Kasagarang mga Hinungdan ba ang Gikamatyan ni Maria?

SUMALA sa mantalaan sa Batikano nga L’Osservatore Romano, ang Katolikong doktrina sa Pagsaka sa Langit nag-ingon: “Ang Birhen Imaculada, nga natipigang libre sa tanang mansa sa orihinal nga sala, gidala lawas ug kalag ngadto sa langitnong himaya, sa dihang natapos ang iyang yutan-ong kinabuhi.” Kining pagtulon-ana miagak sa pipila ka Katolikong teologo sa pag-angkon nga si Maria “wala mamatay ug gibanhaw dihadiha dayon gikan sa yutan-ong kinabuhi ngadto sa langitnong himaya,” matod sa mantalaan.a

Karong bag-o pa, si Papa Juan Paulo II nagpatin-aw niana sa lahing paagi. Sa Katibuk-ang Mamiminaw sa Batikano niadtong Hunyo 25, 1997, siya miingon: “Ang Bag-ong Testamento wala maghatag ug impormasyon bahin sa mga hitabo sa pagkamatay ni Maria. Ang maong kahilom motultol sa usa sa pagtuo nga kadto nahitabo sa kasagarang paagi, nga walay detalye nga angayng hisgotan. . . . Ang mga opinyon nga buot magpagawas kaniya gikan sa kamatayon gumikan sa kasagarang mga hinungdan maorag walay pasikaranan.”

Ang gipahayag ni Papa Juan Paulo nagpadayag ug seryosong depekto sa doktrina sa Imaculada Concepcion. Kon ang inahan ni Jesus “natipigang libre sa tanang mansa sa orihinal nga sala,” sa unsang paagi si Maria namatay gumikan sa “kasagarang mga hinungdan,” nga maoy resulta sa sala nga gipasa sa makasasalang si Adan? (Roma 5:12) Kining teolohikanhong gumonhap maoy tungod sa natuis nga pagtuo sa Iglesya Katolika bahin sa inahan ni Jesus. Dili katingad-an nga mitungha ang pagkabahin ug kalibog sulod sa Iglesya Katolika mahitungod niana.

Bisan pag ang Bibliya naghulagway kang Maria ingong mapaubsanon, matinuohon, ug mahinalaron, kanang mga hiyasa wala ipahinungod sa “imaculada concepcion.” (Lucas 1:​38; Buhat 1:​13, 14) Ang Bibliya yanong nag-ingon: “Ang tanan nakasala ug wala makaabot sa himaya sa Diyos.” (Roma 3:23) Oo, napanunod ni Maria ang sala ug pagkadili-hingpit sama ra sa uban sa katawhan, ug walay ebidensiya nga ang iyang gikamatyan dili kasagarang mga hinungdan.​—Itandi ang 1 Juan 1:​8-10.

[Mga footnote]