Pagduaw sa Among Pinuy-anang Misyonaryong Natad

ANG grupo sa Kristohanong mga kongregasyon nga akong giduaw nagdala kanako gikan sa Portugal ngadto sa Tsina​—o maingon-ingon niana. Bisan pa niana, ang akong asawa, si Olive, ug ako wala mobiya sa Britanya.

Kami nagaduaw sa nag-usbaw nga gidaghanon sa langyaw-ug-pinulongang mga kongregasyon sa mga Saksi ni Jehova nga nagkatag sa tibuok nasod. Gikan sa isla sa Jersey, mga 20 kilometros gikan sa baybayon sa Normandy sa Pransiya, diin kami adunay Portuges nga grupo, ngadto sa lungsod sa Sunderland sa amihanan sa Inglaterra, diin giduaw namo ang interesadong Inintsek-ug-sinultihang mga tawo, kami nakigbahin sa nagdako, mauswagon sa espirituwal, daghag sinultihang natad. Giunsa namo pagpakabaton niining talagsaong tinudlong buluhaton? Ug unsay nagakahitabo sa among pinuy-anang misyonaryong natad? Pasaysaya ako.

Si Olive ug ako nag-alagad sa mga 20 ka tuig diha sa nagapanawng buluhaton, nga nagaduaw sa nagkalainlaing kongregasyon kada semana. Ang among biyahe nagdala kanamo gikan sa amihanan ngadto sa habagatan, sa sidlakan ngadto sa kasadpan, sa tibuok Britanya, ug sa dili pa dugay ngadto sa among Kristohanong mga igsoon sa isla sa Malta sa Mediteranyo, diin nasinati namo ang talagsaong Kristohanong pagkamaabiabihon. (Itandi ang Buhat 28:1, 2.) Human sa tulo ka tuig sa Malta, misugod kami sa pagpamalandong kon asa unya ang among sunod nga asaynment. Among gihanduraw nga lagmit makaduaw kami sa ilaya nga dapit sa Inglaterra, ug kami misugod sa pagpasibo sa among mga hunahuna niini nga posibilidad. Pagkadakong sorpresa sa dihang nadawat namo ang among asaynment nga mag-alagad niining bag-o nga sirkito nga gilangkoban sa mga grupo sa mga kongregasyon nga nagasultig 23 ka nagkalainlaing mga pinulongan!

Nahibulong kami kon unsaon namo pagsugakod. Gawas sa among kasinatian sa Malta, kami wala pa kaayoy kasinatian uban sa mga tawo sa nagkalainlaing kagikan ug kultura. Madasig ba gayod namo kadtong kinsa dili kaayo makasabot ug Ingles? Unsaon namo pagpakigkomunikar nga dili mahibalo sa ubang mga pinulongan? Komosta ang bahin sa pagkaon ug sa nagkadaiyang mga kostumbre sa uban? Kami kaha makapasibog maayo? Ang mga pangutana nga sama niini kanunayng mitungha sa among mga hunahuna samtang kami mainampoong nagatagad sa pagtubag niining panawag sa Macedonia.​—Buhat 16:​9, 10; 1 Corinto 9:​19-22.

Pagbuntog sa Kababagan sa Pinulongan

“Sa sinugdan gibati ko nga dili kuwalipikado kay ako walay kahibalo sa mga pinulongan,” misaysay si Olive. “Wala ko mahibalo kon unsaon nako pagtabang ang mga sister. Dayon nahinumdom ako kon sa unsang paagi gidasig kami sa magtiayon nga unang nagtuon kanamo sa Bibliya nga dili gayod modumili sa asaynment. Gitudlo nila kanamo nga si Jehova dili gayod maghangyo kanato sa pagbuhat sa butang nga dili nato mahimo.” Busa gidawat namong duha nga kinabubut-on ang asaynment.

Sa pagpalandong, among nakita nga ang among kawalay kahibalo sa ubang pinulongan nakatabang kanamo sa pagtagad sa tanan nga makiangayon. Pananglitan, ang pagtambong sa mga tigom nga gidumala sa lahing pinulongan kada semana nagpaapresyar kanamo kon unsay bation sa mga igsoon kon sila mamati sa tibuok Ingles-ug-pinulongang mga tigom samtang diyutay ray nasabtan sa gipamulong. Kinahanglang mangandam kamig maayo alang sa mga tigom aron makasabot kami sa diwa sa kon unsay igapresentar. Si Olive kanunay nga motubag ug usa sa mga pangutana sa tigom. Siya mag-andam ug tubag sa Ingles ug ipahubad kini sa usa ka sister alang kaniya, nga nagsulat sa hubad subay sa paglitok sa pinulongan. Gidawat niya nga magpanuko siya sa pag-isa sa iyang kamot sa pagkomento. Usahay ang iyang mga paningkamot mobikil sa pagkatawa. Apan kini wala magpaluya kaniya. “Nahibalo ako nga gipabilhan sa mga igsoon ang akong paningkamot,” matod niya. “Ngani, ang akong pagtubag nagdasig niadtong mas hinite sa pinulongan nga makig-ambit sa pagkomento.”

