Sa Dihang ang Matig-ang mga Kasingkasing Mahimong Masanongon
SA 1989, ANG MGA SAKSI NI JEHOVA SA POLANDIA gihatagan ug legal nga pag-ila ingong usa ka relihiyosong organisasyon. Ang mga Saksi nga napriso tungod sa ilang Kristohanong neyutralidad anam-anam nga gibuhian, nga nagbilin diha sa prisohan ug daghang binilanggo nga buot makakat-on pag dugang bahin sa Bibliya gikan kanila. Aniay usa ka asoy kon sa unsang paagi diha sa usa ka prisohan, ang mga Saksi ni Jehova naningkamot sa pagtabang niadtong may mga kasingkasing nga kaniadto matig-a sa pagsanong sa gahom sa Pulong sa Diyos.
SA WOŁÓW, usa ka lungsod sa 12,000 sa habagatan-kasadpan sa Polandia, may usa ka 200-ka-tuig nga karsel diin ang pipila sa labing daotang mga kriminal sa Polandia gibilanggo. Sukad sa opisyal nga pag-ila sa ilang buluhaton, ang mga Saksi ni Jehova naningkamot sa pagdala sa maayong balita sa Gingharian ngadto sa mga binilanggo didto, ug ilang gihimo kini uban ang dakong kadasig.
Ang nakaandam sa dalan mao ang usa ka sulat nga giluwat sa Ministri sa Hustisya sa Pebrero 1990 ngadto sa tanang tagdumala sa prisohan sa Polandia. Ang sulat nagtambag nga dili nila angay “hatagan ug kalisod” ang bisan kinsang mga binilanggo nga buot modawat sa mga publikasyon sa Watch Tower o sa pagpakigtigom uban sa mga Saksi ni Jehova. Ang mga Saksi, ang pipila nakagugol ug daghang tuig sa prisohan sa Wołów, nakaila pag-ayo sa daghang gikaintapang mga priso didto. Apan, sila nagsalig kang Jehova nga panalanginan ang ilang mga paningkamot sa pagpahumok sa matig-ang mga kasingkasing sa ubang kaubang mga binilanggo pinaagi sa kamatuoran sa Bibliya.
Nangandam Aron Masugdan ang Buluhaton
“Lisod ang pagpasugod sa programa,” matod pa ni Brader Czesław gikan sa siyudad sa Wrocław, mga 40 ka kilometros ang gilay-on, nga may awtorisasyon sa pagduaw sa prisohan sa Wołów. “Mikabat ang daghang hataas kaayong panahong panaghisgot uban sa mga opisyales sa prisohan sa pagkombinsir kanila nga ang among ‘relihiyosong mga serbisyo’ makahatag ug kaayohan sa mga binilanggo.”
Ang nakahatag pag dugang kalisod, nahinumdom ang kauban ni Czesław nga si Paweł, “mao ang pag-insistir sa usa ka dakog-ranggong opisyal nga gigamit lamang sa mga priso ang relihiyosong mga serbisyo ingong pasumangil alang sa materyal nga mga ganansiya.” Apan sa dihang ang tulo ka makuyawng mga kriminal mipresentar sa ilang kaugalingon alang sa bawtismo sa 1991, nausab ang tinamdan sa mga awtoridad sa prisohan, ug ang kooperasyon miuswag.
“Kami nagsugod pinaagi sa pagsangyaw ngadto sa mga priso, sa ilang mga pamilya nga miduaw kanila sa prisohan, maingon man sa mga empleyado sa karsel,” miingon si Czesław. “Dayon gitugotan kami sa pagsangyaw sa maayong balita gikan sa selda ngadto sa selda, nga usa ka talagsaon kaayong eksepsiyon. Sa kataposan, sa nakita namo ang unang mga interesado, gitugotan kami sa paggamit sa gamayng lugar nga pagadumalahan sa mga pagtuon sa Bibliya ug sa paghimo sa Kristohanong mga tigom.” Oo, gibuksan ni Jehova ang dalan alang sa mga matig-a ug mga kasingkasing nga mga binilanggo.
Epektibong Edukasyonal nga Programa
Kanang gamayng lugar nakitang gamay na kaayo. Sanglit ang bawtismadong mga binilanggo ug mga igsoon nga gikan sa gawas miduyog sa buluhatong pagsangyaw, ingon ka daghan sa 50 ka priso ang nagsugod sa pagtambong sa mga tigom. “Kapin sa tulo ka tuig, among gihimo ang tanang tigom didto, ug ang mga binilanggo nagtambong sa senemanang mga tigom sa regular,” miingon ang usa sa lokal nga mga ansiyano. Busa sa Mayo 1995 sila gihatagan ug mas dakodako nga lugar.
