Padayong Panlimbasogi ang Inyong Kaugalingong Kaluwasan!
“Mga hinigugma, . . . padayong panlimbasogi ang inyong kaugalingong kaluwasan uban ang kahadlok ug pagpangurog.”—FILIPOS 2:12.
1, 2. Unsang popular nga mga ideya ang nagtultol sa daghang tawo nga mobating wala silay kontrol sa kon unsay dangatan sa ilang kinabuhi?
“NATAWO ka ba nga ingon niana?” Di pa dugay, kanang pangutanaha gipatik diha sa hapin sa usa ka popular nga magasin. Ubos sa ulohang balita makita ang mga pulong: “Pagkatawo, taras, bisan mga pagpili sa kinabuhi. Ang bag-ong mga pagtuon nagpakita nga kadaghanan niini napanunod.” Ang maong mga pangangkon mahimong magpahinabo sa pipila nga mobating wala kaayo silay kontrol sa ilang kaugalingong kinabuhi.
2 Ang uban nahadlok nga ang dili maayong pagkaginikanan sa ilang mga ginikanan o dili maayong pagpanudlo sa ilang mga magtutudlo sa usa ka paagi o sa lain nagsentensiya kanila ngadto sa usa ka masulub-ong kinabuhi. Mobati tingali sila nga gitino nang daan nga mosubli sa mga sayop sa ilang mga ginikanan, nga molihok sumala sa ilang kinangil-arang kinaiyanhong mga kiling, nga dili-magmatinumanon kang Jehova—sa mubo, nga mohimog dili-maayong mga pagpili. Mao ba kanay gitudlo sa Bibliya? Segurado, dunay mga relihiyonista nga moinsistir nga ang Bibliya nagtudlo ug ingon niini, ang doktrina sa predestinasyon. Sumala niining doktrinaha, dugay nang gimbut-an sa Diyos ang matag hitabo sa imong kinabuhi.
3. Unsang makapadasig nga mensahe ang anaa sa Bibliya bahin sa atong katakos nga manubag sa atong umaabot?
3 Kining tanang nagkalainlaing mga ideya pareho ug mensahe: Wala ka kaayoy kapilian, wala kaayoy kontrol kon unsay dangatan sa imong kinabuhi. Makapaluya kana nga mensahe, dili ba, ug ang pagkaluya makadugang sa suliran. Ang Proverbio 24:10 nag-ingon: “Ikaw ba nagpakita nga naluya sa adlaw sa kasakitan? Ang imong kusog diyutay ra.” Apan, gidasig kita sa pagkahibalo nga sumala sa Bibliya, kita ‘makapanlimbasog sa atong kaugalingong kaluwasan.’ (Filipos 2:12) Unsaon nato pagpalig-on ang atong pagsalig niining positibong Kasulatanhong pagtulon-an?
Buluhaton nga “Pagtukod” nga Himoon Nato sa Atong Kaugalingon
4. Bisan tuod ang 1 Corinto 3:10-15 naghisgot bahin sa pagtukod ginamit ang dili-masunog nga materyales, unsay wala ipasabot niini?
4 Tagda ang ilustrasyon ni apostol Pablo nga makaplagan sa 1 Corinto 3:10-15. Didto, naghisgot siya sa Kristohanong buluhaton nga pagtukod, ug ang prinsipyo sa iyang ilustrasyon ikapadapat sa pangsulod ug panggawas nga ministeryo. Gipasabot ba niya nga kon kaha ang usa ka tinun-an sa kataposan mopili sa pag-alagad kang Jehova ug magpabiling matinumanon maoy bug-os nga responsibilidad niadtong nagtudlo ug nagbansay kaniya? Wala. Gipasiugda ni Pablo ang kahinungdanon sa paghimo sa magtutudlo sa kinamaayohang buluhaton nga pagtukod nga maarangan. Apan sumala sa atong nakat-onan sa nag-unang artikulo, wala siya mag-ingon nga ang estudyante o tinun-an walay kapilian niining bahina. Tinuod, ang ilustrasyon ni Pablo nasentro diha sa buluhaton nga atong himoon diha sa uban, dili ang pagpalig-on sa atong kaugalingon. Dayag kini tungod kay miingon si Pablo nga ang linamolamo nga buluhaton nga pagtukod malaglag samtang ang magtutukod mismo maluwas. Bisan pa niana, ang Bibliya usahay nagpadapat sa mao gihapong pasumbingay ngadto sa buluhaton nga atong gihimo diha sa atong kaugalingon.