Alang nako, ang paghatag ug mga pakigpulong lahi, usab, sanglit hatagan nakog panahon ang maghuhubad human sa matag tudling pulong. Dali ra kaayo nga mawala ako sa akong gihan-ay nga ideya. Akong nakaplagan nga kinahanglan ko ang labaw pang konsentrasyon ug menosan pag-ayo ang akong materyal. Apan ako nalingaw niana.

Among Nagkadaiya nga Ministeryo

Sa daghang dapit sa siyudad sa Britanya, ang mga tawong nagsultig langyawng pinulongan nagkatag, duha sa usa ka kalye tingali, ug unya mobiyahe ka ug laing pipila ka distansiya sa pagkaplag sa uban. Bisan pa niana, kon ikaw motimbaya kanila sa ilang kaugalingong pinulongan ug makita ang ilang reaksiyon, ikaw mobati nga kini takos. Kon ang igsoon nga akong giubanan motanyag sa mensahe sa Gingharian diha sa kaugalingong pinulongan sa tagbalay, ang sanong sagad maoy dakong kalipay.

Sa pagkatinuod, ang ministeryo sa langyawg-pinulongan nga natad maoy usa sa labing makaiikag nga among nasinati sulod sa among 40 ka tuig nga pag-alagad sa Gingharian. Ang umaabot nga pagtubo maoy dako gayod. Walay duhaduha nga daghang tawo ang nakakat-on nga mas dali ug uban ang dulot nga pagpabili kon sila tudloan sa ilang kaugalingong pinulongan. (Buhat 2:8, 14, 41) Makapatandog gayod sa emosyon ang pagkakita sa mga igsoong lalaki ug babaye uban ang mga luha sa kalipay inigkatapos sa mga tigom, sa ubang mga kaso sa unang higayon nga nakapamati ug nakasabot sa tibuok nga programa.

Sa dihang nagasangyaw sa balay ug balay, naningkamot kami nga makahimog labing menos introduksiyon diha sa pinulongan sa tagbalay, bisag usahay nalisdan kami sa among kaugalingon. Pananglitan, usa ka komon nga timbaya sa tagbalay nga Gujarati maoy Kemcho, nga yanong nagkahulogang “Komosta.” Dayag nga nasayop ako paglitok sa usa ka panahon nga ingon sa daw ako nag-anunsiyog usa ka iladong matang sa kape. Bisan pa niana, sa usa ka balay ang bana ug asawa mipahiyom sa dihang gitimbaya ko sila sa Gujarati. Dihadiha silang nagdapit kanamo nga mosulod ug buotang nagtanyag kanamo ug kape​—dili tungod sa sayop nga paglitok. Nahibaloan ra nga sila paryente sa pipila ka mga Saksi ni Jehova sa grupo nga among giduaw, ug sila nagpakitag tinuod nga interes sa kamatuoran.

Usa ka Ingles-ug-sinultihang sister subsob nga nagbilin ug mga magasin sa Inintsek-ug-sinultihang babaye sa daghang tuig. May mga okasyon nga gitanyagan niya ang babaye ug libreng pagtuon sa Bibliya, apan kini gidumilian. Usa ka adlaw usa ka sister nga makamaong mag-Inintsek miuban kaniya ug nagtanyag sa librong Ikaw Mabuhing Walay Kataposan sa Paraiso sa Yuta niana nga pinulongan, nga gidawat dayon sa interesadong tagbalay.a Karon kay nakabaton ug libro sa iyang kaugalingong pinulongan, siya miuyon sa usa ka pagtuon sa Bibliya. Kadtong pipila ka pulong nga gisulti sa kaugalingong pinulongan sa babaye adunay positibong epekto diha sa babaye.

Nagkalainlaing mga Kultura

Wala kami makaamgo nga sa pipila ka mga kultura ang mga lalaki dili gusto nga ang ilang mga babaye molakaw nga mag-inusara sa gabii. Kini nagpalisod kaayo sa daghang sister sa pagtambong sa mga tigom nga himoon sa gabii. Ang pipila ka komunidad sa Asia nagtuo nga ang batan-ong mga babaye nga mopiling dili magminyo ug magpadayon sa pagpuyo sa balay maoy insulto sa pamilya. Usa ka amahan sa batan-ong sister buot nga maghilo sa iyang kaugalingon sa dihang ang sister midumili nga makigminyo sa lalaki nga gipili sa pamilya alang kaniya. Oo, dako gayod ang pagaantoson sa maong mga sister! Sa gihapon, sa dihang imong makita ang epekto sa kamatuoran diha sa pamilyahanong kinabuhi ug kon sa unsang paagi ang kamaunongon sa mga sister kang Jehova nakapadayeg sa mga ginikanan, kini tinuod gayod nga kahibulongan.

