Ikaw ba Nahigugma sa Kinabuhi?
“PAKIT-A ako sa kahayag.” Mao kini ang mga pulong nga ginaingong gibungat sa Italyanong magbabalak nga si Giacomo Leopardi ngadto sa mga nag-atiman kaniya sa wala pa siya mamatay. Ang mga pulong nagsugyot sa dakong pagmahal sa tawo sa kinabuhi, nga gihawasan sa kahayag.
Ang pagmahal sa kinabuhi maoy usa ka bililhong panukmod nga magpalihok sa kadaghanang tawo sa paglikay sa mga kapeligrohan ug sa paghimo kutob sa ilang maarangan nga makapabiling buhi. Niini, ang tawo walay dakong kalainan sa mga hayop, nga adunay kusganong kinaiyahan nga mabuhi.
Apan unsang matanga sa kinabuhi ang takos gayod nga pagakinabuhian ug higugmaon? Dili kini yanong sikolohikal nga paglungtad—nga magaginhawa ug magalihok lamang. Ni modangat ang sagad nga katagbawan gikan sa pagpahimulos sa kinabuhi kutob sa mahimo. Ang Epicureano nga pilosopiya, nga “mangaon kita ug manginom, kay ugma kita mangamatay,” sagad wala makahatag ug katagbawan sa mga tawo. (1 Corinto 15:32) Samtang ang tawo sa tinuod adunay daghang pangunang materyal nga mga panginahanglan, siya adunay kultural ug sosyal nga mga intereses usab, bisag dili na hisgotan pa ang espirituwal nga mga panginahanglan, nga nalangkit sa pagtuo sa usa ka Supremong Persona. Ikasubo, ginatos ka minilyon, kondili man binilyon, sa mga tawo igo lamang gayod mabuhi tungod sa miserableng mga kahimtang nga katilingbanhon ug kalikopanhon diha sa daghang dapit sa kalibotan. Ang bisan kinsa nga nagkuto sa ilang kaugalingon sa pagtagbaw lamang sa ilang pisikal nga mga panginahanglan—pagkaon, pag-inom, pagbatog mga katigayonan, o pagtagbaw sa seksuwal nga mga pangibog—kapin kun kulang nagkinabuhi nga samag hayop, diin gamayng katagbawan lamang ang ilang makuha. Sa ingon, wala nila pahimusli ang mas bililhong mga kahinguhaan nga gitanyag sa kinabuhi aron sa pagtagbaw sa salabotan ug emosyon sa tawo. Dugang pa, ang bisan kinsa nga magtinguha sa pagtagbaw lamang sa ilang mapagawalong mga tinguha dili lamang napakyas sa pagpahimulos sa kinamaayohan sa kinabuhi kondili nagdaot usab sa katilingban nga ilang gikinabuhian, ug sila wala magpalambo sa intereses sa uban.
Sa pagpamatuod niini, usa ka huwes nga nakiglabot sa mga batan-ong malapason sa balaod nag-ingon nga ang “kakulag mga prinsipyo, pagsundog sa mga tawong dili maayong mga sulondan, ug kalamposan pinaagi sa kalit ug sayon nga pagkahimong sapian” daw “magpalambo ug hingaping espiritu sa kompetisyon.” Kini motultol sa panggawi nga makadaot sa katilingban ug malaglagon sa mga batan-on, ilabina kon sila mobali ngadto sa mga droga.
Nahibalo ka nga ang kinabuhi nagtanyag ug daghang kalingawan—mga bakasyon sa maanindot nga mga lugar, makaiikag nga pagbasa o panukiduki, maayong panag-ubanay, matahom nga musika. Ug adunay laing ubang mga kalihokan nga mohatag ug katagbawan dagko man o gagmay. Kadtong adunay lalom nga pagtuo sa Diyos, ug ilabina sa Diyos sa Bibliya, si Jehova, adunay dugang mga katarongan sa paghigugma sa kinabuhi. Ang tinuod nga pagtuo mao ang tuboran sa kalig-on ug kalinaw nga makatabang sa mga tawo sa pag-atubang sa malisod nga mga panahon. Ang mga magtutuo sa tinuod nga Diyos masaligong makaingon: “Si Jehova ang akong magtatabang; dili ako mahadlok.” (Hebreohanon 13:6) Ang mga tawo nga sinati sa gugma sa Diyos mobati nga gihigugma niya. Sila mosanong sa iyang gugma, nga makakuhag dulot nga kalipay gikan niana. (1 Juan 4:7, 8, 16) Sila makabaton ug aktibo ug matinabangong kinabuhi nga maoy usa ka tuboran sa katagbawan. Sama gayod kini sa giingon ni Jesu-Kristo: “Adunay labaw nga kalipay sa paghatag kay sa pagdawat.”—Buhat 20:35.
Ikasubo, adunay laing bahin ang presenteng kinabuhi. Adunay kaylap nga pag-antos, inhustisya, kakabos, sakit, ug kamatayon—sa paghisgot lamang ug pipila sa masakit nga mga bahin nga sagad maghimo sa kinabuhi nga halos dili maantos. Ang dato, gamhanan, ug maalamong Haring Solomon sa karaang nasod sa Israel nakabaton sa tanang kahinguhaan nga makahatag ug kalipay sa mga tawo. Bisan pa niana, dihay usa ka butang nga nagsamok kaniya—ang kaamgohan nga inigkamatay iyang ibilin ngadto sa laing tawo ang tanan nga tungod ‘sa iyang paghago,’ nga gihimo “uban sa kaalam ug kahibalo ug kahanas,” nabatonan niya.—Ecclesiastes 2:17-21.
Sama kang Solomon, ang kadaghanan nahibalo sa pagkamubo sa kinabuhi, nga molabay lang ug kalit. Ang Kasulatan nag-ingon nga ‘gibutang [sa Diyos] ang walay kataposan diha sa atong mga hunahuna.’ (Ecclesiastes 3:11, Byington) Kining pagbati labot sa walay kataposan nagtukmod sa tawo sa pagpalandong sa pagkamubo sa kinabuhi. Sa ngadtongadto, kay napakyas sa pagkakitag makapakombinsir nga mga tubag sa kahulogan sa kinabuhi ug kamatayon, ang usa mahimong mabug-atan sa mga pagbating pagkawalay-paglaom ug pagkawalay-kapuslanan. Kini makapaguol sa kinabuhi.
Aduna bay mga tubag sa makasubo nga mga pangutana sa tawo? May mga kahimtang pa kaha nga maghimo sa kinabuhi nga mas makapalipay ug malungtaron?