5. Unsang Kasulatan ang nagpakita nga ang mga Kristohanon kinahanglang mohimog buluhaton nga “pagtukod” diha sa ilang kaugalingon?
5 Tagda, pananglitan, ang Judas 20, 21: “Kamo, mga hinigugma, pinaagi sa pagpalig-on sa inyong kaugalingon diha sa inyong labing balaan nga pagtuo, ug sa pag-ampo uban sa balaang espiritu, ipabilin ang inyong kaugalingon diha sa gugma sa Diyos.” Dinhi si Judas naggamit sa mao gihapong Gregong pulong alang sa “pagtukod” nga gigamit ni Pablo sa 1 Corinto kapitulo 3, apan ang iyang punto morag kita magtukod sa atong kaugalingon diha sa patukoranan sa atong pagtuo. Si Lucas, sa pagsulat sa ilustrasyon ni Jesus bahin sa tawo nga nagpahiluna sa patukoranan sa iyang balay ibabaw sa usa ka dakong bato, naggamit sa mao gihapong Gregong pulong alang sa “patukoranan” nga gigamit ni Pablo sa iyang ilustrasyon sa Kristohanong pagtukod. (Lucas 6:48, 49) Dugang pa, gigamit ni Pablo ang hulagway sa pagkatukod diha sa usa ka “patukoranan” sa dihang nagtambag sa iyang kaubang mga Kristohanon sa paghimog espirituwal nga pag-uswag. Oo, ang Pulong sa Diyos nagtudlo nga himoon nato ang buluhaton nga “pagtukod” diha sa atong kaugalingon.—Efeso 3:15-19; Colosas 1:23; 2:7.
6. (a) Iilustrar kon sa unsang paagi ang matag Kristohanong tinun-an maoy resulta sa hiniusang proyekto sa pagtukod. (b) Unsang responsibilidad ang nabatonan sa matag indibiduwal nga tinun-an?
6 Ang pagpalig-on ba sa usa nga Kristohanon trabaho sa usa ka tawo? Aw, handurawa nga mihukom ka sa pagtukod ug usa ka balay. Moadto ka sa usa ka arkitekto alang sa mga plano. Bisan tuod buot nimong mangunay pagbuhat ug dakong bahin sa trabahoon, magsuhol ka ug kontraktor aron motrabaho uban nimo ug sa pagpahibalo nimo bahin sa kinamaayohang mga pamaagi. Kon magpahiluna siya ug lig-ong patukoranan, motabang nimo sa pagsabot sa mga plano, mosugyot sa kinamaayohang materyales nga paliton, ug motudlo pa gani nimo ug daghan bahin sa pagtukod, lagmit mouyon ka nga nahimo niya ang maayong trabaho. Apan komosta kon dili nimo panumbalingon ang iyang tambag, mopalit ug baratohon o barot nga materyales, ug motipas pa gani gikan sa mga plano sa arkitekto? Seguradong dili nimo mabasol ang kontraktor o ang arkitekto kon mahugno ang balay! Sa susama, ang matag Kristohanong tinun-an maoy resulta sa hiniusang proyekto nga pagtukod. Si Jehova mao ang batid nga arkitekto. Iyang gipaluyohan ang matinumanong Kristohanon kinsa, ingong usa sa “mga isigkamagbubuhat sa Diyos,” nagatudlo ug nagapalig-on sa usa ka estudyante. (1 Corinto 3:9) Bisan pa niana nalangkit usab ang estudyante. Sa kataposang pagtulotimbang, siyay responsable sa iyang kaugalingong dalan sa kinabuhi. (Roma 14:12) Kon buot niyang makabaton ug maayong Kristohanong mga hiyas, kinahanglang maghago siya aron mabatonan kana, sa pagtukod niana diha kaniya.—2 Pedro 1:5-8.