Sa pagpakig-ambit niini nga asaynment, kami kinahanglang maghimog pipila ka mga kausaban. Sa wala pa kami magsugod sa nagapanawng buluhaton, ang akong pagkaon mao ang naandang linutong pagkaon sa Inglaterra, apan karon kon mas daghag rekado ang pagkaon, mas maayo. Nagmahay kami nga sa daghang tuig gipalabay namo ang pagpahimulos sa nagkalainlaing pagkaon​—gikan sa hilaw nga isda ngadto sa mga sinalsahan.

Masanag nga mga Palaaboton

Daw tin-aw nga kini mao ang panahon alang sa langyaw-ug-pinulongang natad nga mouswag sa daghang dapit. Dugang ug dugang mga publikasyon ang mabatonan karon sa nagkalainlaing mga pinulongan. Masabot nimo ang panalangin ni Jehova samtang giorganisar ang bag-ong mga kongregasyon. Ang mga igsoon nga may kahibalo sa ubang mga pinulongan nangabot gikan sa halayong mga kongregasyon sa pagtabang.

Ang talagsaong pananglitan mao ang pagsanong sa pagsangyaw sa maayong balita sa Gingharian sa Pransiya. Daghang Pranses-ug-sinultihang mga kagiw gikan sa Zaire ug ubang nasod sa Aprika ang nangabot sa Britanya sa dili pa dugayng katuigan. Sa dihang ang unang Pranses-ug-pinulongang kongregasyon natukod sa London, mga 65 ka magmamantala sa Gingharian ang nakig-anib. Usa ka tuig sa ulahi ang gidaghanon milukso ngadto sa 117, ug taliwala niini, 48 ang nag-alagad ingong mga regular payunir. Wala magdugay gitukod ang ikaduhang kongregasyon sa pag-atiman sa nagdakong interes. Karon dugang atensiyon ang ikahatag sa mga interesado, 345 ang mitambong sa 1995 nga selebrasyon sa Memoryal. Ang mga graduwado niadto sa Gilead nga nag-alagad sa Benin, Côte d’Ivoire, Morocco, ug Zaire karon nagagamit sa ilang kasinatian sa pag-atiman niining nagdakong natad, ug ang pagsanong maoy katingalahan.

Sa usa ka pagduaw sa Pranses nga kongregasyon, miuban ako sa usa ka pagtuon sa Bibliya sa usa ka batan-ong babaye nga taga-Aprika. Sa talibiya na kami, ang batan-ong babaye mihilak: “Palihog ayaw unag lakaw. Pabilin pag dugay.” Buot niya nga makakat-on pag dugang. Siya nagpahinumdom kanako sa unang-siglong Lydia.​—Buhat 16:​14, 15.

Ang among unang buluhaton mao ang pagtabang sa gagmayng langyaw-ug-pinulongang mga grupo nga mahimong mga kongregasyon. Diin ang mga igsoon nagahimo sa senemanang Pagtuon sa Kongregasyon sa Libro, gipailaila namo ang gipamubo nga Tunghaan sa Teokratikanhong Ministeryo alang kanila kas-a sa usa ka bulan. Kini nagtabang kanila sa pagpahayag ug maayo sa ilang kaugalingon diha sa ministeryo sa kanataran. Dayon sila anam-anam nga naningkamot sa pagdumala sa tanang lima ka senemanang mga tigom sa kongregasyon. May bag-o na kaming mga kongregasyon nga nagsultig Gujarati, Hapones, Inintsek (Cantonese), Portuges, Pranses, Punjabi, Tamil, ug Welsh.

Nalipay usab kami sa pribilehiyo sa pagtambong sa mga tigom sa mga igsoon nga mga bungol. Ang pagtan-aw sa mga igsoon nga nanag-awit pinaagi sa ilang mga kamot daw makapatandog kaayo. Nakaamgo nga sa ilang ministeryo sila nagasulti pinaagig mga kompas, giapresyar ko ang ilang ekselenteng mga paningkamot sa pagpakig-ambit diha sa pagsangyaw sa Gingharian. Dihay mga tigsenyas gani alang niadtong kinsa bungol ug buta. Ingon sa daw gipaneguro ni Jehova nga walay usa nga masayloan.

Kon kami mohimog partikular nga hangyo, mahisama unya kana nianang kang Jesus: “Pangamuyo kamo sa Agalon sa pag-ani nga magpadalag mga mamumuo ngadto sa iyang pag-ani.” (Mateo 9:38) Daghan sa atong mga igsoon ang nagadawat sa hagit sa pagkakat-on sa pinulongan sa etnikong mga grupo diha sa ilang teritoryo sa kongregasyon. Bisag kami sa milagroso wala tugahi uban sa katakos sa pagsultig nagkalainlaing mga pinulongan, tinong gibuksan ni Jehova ang ministeryo niini nga pinuy-anang misyonaryong natad​—usa ka natad nga hinog na alang sa pagpangani. (Juan 4:​35, 36)​—Sumala sa giasoy ni Colin Seymour.

[Mga footnote]