Daghan ang Nag-angkong Nagtuo

“SI Jesus kahibulongan kaayo! Siya katingalahan gayod!” mipatugbaw ang usa ka relihiyosong babaye sa Brazil. Tinuod, dili ikalimod ang gahom sa ngalan ni Jesus. Sa tibuok kasaysayan, ang mga tawo kinabubut-ong nag-antos ug nagpakamatay alang kaniya.

Ang mga apostoles nga si Pedro ug Juan nagsangyaw ‘pinasukad sa ngalan ni Jesus’ sa Jerusalem. Tungod sa paghimo niana, sila gidakop ug gibunalan. Bisan pa niana sila “milakaw gikan sa atubangan sa Sanhedrin, nga nagmaya tungod kay giisip sila nga takos pakaulawan tungod ug alang sa iyang ngalan.”​—Buhat 5:​28, 41.

Si Antipas maoy laing unang-siglong Kristohanon nga may dakong pagtamod sa ngalan ni Jesus. Diha sa kataposang basahon sa Bibliya, ang Pinadayag, gihisgotan siya ni Jesus ingong “akong saksi, ang kasaligan, kinsa gipatay diha sa inyong kiliran, diin anaa si Satanas nagapuyo.” (Pinadayag 2:13) Duyog sa ubang mga Kristohanon sa Pergamum, midumili si Antipas sa paglimod sa iyang pagtuo kang Kristo. Si Antipas nagmaunongon gayod sa ngalan ni Jesus bisan sa kapildihan sa iyang kaugalingong kinabuhi!

Mga tunga sa siglo sa ulahi, sa 155 K.P., usa ka nag-angkong Kristohanon nga ginganlag Polycarp miatubang ug samang pagsulay sa dihang siya gimandoan sa pagpasipala kang Kristo. Ang iyang tubag mao: “Kawaloag-unom ka tuig akong nag-alagad Kaniya, ug Siya walay gihimong daotan kanako. Unsaon ko sa pagpanamastamas sa akong Hari nga nagluwas kanako?” Tungod sa iyang pagdumili sa paglimod kang Kristo, si Polycarp gisunog diha sa estaka.

Ang mga apostoles, si Antipas, ug uban pa andam sa pagpamatuod sa ilang pagsaksi bahin kang Kristo pinaagi sa kamatayon! Komosta ang mga tawo karong panahona?

Ang Ngalan ni Jesus Karong Adlawa

Ang ngalan ni Jesus nagpadayon sa pagpukaw ug kusganong mga emosyon. Sa Latin Amerika, ang gikusgon sa pagtubo sa mga relihiyon nga nag-angkong nagtuo kang Jesus nakaabot sa kinatas-an sa mga dekadang dili pa dugay. Bisan ang kinagamyang mga baryo adunay Pentekostal nga simbahan. Sa samang higayon, ang impluwensiya sa politika sa maong mga relihiyon nagkadako. Sa Kongreso ug sa Senado sa Brazil, pananglitan, 31 ka lingkoranan ang giokupar sa mga membro niining mga relihiyona.

Si Jesus mao usab ang sentro sa bag-ong relihiyosong kalihokan sa Tinipong Bansa. Ang mga sumusunod niini nagpatawag sa ilang kaugalingon nga mga Tigtuman sa Saad. Ang magasing Time nagtaho sa 1997 nga ang tumatambong sa ilang mga tigom mitubo gikan sa 4,200 sa 1991 ngadto sa 1.1 milyones sa 1996. Ang usa sa mga alawiton niini nagkanayon: “Oh kadaogan diha kang Jesus, nga akong Manluluwas sa walay kataposan.”

Ugaling, dili tanan sa mga sentimento nga dinasig sa ngalan ni Jesus halangdon. Ang bandera sa gubat sagad ginabuklad pinaagi sa iyang ngalan. Ang mga Hudiyo gipamatay, ang mga pagano gipangbuno, ang mga magsusupak gisakit, gipamiangan, ug gisunog diha sa estaka​—ang tanan sa ngalan ni Jesus. Ug dili pa gayod dugay, ang paghimo sa ebanghelyo nga negosyo nabantog. Kining tanan maoy daotan ug makaluod nga pag-abuso sa paggamit sa ngalan ni Jesus ug sa tinuod gayod nga gihawasan niini!

Dugang pa, kini nakapatugbaw ug hinungdanong mga pangutana: Unsay nalangkit sa pagpakitag pagtuo sa ngalan ni Jesus? Ug unsay hunahuna sa mga Saksi ni Jehova niining ulohana? Tubagon sa sunod nga artikulo kining mga pangutanaha.