Sa unsang paagi mahibaloan sa may-kaakohang mga igsoon kon kinsay makatambong sa mga tigom nga ginahimo sa prisohan? “Kami adunay listahan sa mga binilanggo nga nagpakitag tim-os nga kaikag sa kamatuoran,” nagpatin-aw sila si Brader Czesław ug Zdzisław. “Kon ang usa ka priso walay pag-uswag o magsigeg palta sa mga tigom nga walay maayong katarongan, sa ingon nagpakitag pagkawalay-apresasyon sa maong mga tagana, among papason ang iyang ngalan gikan sa listahan ug pahibaloon ang tagdumala sa prisohan.”
Sa panahon sa ilang mga pagtuon sa Bibliya, tudloan usab sa mga igsoon ang mga binilanggo kon unsaon sa pag-andam ug maayo alang sa mga tigom ug kon unsaon sa paggamit sa atong literatura sa epektibong paagi. Busa, sa dihang ang mga priso motambong sa mga tigom, sila nakapangandam nag maayo ug sila madayganong nakigbahin. Sila naghatag ug makapalig-ong mga komento, naggamit sa ilang mga Bibliya sa hanas nga paagi, ug nagpadapat sa tambag sa ilang kaugalingon, nga sagad naglakip sa ilang mga komentong obserbasyon sama sa, ‘Nasabtan ko nga kinahanglang himoon ko kini o kana.’
“Tanantanan, 20 ka pagtuon sa Bibliya ang ginadumala sa prisohan sa Wołów. Walo kanila gidumala sa tulo ka binilanggong mga magmamantala,” nag-ingon ang sekretaryo sa kongregasyon. Sila may maayong mga resulta usab samtang nagsangyaw gikan sa selda ngadto sa selda ug sa panahon nga sila naglakawlakaw sulod sa luna sa prisohan. Pananglitan, sa napulo ka bulan, gikan sa Septiyembre 1993 ngadto sa Hunyo 1994, sila nakaapod-apod ug 235 ka libro, halos 300 ka brosyur, ug 1,700 ka magasin. Dili pa dugay, duha sa mga opisyal sa prisohan naghangyo ug mga pagtuon sa Bibliya.
Nakahatag ug Kalipay ang Linaing mga Asembliya
Sa ulahi, laing bahin ang gidugang sa edukasyonal nga programa nianang maong prisohan, nga mao, linaing mga asembliya. Ihatag sa nagapanawng mga magtatan-aw ug ubang kuwalipikadong mga igsoon diha sa gym sa prisohan ang pangunang mga bahin sa mga programa sa sirkitong asembliya ug sa usa-ka-adlawng espesyal nga asembliya. Ang unang linaing asembliya gihimo sa Oktubre 1993. Kalim-an ka priso ang mitambong, ug “tibuok pamilya, lakip sa mga babaye ug gagmayng kabataan, miabot gikan sa Wrocław,” nagtaho ang mantalaang Słowo Polskie, nga may bug-os nga tumatambong nga 139. Ang intermisyon sa programa sa asembliya nakahatag ug higayon alang sa pagpangaon nga giandam sa mga igsoong babaye, maingon man panahon alang sa maayong Kristohanong panag-ubanay.
Laing pito ka linaing mga asembliya ang nahimo sukad niadto, ug ang mga kaayohan nakaabot dili lamang ngadto niadtong anaa sa prisohan kondili usab ngadto niadtong sa gawas. Sa dihang miduaw ang usa ka igsoong babayeng Saksi sa binilanggo kaniadto sa Wołów nga karon nagpuyo na sa lungsod, siya negatibo sa sinugdanan. Apan sa dihang siya gisultihan nga usa ka binilanggo nahimong Saksi, ang tawo misulti nga wala-makatuo: “Saksi na karon kana nga mamumuno?” Tungod niini, midawat ang lalaki sa pagtuon sa Bibliya.
Katingalahang Kausaban Nahimo
Kini bang dakong edukasyonal nga programa tinuod nga nakapahumok sa matig-ang mga kasingkasing sa mga binilanggo? Paasoya sila sa ilang mga sugilanon.