7. Unsang mga suliran ang giatubang sa pipila ka Kristohanon, ug unsay mahimong maghupay kanila?
7 Nan, nagpasabot ba kini nga ang kaliwat, palibot, ug ang kalidad sa atong mga magtutudlo dili-hinungdanon? Dili gayod. Ang Pulong sa Diyos nag-ila sa matag usa niini nga hinungdanon ug dunay impluwensiya. Daghang masalaypon, negatibong mga kiling ang dala sa pagkatawo ug lisod kaayong pakigbisogan. (Salmo 51:5; Roma 5:12; 7:21-23) Ang ginikananong pagbansay ug ang panimalaynong palibot mahimong dunay dakong impluwensiya diha sa mga batan-on—maayo o daotan. (Proverbio 22:6; Colosas 3:21) Gisaway ni Jesus ang Hudiyong relihiyosong mga lider tungod sa daotang mga epekto sa ilang pagpanudlo ngadto sa uban. (Mateo 23:13, 15) Karon, ang maong mga hinungdan nagaapektar kanatong tanan. Pananglitan, ang ubang katawhan sa Diyos nag-atubang ug mga suliran ingong resulta sa kalisdanan sa bata pa. Sila nagkinahanglan sa atong kalulot ug empatiya. Ug sila makabatog kahupayan gikan sa mensahe sa Bibliya nga wala tinoang daan nga sila mosubli sa mga sayop sa ilang mga ginikanan o dili-magmatinumanon. Tagda kon sa unsang paagi ang pipila ka hari sa karaang Juda nag-ilustrar niining puntoha.
Mga Hari sa Juda—Mihimo Sila sa Ilang Kaugalingong Pagpili
8. Unsang dili-maayong panig-ingnan ang nabatonan ni Jotam sa iyang amahan, apan unsang pagpili ang iyang gihimo?
8 Si Uzzias nahimong hari sa Juda sa linghod nga panuigong 16 ug naghari sulod sa 52 ka tuig. Sa dakong bahin niining panahona, siya “nagpadayon sa pagbuhat kon unsay matarong sa mga mata ni Jehova, sumala sa tanan nga gibuhat ni Amasias nga iyang amahan.” (2 Hari 15:3) Gipanalanginan siya ni Jehova ug sunodsunod nga makapahinganghang militaryong mga kadaogan. Apan, ikasubo, ang kalamposan naghimo kang Uzzias nga garboso. Nahimo siyang mapahitas-on ug mirebelde batok kang Jehova pinaagi sa paghalad ug insenso diha sa halaran sa templo, usa ka katungdanan nga alang lamang sa mga saserdote. Si Uzzias gibadlong apan nasuko hinuon. Unya gipakaulawan siya—gihampak sa sanla ug napugos sa pagkinabuhi sa nahibiling mga adlaw sa iyang kinabuhi nga gilain. (2 Cronicas 26:16-23) Sa unsang paagi misanong ang iyang anak nga si Jotam niining tanan? Ang batan-ong lalaki mahimong daling maimpluwensiyahan sa iyang amahan ug mayugot sa pagbadlong ni Jehova. Ang katawhan sa katibuk-an lagmit dunay negatibong impluwensiya sanglit nagpadayon sila pagbuhat sa sayop nga relihiyosong mga tulumanon. (2 Hari 15:4) Apan si Jotam mihimo sa iyang kaugalingong pagpili. “Nagpadayon siya sa pagbuhat kon unsay matarong sa mga mata ni Jehova.”—2 Cronicas 27:2.
