Ang Mabungahong Yuta sa mga Venda

SULOD sa miaging napulo ka tuig, ang akong asawa ug ako nakaalagad ingong bug-os-panahong mga ebanghelisador sa mga Venda. Ang mga Venda nagpuyo sa habagatan sa Limpopo River sa amihanan sa Habagatang Aprika, ug ang ilang nasod gilangkoban sa daghang tribo nga mitabok sa Limpopo sulod sa nangaging mga siglo. Ang ubang mga Venda nangangkon nga ang ilang mga katigulangan namuyo dinhi kapin sa 1,000 ka tuig kanhi.

Sa pagkatinuod, kining dapita kaniadto maoy bahin sa usa ka karaang sibilisasyon nga gitawag ug Gingharian sa Mapungubwe. Kini ang unang dakong pamuy-anan sa dakbayan sa Habagatang Aprika, ug kini nagmando sa halapad nga walog sa Limpopo River, nga gikan sa Botswana sa kasadpan ngadto sa Mozambique sa sidlakan. Gikan sa mga 900 K.P. ngadto sa 1100 K.P., gisuplayan sa Mapungubwe ang negosyanteng mga Arabiano ug garing, sungay sa rhino, mga panit sa hayop, tumbaga, ug bisan bulawan. Ang pulido kaayong pagkakulit nga mga butang nga pinulogan-ug-bulawan nakalotan diha sa harianong lubnganan sa bungtod nga gitawag ug Mapungubwe. Kini nalakip sa “kinaunahang mga timaan sa minahan sa bulawan sa habagatang Aprika,” nag-ingon ang usa ka ensiklopedia.

Wala nay bulawan nga gimina dinhi. Karon, ang yuta sa mga Venda gibantog sa pagkamabungahon niini. Sa habagatan sa Kabukirang Soutpansberg nahimutang ang lanubong walog, diin daghan kaayo ang nanubong mga prutas sama sa mga abokado, saging, mangga, ug bayabas. Gawas sa mga nut sama sa pecan ug macadamia, adunay daghan usab kaayong suplay sa mga utanon. Apil na niini ang ihalas nga muroho, nga samag spinach ug lami ug kinaham kaayo sa lokal nga mga tawo.

Ang mga Venda maoy malinawon ug maabiabihong nasod. Komon na alang sa ulo sa panimalay sa paghangyo nga maglutog manok alang sa usa ka wala paabotang bisita. Isula kini sa vhuswa, ang pangunang pagkaon, nga ginama gikan sa mais. Human sa duaw, kuyogan sa ulo sa panimalay ang iyang bisita sa mubo nga distansiya. Kini maoy tradisyonal nga paagi sa pagpakitag pagtahod sa bisita. Ang kabataan gitudloan sa paghatag ug katahoran sa mga bisita sa pinong paagi pinaagi sa pagyukbo ug pagpadapyas sa kamot. Niining panira imong makita ang duha ka babayeng Venda nga nangomostahay sa usag usa niining naandang paagi.

Usa ka Malisod nga Pinulongan

Ang pinulongang Venda dili daling matun-an sa mga tawo nga taga-Uropa. Usa ka kalisdanan mao nga daghang pulong ang gititik sa samang paagi apan lahi ang pagkalitok. Samtang naghatag ug usa ka pakigpulong sa Bibliya sa Venda nga kongregasyon sa mga Saksi ni Jehova usa ka adlaw, naningkamot ako sa pagdasig sa tumatambong sa pagpakigsulti sa matag tawo. Usa ka tawo sa tumatambong mitukiki ug katawa tungod kay ako miingong “tudlo sa tudlo” imbes “tawo sa tawo.”

Sa dihang ako unang misulay sa pagsulti sa pinulongang Venda sa buluhatong pagsangyaw sa publiko, usa ka babayeng Venda mitubag: “Dili ako makamaong mosultig Iningles.” Abi nakog maayo na ang akong gipanulti sa pinulongang Venda, apan ang babaye nagtuo nga Iningles kadto! Sa miabot na ako sa usa ka balay sa laing okasyon, akong gihangyo ang usa ka bata sa pagtawag sa ulo sa pamilya. Ang Venda nga pulong alang sa ulo sa pamilya maoy thoʹho. Nasayop, ako miingon ug thohoʹ, busa mihangyo ako nga makigsulti sa unggoy sa balay! Ang mga sayop nga sama niini nagpaluya sa akong kadasig, apan tungod sa pagkamalahutayon ako ug akong asawa karon larino nang mosulti sa pinulongang Venda.