“Wala gayod ako makaila sa akong mga ginikanan tungod kay giabandonar nila ako sa gamay pa ako, ug wala gayod ako makaagi sa pagbati nga gihigugma,” miangkon si Zdzisław, usa ka tawong mahinuktokon. “Sayo sa akong kinabuhi, nalangkit ako sa krimen, nga sa ulahi nakapatay. Ang pagbating sad-an nagtukmod kanako sa paghunahuna sa paghikog, ug nagpangita gayod ako ug tinuod nga paglaom. Dayon, sa 1987, nakakita ako ug magasing Bantayanang Torre. Gikan niana nakat-onan ko ang paglaom sa pagkabanhaw ug kinabuhing walay kataposan. Nakaamgo nga aduna pa gihapoy paglaom, giwala ko ang ideya sa paghikog ug nagsugod sa pagtuon sa Bibliya. Karon nakat-onan ko na ang kahulogan sa gugma nga gikan kang Jehova ug gikan sa mga igsoon.” Sukad sa 1993, kining mamumuno kanhi maoy usa ka ministeryal nga alagad ug oksilyare payunir, ug sa miaging tuig nahimo siyang regular payunir.
Si Tomasz, sa laing bahin, midawat dayon sa pagtuon sa Bibliya. “Hinunoa, kadto dili usa ka tim-os nga lakang,” siya miadmitir. “Nagtuon lamang ako tungod kay gusto nakong magpagarbo sa dihang magpatin-aw sa mga pagtulon-an sa mga Saksi ni Jehova ngadto sa uban. Apan wala ako kaayoy gihimo bahin sa kamatuoran sa Bibliya. Usa ka adlaw, nausab ang akong hunahuna ug mitambong sa Kristohanong tigom. Mainitong giabiabi ako sa bawtismadong mga binilanggo. Akong naamgohan nga imbes magpagarbo sa kahibalo, kinahanglang pahumokon ko ang akong matig-ang kasingkasing ug bag-ohon ang akong hunahuna.” Si Tomasz nagsugod sa pagsul-ob sa bag-ong Kristohanong personalidad. (Efeso 4:22-24) Karong adlawa, siya maoy usa na ka dedikado, bawtismadong Saksi ug malipayon sa pagsangyaw gikan sa selda ngadto sa selda.
Pagpamit-os sa mga Higala Kanhi
Kadtong nakakat-on sa kamatuoran sa Bibliya diha sa prisohan gipit-os gayod sa kanhing mga higala diha sa selda ug sa mga opisyales sa prisohan. Ang usa kanila nahinumdom: “Ako kanunayng biaybiayon ug bugalbugalan. Apan gibutang ko sa hunahuna ang makapadasig nga mga pulong sa mga igsoon. ‘Pag-ampo kanunay kang Jehova,’ gisultihan nila ako. ‘Basaha ang imong Bibliya ug bation mo ang kalinaw sa kahiladman.’ Kana nakatabang gayod.”
“Ang akong kaubang mga binilanggo walay lipudlipod sa ilang masakit nga mga pulong batok kanako,” miingon si Ryszard, usa ka dakog-lawas nga igsoon. “Makatambong ka sa imong mga tigom, apan ayaw pagpahawodhawod ug pagpakaaron-ingnon nga mas maayo ka, OK?’ ila akong gipasidan-an. Sa dihang naghimo ako ug mga kausaban sa akong kinabuhi tungod sa pagpadapat sa mga prinsipyo sa Bibliya, nag-antos ako alang niana. Ilang gibalintuwad ang akong katre, gipangpasad ang akong literatura sa Bibliya, ug gigubot ang akong bahin sa selda. Nag-ampo ako kang Jehova ug kalig-on nga makakontrolar ako sa kaugalingon ug dayon hilom nga nanghipos sa mga butang. Ngadtongadto, ang mga atake mihunong.”
“Sa makita sa kaubang mga binilanggo nga kami nakahimo na ug malig-ong desisyon sa pag-alagad kang Jehova,” nag-asoy ang uban pang bawtismadong mga binilanggo, “ang pagpamit-os gihimo sa laing matang. Sila lagmit moingon, ‘Hinumdomi, dili ka na angay moinom, manabako, o mamakak.’ Kanang matanga sa pagpamit-os makatabang sa usa sa pagkontrolar sa lawas, sa pagwagtang dayon sa tanang bisyo o mga pagkagiyan. Kini makatabang usab sa usa sa pag-ugmad sa mga bunga sa espiritu.”—Galacia 5:22, 23.