9. Unsa ang pipila ka maayong mga impluwensiya diha kang Ahaz, apan unsay gidangatan sa iyang kinabuhi?
9 Si Jotam naghari sulod sa 16 ka tuig, nga nagpabiling matinumanon kang Jehova latas nianang panahona. Busa, ang iyang anak nga si Ahaz dunay ekselenteng panig-ingnan sa usa ka matinumanong amahan. Ug si Ahaz dunay ubang maayong mga impluwensiya. Gipanalanginan siya nga magkinabuhi sa dihang ang matinumanong mga manalagna nga si Isaias, Oseas, ug Miqueas aktibong nanagpanagna sa maong nasod. Bisan pa niana, mihimo siya sa sayop nga pagpili. “Wala niya buhata kon unsay matarong sa mga mata ni Jehova sama kang David nga iyang katigulangan.” Naghimo siyag mga imahen ni Baal ug nagsimba niana ug nagsunog pa gani sa pipila niya ka anak nga lalaki diha sa kalayo nga gihalad ngadto sa paganong mga diyos. Bisan pa sa kinamaayohang mga impluwensiya, makatalagmanon ang iyang kapakyasan ingong hari ug alagad ni Jehova.—2 Cronicas 28:1-4.
10. Unsang matanga sa amahan si Ahaz, apan unsang pagpili ang gihimo sa iyang anak nga si Ezekias?
10 Gikan sa punto de bista sa putling pagsimba, lisod handurawon ang usa ka amahan nga labi pa ka daotan kang Ahaz. Bisan pa niana, ang iyang anak nga si Ezekias dili makapili kon kinsay mahimo niyang amahan! Ang batan-ong mga anak nga lalaki nga gipamatay ni Ahaz agig halad ngadto kang Baal lagmit maoy mga igsoon ni Ezekias. Kini bang ngilngig nga kaagi nagtinong daan nga si Ezekias dili-magmatinumanon kang Jehova? Sa kasukwahi, si Ezekias nahimong usa sa diyutayng tinuod nga bantogang mga hari sa Juda—usa ka matinumanon, maalamon, ug gimahal nga tawo. “Si Jehova nagauban kaniya.” (2 Hari 18:3-7) Sa pagkatinuod, dunay katarongan sa pagtuo nga sa batan-on pang prinsipe, si Ezekias mao ang inspiradong magsusulat sa ika-119ng Salmo. Kon mao, dili lisod ang pagsabot kon nganong nakasulat siya sa mga pulong: “Ang akong kalag wala makatulog tungod sa kasubo.” (Salmo 119:28) Bisan pa sa iyang makapasubong mga suliran, si Ezekias nagtugot sa Pulong ni Jehova nga mogiya kaniya sa kinabuhi. Ang Salmo 119:105 nag-ingon: “Ang imong pulong maoy lampara sa akong tiil, ug kahayag sa akong alagianan.” Oo, si Ezekias mihimo sa iyang kaugalingong pagpili—ang hustong pagpili.
11. (a) Bisan pa sa maayong impluwensiya sa iyang amahan, unsa ka grabe ang pagrebelde ni Manases kang Jehova? (b) Unsang pagpili ang gihimo ni Manases sa hinapos sa iyang kinabuhi, ug unsay mahimong makat-onan nato gikan niini?
