Pagsagubang sa mga Hagit sa Pagkaginikanan

ANG pagmatutog mga anak karon, ilabina kadtong mga tin-edyer, maoy usa ka dakong hagit alang sa mga ginikanan. Ang The Gazette sa Montreal, Canada, nagtaho nga ang pagprobar sa alkoholikong ilimnon ug mga droga nahimo nang “naandan sa mga tin-edyer.” Kini nagpasiugda nga ang mga ginikanan adunay “responsabilidad nga magmabinantayon bahin sa mga kausaban sa mga pamatasan sa [ilang] mga tin-edyer.”

Unsay angayng bantayan sa mga ginikanan nga mahimong magpaila nga adunay ingon niana nga mga suliran ang tin-edyer? Ang pipila ka pisikal, emosyonal, ug sosyal nga nagpasidaang mga timailhan nga nailhan sa American Academy of Child and Adolescent Psychiatry naglakip sa makanunayong kalapoy, kausaban sa personalidad ug taras, paggugol ug daghang panahon nga manarangka sa kuwarto, makiawayon nga batasan, ug magkaproblema sa balaod.

Sa unsang paagi ang mga ginikanan makapanalipod sa ilang mga anak gikan sa ingon nianang makadaot nga mga pagprobar ug sa dili maayong mga sangpotanan niini? Si Dr. Jeffrey L. Derevensky, sa McGill University, nagtuo nga ang maayong komunikasyon ug ang pagpalambo sa pagtahod sa usag usa sa katuigan sa pagtubo sa bata makapamenos sa mga problema sa ulahi. Ang The Gazette midugang nga bisan pag ang tinguha nga makabaton ug dugang nga kagawasan motungha panahon sa pagkatin-edyer, ang mga tin-edyer padayon nga nanginahanglan “sa giya, pagpaluyo, mga kahikayan ug gugma nga gitagana sa ilang mga ginikanan.” Kini nga mga obserbasyon nagsubli sa usa ka panultihon sa Bibliya nga nag-ingon: “Bansaya ang bata subay sa dalan nga alang kaniya; bisan kon siya matigulang na siya dili motipas gikan niana.” (Proverbio 22:6) Ang Diyos nagtambag sa mga ginikanan nga mahimong mga panig-ingnan, kauban, kaestorya, ug mga magtutudlo.​—Deuteronomio 6:6, 7.