Nahimong Dedikadong mga Alagad sa Diyos
May permiso sa mga awtoridad sa bilanggoan, ang unang bawtismo gihimo diha sa gym sa tingpamulak sa 1991. Si Zdzisław mao ang malipayong kandidato. Napulog-duha ka priso ang mitambong, ug 21 ka igsoong mga lalaki ug babaye gikan sa gawas miabot alang sa okasyon. Ang tigom may makapadasig nga epekto sa mga binilanggo. Daghan kanila mihimog talagsaong pag-uswag nga laing duha pa ka priso ang gibawtismohan sa ulahi niadtong tuiga. Sa milabay ang duha ka tuig, sa 1993, ang mga bawtismo gihimo makaduha, ug pito pa ka priso ang nagpasimbolo sa ilang dedikasyon ngadto kang Jehova!
Nagtaho bahin sa bawtismo nga gihimo sa Disyembre, ang lokal nga mantalaan, nga Wieczór Wrocławia, nag-ingon: “Ang mga tawo mipaingon ngadto sa dakong hawan sa gym, gipangomosta ang tanan ug naglamanohay kanila. Walay estranghero didto. Sila nagsilbing usa ka dakong pamilya, nga nahiusa sa panghunahuna, sa ilang paagi sa kinabuhi, ug sa pag-alagad sa usa ka Diyos, si Jehova.” Kadtong “usa ka dakong pamilya” gilangkoban niadtong panahona ug 135 ka tawo, lakip sa 50 ka priso. Atong himamaton ang pipila kanila.
Si Jerzy, nga nabawtismohan sa Hunyo, miasoy: “Bisan pag nakontak na ako sa pila ka higayon sa kamatuoran sa Bibliya sa mga katuigang milabay, ang ania kanako mao ang usa ka matig-a nga kasingkasing. Panglimbong, pagdiborsiyo sa akong unang asawa, supak sa balaod nga relasyon uban kang Krystyna, may anak sa gawas, ug balikbalik pagsulod sa bilanggoan—ingon niana ang akong kinabuhi.” Nakakita kon giunsa sa ubang gikaintapang mga kriminal sa pagkahimong mga Saksi samtang nabilanggo, siya nagsugod sa pagpangutana sa iyang kaugalingon, ‘Dili ba ako mahimong mas maayong tawo usab?’ Siya mihangyo ug pagtuon sa Bibliya ug nagsugod sa pagtambong sa mga tigom. Apan, ang tinuod nga dakong kausaban miabot sa dihang iyang nahibaloan gikan sa abogado nga si Krystyna nahimong usa sa mga Saksi ni Jehova tulo ka tuig kanhi. “Nakurat gayod ako pag-ayo!” miingon si Jerzy. “Naghunahuna ako, ‘Ako diay? Unsa bay akong ginahimo?’ Akong naamgohan nga aron kahimut-an ni Jehova, kinahanglang husayon ko ang akong kinabuhi.” Tungod niini, usa ka malipayong pagbalikay nahitabo diha sa prisohan—uban kang Krystyna ug sa ilang 11-anyos nga anak nga babaye, si Marzena. Wala magdugay, ilang gihimong legal ang ilang kaminyoon. Bisan tuod anaa gihapon sa prisohan ug dunay malipayon ug masulob-ong mga kasinatian, di pa dugay si Jerzy nagtuon ug senyas nga pinulongan ug nakaarang sa pagtabang sa mga priso nga bungol.
Si Mirosław nalangkit na sa kriminal nga mga buhat samtang diha pa siya sa tunghaang primarya. Nakadayeg kaayo siya sa gihimo sa iyang mga higala, ug wala magdugay gisunod niya ang ilang gibuhat. Daghan ang iyang nakawatan ug nakulatahan. Dayon nabanlod siya sa prisohan. “Sa nakaplagan ko ang akong kaugalingon nga nabilanggo, midangop ako sa pari sa pagpangayog tabang,” mitug-an si Mirosław. “Apan nahigawad gayod ako pag-ayo. Busa mihukom ako nga maghikog pinaagi sa pag-inom ug hilo.” Nianang mismong adlaw nga siya nagplano sa paghunos sa iyang kinabuhi, siya gibalhin ngadto sa laing selda. Didto nakakita siya ug usa ka kopya sa Ang Bantayanang Torre nga naghisgot bahin sa katuyoan sa kinabuhi. “Ang yano ug tin-awng impormasyon napamatud-ang mao gayod ang akong gikinahanglan,” siya midugang. “Karon buot kong mabuhi! Busa miampo ako kang Jehova ug mihangyo sa mga Saksi ug pagtuon sa Bibliya.” Siya nakahimog kusog nga pag-uswag sa iyang pagtuon sa Bibliya ug gibawtismohan sa 1991. Karon siya nag-alagad ingong oksilyare payunir sa prisohan, nga nakabaton sa pribilehiyo sa pagsangyaw gikan sa selda ngadto sa selda.