11 Apan, sa kabalit-aran, gikan sa usa sa kinamaayohang mga hari sa Juda migula ang usa sa kinangil-aran. Ang anak ni Ezekias nga si Manases nagpalambo sa idolatriya, espiritismo, ug pinakyawng kapintasan sa wala hitupnging gilapdon. Ang talaan nag-ingon nga “si Jehova nagpadayon sa pagsulti kang Manases ug sa iyang katawhan,” lagmit pinaagi sa mga manalagna. (2 Cronicas 33:10) Sumala sa Hudiyonhong tradisyon si Manases misanong pinaagi sa pagpagabas kang Isaias. (Itandi ang Hebreohanon 11:37.) Tinuod man kana o dili, si Manases wala magpatalinghog sa bisan unsang pasidaan gikan sa Diyos. Sa pagkatinuod, gipanunog niya ang pipila sa iyang mga anak nga buhi ingong mga halad, sama gayod sa gibuhat sa iyang apohan nga si Ahaz. Bisan pa niana, kining daotang tawo, atubangan sa grabeng mga pagsulay sa ulahing bahin sa kinabuhi, naghinulsol ug nag-usab sa iyang mga gawi. (2 Cronicas 33:1-6, 11-20) Ang iyang panig-ingnan nagtudlo kanato nga ang usa ka tawo nga nakahimog ngil-ad nga mga pagpili dili kanunayng dili na matul-id. Mahimo siyang mag-usab.
12. Unsang magkaatbang nga mga pagpili ang gihimo ni Amon ug sa iyang anak nga si Josias maylabot sa pag-alagad kang Jehova?
12 Ang anak ni Manases nga si Amon mahimong makakat-on ug dako gikan sa paghinulsol sa iyang amahan. Apan mihimo siya sa sayop nga mga pagpili. Sa pagkatinuod si Amon “nagpauswag sa pagkamakasasala” hangtod nga sa kataposan siya gipatay. Ang iyang anak nga si Josias maoy makapalipayng kaatbang. Si Josias dayag nga mipili sa pagkat-on gikan sa nahitabo sa iyang apohang lalaki. Nagsugod siya sa pagmando sa otso anyos pa lamang. Sa dihang siya 16 anyos lang, nagsugod siya sa pagpangita kang Jehova ug human niana nahimong sulondan, matinumanong hari. (2 Cronicas 33:20–34:5) Mihimo siyag pagpili—ang hustong pagpili.
13. (a) Unsay atong makat-onan gikan sa mga hari sa Juda nga atong gikonsiderar? (b) Unsa ka hinungdanon ang ginikananong pagbansay?
13 Kining mubong pagsusi sa pito ka hari sa Judea nagtudlo ug gamhanang leksiyon. Sa pipila ka kahimtang, ang labing daotang mga hari nakabaton ug kinamaayohang mga anak ug, sa baylo, ang kinamaayohang mga hari nakabaton ug labing daotang mga anak. (Itandi ang Ecclesiastes 2:18-21.) Wala kini magpamenos sa kahinungdanon sa ginikananong pagbansay. Ang mga ginikanan nga nagbansay sa ilang mga anak sumala sa dalan ni Jehova tinong naghatag sa ilang anak sa kinamaayohang posibleng kahigayonan nga mahimong matinumanong mga alagad ni Jehova. (Deuteronomio 6:6, 7) Sa gihapon, ang ubang mga anak, bisan pa sa pagpaningkamot pag-ayo sa matinumanong mga ginikanan, mopili sa pagsunod sa sayop nga dalan. Ang ubang mga anak, bisan pa sa labing daotang ginikananong impluwensiya, mopili sa paghigugma ug pag-alagad kang Jehova. Uban sa iyang panalangin, nagmalamposon ang ilang kinabuhi. Maghunahuna ka ba, usahay, kon hain unya niana ang imong kahimtang? Nan, tagda ang pipila ka personal nga mga pasalig ni Jehova nga makahimo ka sa hustong pagpili!
Si Jehova May Pagsalig Kanimo!
14. Giunsa nato pagkahibalo nga si Jehova nakasabot sa atong mga limitasyon?
14 Nakakita si Jehova sa tanan. Ang Proverbio 15:3 nag-ingon: “Ang mga mata ni Jehova anaa sa tanang dapit, nga nagabantay sa mga daotan ug mga maayo.” Si Haring David miingon bahin kang Jehova: “Ang imong mga mata nakakita sa diha pa ako sa tagoangkan, ug sa imong basahon ang tanang bahin niini nahisulat, bahin sa mga adlaw sa dihang sila giumol ug wala pay usa kanila.” (Salmo 139:16) Busa nahibalo si Jehova kon unsang negatibong mga kiling ang imong gipakigbisogan—kon kaha nakapanunod ka niana o nahimo kana tungod sa ubang mga impluwensiya nga dili nimo makontrolar. Siya nakasabot sa tukma kon sa unsang paagi kini nag-apektar kanimo. Nakasabot siya sa imong mga limitasyon nga labaw pa kay kanimo. Ug siya maluluy-on. Dili gayod siya magdahom ug labaw gikan kanato kay sa makataronganon natong mahimo.—Salmo 103:13, 14.
