Mga Magmamantala sa Gingharian Nagtaho
Malipayong Pamilyahanong Kinabuhi Nagdani sa Uban Ngadto sa Diyos
GIPANALANGINAN ni Jehova si Jose ug dakong kaalam ug katakos sa pag-ila. (Buhat 7:10) Ingong resulta, ang hait nga panabot ni Jose “napamatud-ang maayo sa mga mata ni Paraon ug sa tanan niyang mga alagad.”—Genesis 41:37.
Sa susama karong adlawa, si Jehova naghatag sa iyang katawhan ug hait nga panabot ug katakos sa pag-ila pinaagi sa ilang pagtuon sa Bibliya. (2 Timoteo 3:16, 17) Kini nga kaalam ug katakos sa pag-ila nagpatunghag maayong bunga sa dihang ipadapat ang pinasukad-sa-Bibliyang tambag. Ang ilang maayong panggawi sagad ‘napamatud-ang maayo sa mga mata niadtong nakamatikod niana,’ sumala sa gipakita sa mosunod nga mga eksperyensiya sa Zimbabwe.
• Usa ka babaye nakasilingan ug mga Saksi ni Jehova. Bisan kon dili niya gusto ang mga Saksi, nakadayeg siya sa ilang panggawi, ilabina sa ilang panimalaynong kinabuhi. Iyang namatikdan nga ang bana ug asawa adunay maayo kaayong relasyon ug ang ilang mga anak masinugtanon. Sa partikular iyang namatikdan nga gimahal pag-ayo sa bana ang iyang asawa.
Ang komon nga pagtuo sa pipila ka kultura sa Aprika mao nga kon gimahal sa bana ang iyang asawa, ang asawa migamit gayod ug lumay sa “pagpaaghop” kaniya. Busa ang babaye miduol sa Saksing asawa ug nangutana kaniya: “Mahimo bang hatagan mo ako sa lumay nga imong gihatag sa imong bana aron mahalon ako sa akong bana sama sa pagmahal sa imong bana kanimo?” Ang Saksi mitubag: “Oo, akong dalhon kana kanimo ugma sa hapon.”
Pagkasunod adlaw, ang sister miduaw sa iyang silingan dala ang iyang “lumay.” Unsa man kadto? Kadto mao ang Bibliya, uban ang publikasyong Kahibalo nga Motultol sa Kinabuhing Walay Kataposan. Human sa pagkonsiderar sa impormasyon gikan sa librong Kahibalo bahin sa ulohang “Pagtukod ug Pamilya nga Nagpasidungog sa Diyos,” siya miingon sa babaye: “Kini ang ‘lumay’ nga gigamit nako ug sa akong bana sa ‘pagpaaghop’ sa matag usa, ug kanay hinungdan nga kami naghigugmaay pag-ayo sa usag-usa.” Ang pagtuon sa Bibliya gisugdan, ug ang babaye daling miuswag ngadto sa punto sa pagpasimbolo sa iyang dedikasyon kang Jehova pinaagi sa pagpabawtismo sa tubig.
• Duha ka espesyal payunir nga naasayn sa usa ka gamayng kongregasyon duol sa amihanan-sidlakang utlanan sa Zimbabwe ug Mozambique wala mamalaybalay sulod sa duha ka semana. Ngano? Tungod kay ang mga tawo nanaghugop ngadto kanila aron maminaw kon unsa gayoy ilang isulti. Usa sa mga payunir nag-asoy kon sa unsang paagi kini nahitabo: “Kami mibiyaheg 15 kilometros aron magdumala ug senemanang pagtuon sa Bibliya sa balay uban sa usa ka interesadong tawo. Nalisdan kami sa pag-abot niining dapita. Kinahanglan kaming mobaktas agi sa lapok, ug kinahanglan kaming motabok sa nagbaha nga mga suba nga tagaliog. Naglakip kini sa pagbalanse sa among mga sapot ug sapatos nga among gilukdo, nga nagatadlas sa suba, ug dayon mag-ilis na usab sa pikas tampi.
“Ang mga silingan sa interesadong tawo nakadayeg kaayo sa among kasibot. Lakip niadtong nakamatikod mao ang lider sa usa ka lokal nga relihiyosong organisasyon. Siya miingon sa iyang mga sumusunod: ‘Dili ba kamo buot magmasiboton sama niadtong duha ka batan-ong lalaki nga mga Saksi ni Jehova?’ Pagkasunod adlaw, daghan sa iyang mga sumusunod miduaw sa among gipuy-an aron mahibaloan kon nganong kami malahutayon kaayo. Dugang pa, sulod sa misunod nga duha ka semana, daghan kaayo kamig bisita nga wala na gani kamiy panahon sa paghikay sa among pagkaon!”
Usa sa mga tawo nga miduaw sa gipuy-an sa mga payunir panahon niining duha-ka-semana nga yugto mao ang relihiyosong lider. Handurawa ang kalipay sa mga payunir sa dihang iyang gidawat ang usa ka pagtuon sa Bibliya sa balay!