Adunay total nga 15 ka binilanggo ang nabawtismohan sa pagkakaron. Ang ilang tingob nga mga sentensiya mokabat ug halos 260 ka tuig. Ang uban gibuhian na una pa nakatapos sa ilang mga sentensiya. Napaubsan sa usa ka binilanggo ang iyang 25-ka-tuig nga sentensiya sa 10 ka tuig. Ug daghan nga nagpakitag interes samtang napriso pa nangahimong bawtismadong mga Saksi human gibuhian. Dugang pa, dunay upat ka binilanggo sa prisohan nga nangandam alang sa bawtismo.
Pag-ila sa mga Awtoridad sa Bilanggoan
“Ang kausaban sa tinamdan sa mga priso mamatikdan gayod,” nag-ingon ang usa ka taho sa prisohan. “Daghan miundang sa pagpanabako, ug ilang gimentinar nga mahinlo ang ilang mga selda. Ang maong mga kausaban sa panggawi makita diha sa daghang priso.”
Ang mantalaang Życie Warszawy nagtaho nga ang magdudumala sa karsel sa Wołów miadmitir nga “ang mga kinabig disiplinado; dili sila problema sa mga guwardiya sa prisohan.” Ang artikulo dugang miingon nga kadtong gibuhian una pa nakatapos sa ilang mga sentensiya maayo na kaayong pagkalangkob ngadto sa pundok sa mga Saksi ni Jehova ug dili mobalik sa dalan sa krimen.
Ug unsay opinyon sa tagdumala sa bilanggoan? “Ang buluhaton sa mga Saksi ni Jehova niini nga karsel maayo kaayo ug makatabang,” matod pa niya. Ang tagdumala miila nga “sa panahon sa ilang pagtuon sa Bibliya [uban sa mga Saksi], ang mga prinsipyo ug mga sukdanan sa mga priso nabag-o, nga naghatag kanila ug usa ka bag-ong puwersa nga nagagiya sa ilang mga kinabuhi. Ang ilang panggawi mataktikanhon ug matinahuron kaayo. Sila kugihang mga trabahador, nga halos walay problemang ipahinabo.” Ang maong paborableng mga komento sa mga awtoridad maoy, sa pagkamatuod, makapalipay sa mga Saksi nga nagsangyaw uban sa mga binilanggo diha sa prisohan sa Wołów.
Ang nagaduaw nga mga Saksi bug-os nagpabili sa mga pulong ni Jesus: ‘Ako nakaila sa akong mga karnero ug ang akong mga karnero nakaila kanako. . . . Sila mamati sa akong tingog, ug sila mahimong usa ka panon, usa ka magbalantay.’ (Juan 10:14, 16) Bisan ang mga paril sa bilanggoan dili makapugong sa Maayong Magbalantay, si Jesu-Kristo, sa pagtigom sa mga karnerohon. Ang mga Saksi sa Wołów mapasalamaton nga sila nakapribilehiyo sa pagpaambit niining malipayong pag-alagad. Ug sila naglantaw kang Jehova alang sa iyang padayong panalangin sa pagtabang sa daghan pang matig-ang mga kasingkasing sa pagsanong sa maayong balita sa Gingharian sa dili pa moabot ang kataposan.—Mateo 24:14.
[Kahon sa panid 27]
Binata nga problema sa hamtong
“Human mabilanggo sa dugaydugayng panahon, ang priso sagad mawad-an sa pagbati kon unsay kahulogan sa pagkinabuhi nga may kagawasan, o magkinaugalingon,” nag-ingon ang mga Saksi nga tigsangyaw sa karsel sa Wołów. “Kami adunay binata nga problema sa hamtong, usa ka tawo nga inigkagawas sa bilanggoan dili mahibalo kon unsaon sa pag-atiman sa iyang kaugalingon. Maoy hinungdan nga ang papel sa kongregasyon maoy labaw pa kay sa pagtudlo lamang kaniya sa kamatuoran sa Bibliya. Kinahanglang andamon namo siya nga mahimong bahin sa komunidad, pasidan-an siya sa bag-ong mga kapeligrohan ug mga tentasyon nga hayan iyang maatubang. Bisag maampingon nga dili ra sobra kaayo ka mapanalipdanon, kinahanglang tabangan namo siya sa paghimog bag-ong pagsugod sa kinabuhi.”