15. (a) Unsa ang usa ka tuboran sa kahupayan alang niadtong tinuyong nasakitan sa uban? (b) Si Jehova nagpasidungog sa matag usa kanato pinaagi sa paghatag kanato ug unsang responsibilidad?
15 Sa laing bahin, si Jehova wala mag-isip kanato ingong walay-mahimong mga biktima sa sirkumstansiya. Kon duna kitay daotang mga kasinatian sa nangagi, mahimong mahupayan kita sa katinuoran nga gidumtan ni Jehova kanang tanang tinuyong makapasakit nga panggawi. (Salmo 11:5; Roma 12:19) Apan palingkawason ba niya kita sa mga sangpotanan sa atong sayop nga mga buhat kon kita motalikod ug tinuyong mohimog sayop nga mga pagpili? Siyempre dili. Ang iyang Pulong nag-ingon: “Ang matag usa magapas-an sa iyang kaugalingong luwan.” (Galacia 6:5) Gipasidunggan ni Jehova ang matag usa sa iyang intelihenteng mga linalang uban sa responsibilidad nga mohimo sa husto ug moalagad kaniya. Sama kini sa giingon ni Moises sa nasod sa Israel: “Gihimo kong saksi ang mga langit ug ang yuta batok kanimo karon, nga akong gibutang ang kinabuhi ug kamatayon sa imong atubangan, ang panalangin ug ang tunglo; ug kinahanglang pilion nimo ang kinabuhi aron magpabilin kang buhi, ikaw ug ang imong mga anak.” (Deuteronomio 30:19) Si Jehova masaligon nga kita usab makahimo sa hustong pagpili. Giunsa nato pagkahibalo niana?
16. Sa unsang paagi molampos kita sa ‘pagpanlimbasog sa atong kaugalingong kaluwasan’?
16 Matikdi kon unsay gisulat ni apostol Pablo: “Tungod niana, akong mga hinigugma, . . . padayong panlimbasogi ang inyong kaugalingong kaluwasan uban ang kahadlok ug pagpangurog; kay ang Diyos mao ang usa nga, tungod ug alang sa iyang maayong kahimut-anan, nagalihok sa sulod kaninyo aron kamo mobuot ug ingon man mobuhat.” (Filipos 2:12, 13) Ang orihinal nga Gregong pulong nga gihubad ug “panlimbasogi” dinhi nagkahulogag pagtapos sa usa ka butang. Busa walay usa kanato ang gitino nang daan nga mapakyas o moundang. Si Jehova nga Diyos masaligon gayod nga matapos nato ang buluhaton nga iyang gihatag kanato nga himoon—ang buluhaton nga mosangpot sa atong kaluwasan—o wala unta niya inspiraha ang maong pahayag. Apan unsaon nato paglampos? Dili sa atong kaugalingong kusog. Kon kita may igo pang kalig-on sa atong kaugalingon, dili na kinahanglang ‘mahadlok ug mangurog.’ Hinunoa, si Jehova ‘molihok sa sulod nato,’ ang iyang balaang espiritu nagalihok diha sa atong hunahuna ug kasingkasing, nga nagatabang kanato nga “mobuot ug ingon man mobuhat.” Uban nianang mahigugmaong tabang, duna bay bisan unsang katarongan kon nganong dili nato himoon ang hustong mga pagpili sa kinabuhi ug magkinabuhi sumala niana? Wala!—Lucas 11:13.
