Mga Magmamantala sa Gingharian Nagtaho
“Ang Diyos Dili Mapihigon”
NAPULOG-SIYAM ka gatos ka tuig kanhi, ang dinasig nga apostol Pedro miingon: “Ang Diyos dili mapihigon, apan sa matag nasod ang tawo nga magakahadlok kaniya ug magabuhat ug pagkamatarong dalawaton kaniya.” (Buhat 10:34, 35) Taliwala sa mga Saksi ni Jehova makaplagan ang katawhan gikan sa tanang rasa ug relihiyosong mga kagikan. Sila nagtinguha sa pagkamatarong, ug sila nahadlok sa Diyos. Si Jehova nagdapit kanilang tanan ngadto sa bag-ong kalibotang sosyedad, sama, pananglitan, sa iyang gibuhat sa usa ka babaye sa Chad.
Kining bayhana wala matagbaw sa iyang relihiyon. Katuigan sa miagi midawat siya ug kopya sa librong Ang Imong Pagkabatan-on—Pagpahimulos sa Labing Maayo Niini, nga gipatik sa mga Saksi ni Jehova, ug gipabilhan niya ang maayong tambag nga anaa sa libro. Usa ka pagtuon sa Bibliya ang nasugdan, ug siya kanunayng presente alang sa pagtuon. Hinunoa, sa gidasig siya sa pagtambong sa mga tigom sa Kingdom Hall, siya wala mosanong. Ngano? Bisan tuod ang iyang bana wala mosupak sa iyang pagtuon, siya midumili sa pagtugot kaniya sa pagtambong sa mga tigom sa Kingdom Hall.
Sa dihang ang asawa buot nga motambong sa sirkitong asembliya, ang Saksi nga nagdumala sa pagtuon nagpakita sa programa ngadto sa bana, nga nagpasiugda sa maayong tambag nga ipahayag. Miuyon siyang moadto ang iyang asawa “kas-a lamang.” Siya mitambong ug nalingaw kaayo sa programa. Human niya isaysay sa iyang bana kon unsay iyang nakat-onan, wala siya mosupak kaniya sa pagtambong sa ubang mga tigom. Siya nadani sa kamatuoran nga ang kongregasyon nalangkoban sa katawhan gikan sa lainlaing etnikong mga pundok kinsa nagmahal pag-ayo sa usag-usa. Sa ulahi siya mitambong sa distritong kombensiyon ug natandog sa pagkakita sa iyang mga anak nga gisabak sa mga Saksi gikan sa laing mga nasod. Ang mga Saksi nakig-ambit ug pagkaon sa mga bata ug gitagad sila nga daw pamilya. Kini mao ang lisoanang punto alang kaniya.
Apan misunod ang pagsupak. Bisan tuod maulawon, siya misugod sa pagkomento sa mga tigom ug sa pagbarog nga malig-on sa negatibong mga komento sa mga paryente ug mga silingan. Bisan pag nagpuyo siyag daghang katuigan uban sa iyang bana, nagpuyopuyo lamang sila. Unsaon niya paghisgot ang tema bahin sa pagpalegal sa kaminyoon? Human sa sinserong pag-ampo kang Jehova, nakigsulti siya sa iyang bana, kinsa miingon nga susihon niya kana. Sa kataposan gihimo niya kana, ug ang duha naminyo nga legal.
Usa ka bayaw nga babaye nga nagpuyo uban kanila nagpahinabog daghang suliran, apan ang bana mibarog laban sa iyang asawa. Unya miduaw ang amahan sa bana. Gimandoan niya ang iyang anak nga bulagan ang iyang asawa, kay gibag-o niya ang iyang relihiyon. Giingnan sa amahan ang iyang anak nga lalaki nga mohatag siya ug bugay alang sa “mas maayong asawa.” Ang tubag sa anak mao: “Dili, dili ko kana buhaton. Siya usa ka maayong asawa. Kon buot niyang molakaw, lahi kana nga butang, apan dili ko siya palayason.” Ang asawa matinahuron kaayo sa iyang ugangang lalaki, ug siya naulaw sa iyang kagawian. Apan, sa dihang mibalik siya sa iyang balangay, gisulatan niya ang iyang anak, nga niadtong panahona naghatag na ug ultimatum. Matud niya nga kon dili palayason sa iyang anak ang iyang asawa, siya dili na isipong anak. Sa makausa pa ang anak nga lalaki mibarog dapig sa iyang asawa. Hunahunaa ang kalipay sa asawa sa pagkakita sa iyang bana nga mihimo sa maong tinong baroganan.
Karon ang ilang duha ka gagmayng mga anak nga lalaki gustong mouban sa ilang inahan sa Kingdom Hall. Nangayo pa gani silag korbata sa ilang papa, sanglit nakita nila ang tanang igsoong lalaki nga nagpakigpulong nga nagsul-ob niana. Sa pagkakaron kining bayhana usa na ka bawtismadong igsoon.
Siya usa sa 345 ka malipayong mga Saksi sa Chad nga nagamantala sa maayong balita sa Gingharian ni Jehova ug nagapabili nga, sa pagkatinuod, “ang Diyos dili mapihigon.”