuod ingong bakak ngadto sa atong bugtong Tag-iya ug Ginoo, si Jesu-Kristo.” Kining mga tawhana, matod niya, maoy, ingnon ta, “nanagpangdamgo.”​—Judas 4, 8.

Susiha ang mga Pangangkon

Ang usa ka tawo mahimong moangkon nga ang Diyos nakigsulti kaniya diha sa usa ka damgo o nga ang iyang mga damgo bahin sa umaabot nga mga panghitabo nagnuod, apan kana dili igong katarongan sa pagtuo kaniya ug pagsunod kaniya nga walay pagsusi. Matikdi ang mga instruksiyong gisulat ngadto sa mga Israelinhon, nga hikaplagan sa Deuteronomio 13:1-3, 5: “Kon ugaling ang usa ka propeta o usa ka magdadamgo sa usa ka damgo motungha sa inyong taliwala ug maghatag gayod kaninyo ug usa ka ilhanan o usa ka tilimad-on, ug ang ilhanan o tilimad-on matuman nga bahin niana siya namulong kaninyo, nga nag-ingon, ‘Manglakaw kita nga mosunod sa ubang mga diyos, si kinsa wala ninyo hiilhi, ug atong alagaron sila,’ ayaw gayod kamo patalinghog sa mga pulong sa maong propeta o sa magdadamgo sa maong damgo . . . Ug ang maong propeta o ang maong magdadamgo sa damgo angay nga pagapatyon.” Gitugotan sa Diyos kana sila sa pagpahayag nga binakak ingong usa ka pagsulay sa pagkamaunongon sa iyang katawhan.

Inay motuo nga walay pagsusi sa mga pangangkon sa karismatikong mga magdadamgo, ang maalamong dalan mao nga atong susihon ang ilang mga pangangkon aron makalikay nga malimbongan sa dili-makitang pangunang-maglilimbong, kinsa “nagalimbong sa tibuok gipuy-ang yuta.” (Pinadayag 12:9) Apan sa unsang paagi sila masusi sa kasaligang paagi?

Ang sinulat nga Pulong sa Diyos mao ang atong hinatag-sa-Diyos nga giya sa kamatuoran. Mahitungod niini, si Jesu-Kristo miingon: “Ang imong pulong maoy kamatuoran.” (Juan 17:17) Busa gitambagan kita sa 1 Juan 4:1: “Mga hinigugma, ayaw ninyo tuohi ang matag inspiradong pahayag, hinunoa sulayi ang mga inspiradong pahayag aron masuta kon kini ba sila nagagikan sa Diyos, tungod kay daghang bakak nga mga propeta ang nanungha sa kalibotan.” Sa dihang mainampingong itandi sa Bibliya, ang ilang mga pangangkon, mga pilosopiya, ug mga lihok mosumpaki niini. Ang Pulong sa Diyos mao ang awtoridad mahitungod sa kon unsay kamatuoran.

Ang magdadamgo ba nga nangangkon sa espesyal nga kahibalo sa aktuwal nagagamit sa panagna o ubang espiritistikanhong mga buhat? Kon mao, gihukman siya sa Pulong sa Diyos. “Angay nga walay hikaplagan kaninyo si bisan kinsa . . . nga nagagamit sa panagna, usa ka salamangkero o si bisan kinsa nga nagapangitag mga tilimad-on o usa ka mananag-an, o usa nga nagalamat sa uban o si bisan kinsa nga mokonsultag usa ka espiritista o usa ka propesyonal nga tigtagna ug mga hitabo o si bisan kinsa nga mangutana sa mga patay. Kay si bisan kinsa nga nagabuhat niining mga butanga maoy dulumtanan kang Jehova.”​—Deuteronomio 18:10-12.

Kon siya nangangkon nga adunay kalag sa kahiladman niya nga dili mamatay, nagasupak siya sa Pulong sa Diyos nga tin-awng nag-ingon: “Ang kalag nga nagapakasala​—kini mismo mamatay.” (Ezequiel 18:4) Siya ba nagbayaw sa iyang kaugalingon ug nagdanig mga sumusunod? Ang Mateo 23:12 nagpasidaan: “Ang bisan kinsang nagabayaw sa iyang kaugalingon ipaubos.” Ug ang Buhat 20:30 nagpasidaan sa mga Kristohanon: “Gikan sa taliwala kaninyo mismo may mga tawo nga motungha ug magasultig linubag nga mga butang aron ipahilayo ang mga tinun-an sunod sa ilang kaugalingon.”

Siya ba nagpasiugdag mapintasong mga lihok? Ang Santiago 3:17, 18 nagsaway kaniya: “Ang kaalam gikan sa itaas maoy una sa tanan putli, unya makigdaiton, makataronganon, andam mosunod, puno sa kaluoy ug maayong mga bunga, dili mohimo ug pagpihigpihig, dili salingkapaw. Dugang pa, ang binhi sa bunga sa pagkamatarong napugas diha sa madaitong mga kahimtang alang niadtong mga nagapakigdait.” Nagpangita ba siyag politikanhong awtoridad o impluwensiya sa kalibotan? Ang Pulong sa Diyos nagsaway kaniya nga mapasiugdahon, nga nag-ingon: “Ang bisan kinsa nga buot mahimong higala sa kalibotan nagahimo sa iyang kaugalingon nga usa ka kaaway sa Diyos.” Sa ingon ang Bibliya nagpadayag kon unsay bakak.​—Santiago 4:4.

Kon ang usa ka tawo adunay damgo bahin sa pagkamatay sa usa ka membro sa pamilya o usa ka higala, tingali kana maoy tungod kay siya mabalak-on bahin sa maong tawo. Nga ang maong tawo mahimong namatay sa gabii mismo sa damgo wala sa kaugalingon magpamatuod nga ang damgo maoy matagnaon. Alang sa matag damgo niining matanga nga maorag nagnuod, adunay ginatos nga wala.

Bisan pag ang Diyos migamit ug mga damgo sa nangagi sa pagpadayag ug matagnaong mga panghitabo ug mihatag ug mga instruksiyon samtang gibuhat ang iyang sinulat nga Pulong, dili na kinahanglan nga iyang buhaton kana karong adlawa. Ang maong sinulat nga Pulong naundan sa tanang instruksiyon gikan sa Diyos nga gikinahanglan sa katawhan niining panahona, ug ang mga tagna niini maoy kabahin sa mga panghitabo nga kapig usa ka libo ka tuig sa umaabot. (2 Timoteo 3:16, 17) Busa kita makasalig nga ang atong mga damgo dili mga timailhan gikan sa Diyos bahin sa umaabot nga mga panghitabo kondili kinahanglanong mga obra sa utok aron padayong mahuptan ang atong maayong pangisip.

[Hulagway sa panid 7]

Maingon nga ang damgo ni Paraon nagpakita kon unsay moabot, ang Pulong sa Diyos nagtagana sa kahibalo mahitungod sa atong umaabot