Mga Pangutana Gikan sa mga Magbabasa
Sumala sa Mateo 17:20, ang mga apostoles wala makaayo sa usa ka masakitong batang lalaki ‘tungod sa ilang gamay nga pagtuo.’ Sa Marcos 9:29, hinunoa, ang ilang kawalay-katakos gilangkit sa panginahanglan sa pag-ampo. Nganong lainlaing mga hinungdan ang gihatag sa lainlaing mga asoy sa Ebanghelyo?
Sa pagkatinuod, ang duha ka asoy maoy pangdugang, wala magsumpaki. Una, tan-awa ang Mateo 17:14-20. Usa ka tawo mitaho nga ang iyang anak lalaki maoy patolon ug ang mga tinun-an ni Jesus wala makaayo sa bayongbayong. Unya giayo ni Jesus ang batang lalaki pinaagi sa pagpagula sa usa ka demonyo nga nagsakit kaniya. Ang mga tinun-an nangutana kon nganong wala sila makapagula sa demonyo. Sumala sa asoy ni Mateo, si Jesus mitubag: “Tungod sa kagamay ninyog pagtuo. Kay sa pagkamatuod ako magaingon kaninyo, Kon aduna kamoy pagtuo nga ingon sa lugas sa mustasa ang gidak-on, ingnan ninyo kining bukira, ‘Balhin gikan dinhi paingon didto,’ ug kini mobalhin, ug walay bisan unsa nga maimposible alang kaninyo.”
Karon paklia ang Marcos 9:14-29, diin atong makaplagan ang mas daghang detalye. Pananglitan, ang Marcos 9:17 naghatag sa detalye nga niining kasoha ang matang-patolon nga mga atake gipahinabo sa usa ka daotang espiritu. Takos matikdang ang Bibliya nag-ingon sa laing dapit nga giayo ni Jesus ang patolon ug gidemonyohang mga tawo. (Mateo 4:24) Niining maong talagsaong kahimtang, ang mga atake gipahinabo sa usa ka “amang ug bungol nga espiritu,” nga maoy usa ka daotang espiritu, nga gipamatud-an sa mananambal nga si Lucas. (Lucas 9:39; Colosas 4:14) Matikdi sa Marcos 9:18 ang mga pulong, “Sa diha gani nga kini [ang demonyo] mohawid kaniya.” Busa ang batang lalaki dili ingon nga way-hunong nga gihasi sa demonyo, panagsa lang. Bisan pa niana, ang mga tinun-an dili makapagula sa demonyo ug sa ingon maayo ang batang lalaki. Sa dihang sila nangutana kon ngano, si Jesus mitubag: “Kining matanga dili ikapagula sa bisan unsa gawas pinaagi sa pag-ampo.”
Ang mabinantayong pagbasa sa asoy ni Marcos, hinuon, magpadayag nga walay panagsumpaki sa gitala ni Mateo. Sa Marcos 9:19, atong mabasa nga si Jesus nagmulo sa kawalay-pagtuo niadtong kaliwatana. Ug sa bersikulo 23, kini nahitala nga iyang giingnan ang amahan sa bata: “Ang tanang butang mahimo ngadto sa usa kon ang usa may pagtuo.” Busa si Marcos nagpasiugda usab sa kahinungdanon sa pagtuo. Hinuon sa bersikulo 29, gihatag ni Marcos ang dugang nga detalye. Gidugang ni Marcos ang gipamulong ni Jesus bahin sa pag-ampo, nga wala ilakip ni Mateo o ni Lucas.
Nan, unsay atong ikasulti? Sa ubang mga higayon ang 12 ka apostoles ug ang 70 ka tinun-an nagpagulag daotang mga espiritu. (Marcos 3:15; 6:13; Lucas 10:17) Apan niining higayona ang mga tinun-an wala makapagula sa demonyo. Ngano? Kon atong iponon ang mga detalyeng gihisgotan sa lainlaing mga asoy, atong ihinapos gayod nga sila dili andam mohimo niana niining kasoha. Tingali bahin sa suliran mao ang matang sa demonyong nalangkit, sanglit mopatim-awng ang mga demonyo tingali adunay magkalaing mga personalidad, intereses, ug mga katakos pa. Bahin niining maong demonyo, ang lig-on gayong pagtuo ug tim-os nga pag-ampo alang sa tabang sa Diyos gikinahanglan. Siyempre, nabatonan ni Jesus kanang pagtuoha. Siya gipaluyohan usab sa Tigpatalinghog sa pag-ampo, ang iyang Amahan. (Salmo 65:2) Dili lamang si Jesus makaayo sa gisakit nga batang lalaki pinaagi sa pagpagula sa demonyo kondili iyang gibuhat kana.