Espirituwal nga Bunga

Ang yuta sa mga Venda napamatud-ang mabungahon sa espirituwal nga paagi. Sa mga tuig sa 1950, usa ka kongregasyon sa mga Saksi ni Jehova natukod taliwala sa mga lalin nga gikan sa kanait nga mga nasod sa pagtrabaho sa minahan sa tumbaga sa lungsod sa Messina. Ang ilang madasigong pag-alagad naghatag ug kahibalo sa daghang Venda sa kamatuoran sa Bibliya. Sa milabay ang usa ka dekada usa ka grupo sa mga Saksi nga Venda naghimo sa mga tigom diha sa usa ka pribadong balay sa lungsod sa Sibasa.

Aron mokusog ang pag-uswag, ang sangang buhatan sa Watch Tower Society sa Habagatang Aprika nagpadalag bug-os-panahong mga ebanghelisador ngadto niining mabungahong kanataran. Wala magdugay ang grupo sa Sibasa nahimong usa ka dakong kongregasyon. Ang Kristohanong mga tigom gihimo sa klasehanan niadtong panahona. Apan, pinaagi sa tabang sa mga Saksi ni Jehova sa Pietersburg nga duolan sa 160 kilometros sa habagatan, usa ka Kingdom Hall ang natukod sa Thohoyandou, usa ka kanait nga lungsod.

Ang Venda-ug-sinultihan nga populasyon sa amihanan sa Habagatang Aprika may gidaghanong kapin sa 500,000. Walay mga Saksi nga Venda sa dihang gisugdan ang buluhatong pagsangyaw sa Gingharian dinhi sa mga tuig sa 1950. Karon aduna nay kapin sa 150. Apan aduna pa gihapoy daghang wala-mataaking mga lugar ug daghan pang buluhaton ang pagahimoon. Sa 1989 nagsugod kami sa pagduaw sa usa ka baryo sa Venda nga gitawag ug Hamutsha. Usa lamang ka Saksi ang nagpuyo didto sa maong panahon. Karon aduna nay kapin sa 40 ka magwawali sa Gingharian nga nagpuyo nianang baryoha. Okupado kami sa pagtapos sa among Kingdom Hall, tungod usab sa tabang sa mga Saksi gikan sa mga kongregasyon sa Pietersburg ug sa pinansiyal nga mga amot sa mga igsoon sa mas sapian nga kayutaan.

Kami nagpuyo sa usa ka karaban (gamayng treyler) sa uma. Pinaagi sa paghimo sa among kinabuhi nga simple, mas daghan kami ug panahon sa pag-abot sa lokal nga mga tawo uban sa maayong balita. (Marcos 13:10) Tungod niini, kami dagayang gipanalanginan sa pribilehiyo sa pagtabang ug daghan pa sa pagpahinungod sa ilang mga kinabuhi ngadto kang Jehova nga Diyos. Usa ka pananglitan mao ang usa ka tawo nga ginganlag Michael, kinsa nakakita sa librong Ikaw Mabuhing Walay Kataposan sa Paraiso sa Yuta diha sa balay sa usa ka higala.a Iya kining gisugdan pagbasa ug dihadiha nakaila sa kamatuoran. Busa siya misulat sa Watch Tower Society alang sa dugang nga literatura sa Bibliya. Diha sa iyang sulat gisaysay ni Michael nga bag-o pa siyang gibawtismohan ingong membro sa usa ka lokal nga Apostolikong simbahan. “Akong nadiskobrehan,” siya mipadayon, “nga anaa ako sa sayop nga dalan paingon sa Gingharian sa Diyos. Ako nakadesidir nga mahimong usa sa inyong mga membro, apan ako walay kasayoran kon unsaon.” Dayon iyang gihatag ang iyang adres ug mihangyo nga padalhan ug usa sa mga Saksi ni Jehova sa pagtabang kaniya. Akong nakit-an si Michael ug gisugdan siya sa pagtuon sa Bibliya. Karon, bawtismado na siyang Saksi ug nag-alagad kang Jehova nga maunongon.

Sa Disyembre 1997, mitambong kami sa “Pagtuo sa Pulong sa Diyos” Distritong Kombensiyon sa mga Saksi ni Jehova nga gihimo sa estadyum sa mga dula sa Thohoyandou. Dihay 634 nga mitambong, ug 12 ka bag-ohan ang gibawtismohan. Nakapribilehiyo ako sa paghatag ug duha ka pakigpulong sa pinulongang Venda. Kadto maoy usa gayod ka dakong okasyon sa among makapalipayng dekada nga nagugol niining mabungahong yuta!​—Tinampo.

[Footnote]