17. Unsang mga kausaban ang atong mahimo sa atong kaugalingon, ug sa unsang paagi si Jehova nagtabang kanato sa paghimo niana?
17 Dunay mga babag nga atong buntogon—tingali tibuok-kinabuhing daotang mga batasan ug makadaot nga mga impluwensiya nga makadaot sa atong hunahuna. Bisan pa niana, uban sa tabang sa espiritu ni Jehova, mabuntog nato kini! Sumala sa gisulat ni Pablo ngadto sa mga Kristohanon sa Corinto, ang Pulong sa Diyos may igong gahom sa pagpukan bisan sa “lig-ong pagkatarok nga mga butang.” (2 Corinto 10:4) Sa pagkatinuod, si Jehova makatabang kanato sa paghimog dagkong mga kausaban sa atong kaugalingon. Ang iyang Pulong nag-awhag kanato nga “hukason ang daan nga pagkatawo” ug “magasul-ob sa bag-ong pagkatawo nga gilalang sumala sa kabubut-on sa Diyos diha sa matuod nga pagkamatarong ug pagkamaunongon.” (Efeso 4:22-24) Makatabang ba gayod ang espiritu ni Jehova sa paghimo sa maong mga kausaban? Makatabang gayod! Ang espiritu sa Diyos magpatunghag mga bunga dinhi kanato—maanindot, hamiling mga hiyas nga buot ugmaron natong tanan. Ang una niini mao ang gugma.—Galacia 5:22, 23.
18. Unsang pagpili ang bug-os nga mahimo sa matag makataronganong tawo, ug angayng tabangan kita niini nga magmadeterminado sa pagbuhat sa unsa?
18 Naa diha ang dako, maghatag-ug-kagawasan nga kamatuoran. Si Jehova nga Diyos dunay walay-kinutobang kapasidad alang sa gugma, ug kita gihimo sa iyang dagway. (Genesis 1:26; 1 Juan 4:8) Busa makapili kita sa paghigugma kang Jehova. Ug kanang maong gugma—dili ang atong kanhing pagkinabuhi, dili ang atong nahimong mga kasaypanan, dili ang atong napanunod nga kiling sa paghimog sayop—mao ang yawi sa atong umaabot. Ang gugma kang Jehova nga Diyos mao ang gikinahanglan ni Adan ug Eva aron makapabiling matinumanon sa Eden. Ang maong gugma maoy gikinahanglan sa matag usa kanato aron makalabang-buhi sa Armagedon ug makapasar sa kataposang pagsulay sa kataposan sa Milenyong Pagmando ni Kristo. (Pinadayag 7:14; 20:5, 7-10) Ang matag usa kanato, bisan unsay atong sirkumstansiya, makaugmad sa maong gugma. (Mateo 22:37; 1 Corinto 13:13) Magmadeterminado kita sa paghigugma kang Jehova ug sa pagtukod diha nianang maong gugma sa walay kataposan.
Unsay Imong Hunahuna?
◻ Unsang popular nga mga ideya ang kasumpaki sa positibong pagtulon-an sa Bibliya mahitungod sa indibiduwal nga responsibilidad?
◻ Unsang buluhatong pagtukod ang angayng himoon sa matag Kristohanon diha sa iyang kaugalingon?
◻ Sa unsang paagi ang mga panig-ingnan sa mga hari sa Juda nagpasundayag nga ang matag indibiduwal mohimo sa iyang kaugalingong pagpili?
◻ Sa unsang paagi nagpasalig si Jehova kanato nga makahimo kita sa hustong mga pagpili sa kinabuhi, walay sapayan sa negatibong mga impluwensiya palibot nato?
[Hulagway sa panid 15]
Gitino ba sa kaliwat ang imong kaugmaon?
[Hulagway sa panid 17]
Bisan pa sa daotang panig-ingnan sa iyang amahan, si Haring Josias mipili sa pag-alagad sa Diyos