Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Buweno, tan-awa kon makatubag ka sa mosunod nga mga pangutana:

◻ Unsay pangunang katuyoan sa edukasyon alang sa usa ka Kristohanong batan-on?

Ang pangunang katuyoan sa edukasyon mao ang pagsangkap sa batan-on nga mahimong usa ka epektibong ministro ni Jehova. Ug ang labing hinungdanong edukasyon aron malampos ang maong tumong mao ang espirituwal nga edukasyon.​—8/15, panid 21.

◻ Unsay mga katarongan sa pagtaho sa grabeng sala sa kaubang Kristohanon ngadto sa mga ansiyano?

Ang usa ka katarongan sa pagtaho sa grabeng sala mao nga kana mosangpot sa pagtipig sa kahinlo sa kongregasyon. Ang laing katarongan mao nga ang pagbuhat niana maoy usa ka buhat sa Kristohanong may-prinsipyong gugma nga gipakita ngadto sa Diyos, ngadto sa kongregasyon, ug ngadto sa nakasala.​—8/15, mga panid 28, 30.

◻ Unsay ipasabot nga “kanunayng ginahuptan nga duol sa hunahuna ang pagkaanaa sa adlaw ni Jehova”? (2 Pedro 3:12)

Kini nagpasabot nga dili nato kalimtan ang “adlaw ni Jehova.” Dili gayod nato kalimtan nga haduol na ang adlaw sa dihang pagalaglagon ni Jehova kining sistemaha sa mga butang. Kini angay nga matuod gayod kanato nga klarong makita nato kini, nga anaa gayod sa unahan nato. (Sofonias 1:​7, 14)​—9/1, panid 19.

◻ Nganong ang kataposang mga adlaw niining sistemaha nagpadayon nga mas dugay kay sa gilaoman sa daghan?

Gikonsiderar ni Jehova kon unsa ang labing maayo alang sa tanang katawhan. Ang iyang kabalaka maoy alang sa mga kinabuhi sa mga tawo. (Ezequiel 33:11) Kita makasalig nga ang kataposan moabot sa tukma gayod nga panahon sa pagtuman sa katuyoan sa atong maalamon-sa-tanan, mahigugmaong Maglalalang.​—9/1, panid 22.

◻ Sa unsang paagi mahuptan niadtong anaa sa bug-os panahong pag-alagad ang ilang kangaya luyo sa mga problema nga mahimong atubangon nila?

Angay nilang palandongon ang daghang panalangin nga ilang nabatonan ug ilhon nga libolibong uban pa ang nag-antos ug mas dagkong kalisdanan. (1 Pedro 5:​6-9)​—9/15, panid 24.

◻ Unsay tumong ni William Tyndale sa paghubad sa Bibliya?

Ang tumong ni Tyndale mao nga mabasa sa ordinaryong tawo ang Kasulatan diha sa mga pinulongang eksakto ug yano kutob sa mahimo.​—9/15, panid 27.

◻ Sa unsang paagi atong ikapakita nga kita maunongong mga tigpaluyo sa Pulong sa Diyos?

Atong ikapakita ang atong pagkamaunongon sa Pulong sa Diyos pinaagi sa masibotong pagsangyaw niana ngadto sa uban. Ingong mga magtutudlo, angay natong gamiton ang Bibliya nga mainampingon, nga dili magtuis niana o magpadako sa giingon niana aron ipahaom ang atong mga ideya. (2 Timoteo 2:15)​—10/1, panid 20.

◻ Sa unsang paagi ang makahilong espiritu sa kalibotan makapaluya sa atong integridad?

Ang espiritu sa kalibotan makapaluya sa atong integridad pinaagi sa paghimo kanatong dili matagbaw sa kon unsay atong nabatonan ug mabalak-on sa pagbutang sa atong kaugalingong mga panginahanglan ug intereses nga una kay sa iya sa Diyos. (Itandi ang Mateo 16:​21-​23.)​—10/1, panid 29.

◻ Unsay buot ipasabot sa pag-alagad kang Jehova nga tibuok-kalag?

Ang “kalag” nagpunting sa tibuok nga pagkatawo, uban sa tanan niyang mga katakos sa lawas ug hunahuna. Ang pag-alagad kang Jehova nga tibuok-kalag nagpasabot sa paghatag sa atong kaugalingon, nga ginamit ang tanan natong mga katakos ug nagagamit sa atong kusog kutob sa atong mahimo diha sa pag-alagad sa Diyos. (Marcos 12:​29, 30)​—10/15, panid 13.

◻ Unsa ang yawi sa pagkahimong tawo nga dunay diyosnong prinsipyo?

Ang yawi mao gayod ang pagkaila kang Jehova, sa iyang mga gusto, sa mga dili niya gusto, ug sa iyang mga katuyoan. Kon kini nga mga prinsipyo bahin sa Diyos mag-apektar sa atong mga kinabuhi, sila mahimong, ingong sangpotanan, buhing mga prinsipyo. (Jeremias 22:​16; Hebreohanon 4:12)​—10/15, panid 29.

◻ Ang mga alagad ni Jehova adunay unsang timbang nga tinamdan ngadto sa tawhanong pagmando?

Sila neyutral sa politikanhong mga butang sanglit nag-alagad sila ingong mga embahador o mga sinugo sa Gingharian sa Diyos. (2 Corinto 5:20) Sa laing bahin, sila matanlagong nagapasakop niadtong anaa sa awtoridad.​—11/1, panid 17.

◻ Unsang pagtulon-an ang atong makat-onan gikan sa dalang gisubay ni Eliseo nga manalagna?

Sa dihang gidapit para sa linaing pag-alagad uban ni Elias, dihadihang gibiyaan ni Eliseo ang iyang umahan aron alagaran si Elias, bisan ubos ang pipila sa iyang mga katungdanan. (2 Hari 3:11) Daghan sa mga alagad sa Diyos karon ang nagpasundayag sa susamang espiritu sa pagsakripisyo-sa-kaugalingon pinaagi sa pagbiya sa ilang mga panginabuhian aron sa pagsangyaw sa maayong balita sa lagyong mga teritoryo.​—11/1, panid 31.

◻ Unsang mapuslanong tambag ang anaa sa sulat ni Santiago?

Kini nagpakita kanato kon unsaon pagsagubang sa mga pagsulay, nagtambag kanato batok sa paboritismo, ug nag-awhag kanato sa pagbuhat ug matarong nga mga buhat. Si Santiago nag-awhag kanato sa pagkontrolar sa dila, sa pagsukol sa kalibotanong mga impluwensiya, ug sa pagpalambo sa pakigdait. Ang iyang mga pulong usab makatabang kanato nga magmapailobon ug mainampoon.​—11/15, panid 24.

◻ Nganong si Jehova “andam nga mopasaylo”? (Salmo 86:5)

Si Jehova andam nga mopasaylo tungod kay wala niya kalimti nga kita mga linalang gikan sa abog, nga may mga kaluyahon, o mga kahuyangan, ingong sangpotanan sa pagkadili-hingpit. (Salmo 103:​12-​14)​—12/1, mga panid 10, 11.

◻ Nganong kita kinahanglang andam nga mopasaylo sa uban?

Kon dili kita mopasaylo sa uban sa dihang adunay pasikaranan alang sa kaluoy, kini makadaot sa atong kaugalingong relasyon uban sa Diyos. (Mateo 6:​14, 15)​—12/1, panid 17.