Mga Magmamantala sa Gingharian Nagtaho

Ang Gugma Magahiusa sa mga Pamilya

ANG pamilyahanong panaghiusa makab-ot lamang sa dihang ang kaminyoon ipasukad sa gugma nga giniyahan sa pagkadili-hakog. Ang maong gugma nagagikan kang Jehova, ang Diyos sa gugma, mao nga kini usa ka bunga sa espiritu sa Diyos. (Galacia 5:22, 23; 1 Juan 4:8) Ang mosunod nga mga kasinatian nagailustrar sa unsang paagi ang gugma nga gipasukad sa kahibalo sa Bibliya naghiusa sa mga pamilya.

Hong Kong

◻ Sa Hong Kong ang usa ka payunir misugod sa usa ka pagtuon sa Bibliya sa balay uban sa usa ka ginang sa panimalay ug sa duha niya ka anak babaye. Ang bana mipahayag ug kabalaka nga basin malangkit siya sa radikal relihiyosong pundok. Misugyot ang payunir sa asawa nga iyang imbitahon ang iyang bana nga moapil sa pagtuon ug ihukom sa iyang kaugalingon, nga maoy iyang gibuhat. Kasamtangan, ang asawa misugod sa pagtambong sa mga tigom, apan siya may suliran sa pagbansay sa iyang mga anak. Kanunay niyang kasab-an ang magulang ug patumanan ang manghod. Unya nasayran nga siya ug iyang bana may mga suliran. Ang ilang mga away kadaghanan moulbo sa kapintasan, ug sa makadaghan ang polis kinahanglang tawgon. Gigamit sa payunir ang gamhanang Pulong sa Diyos aron tudloan sila kon unsaon pagpasundayag sa diyosnong gugma diha sa ilang kaminyoon. Sa wala madugay nausab ang daang mga paagi ug batasan. Ang duha nahimong regular nga tumatambong sa tigom, ug milungtad ang labi pang malipayong kahimtang sa balay. Gihunong sa bana ang pagtabako ug karon miapil sa Tunghaan sa Teokratikanhong Ministeryo. Ang asawa karon bawtismado nang magmamantala.

Ang pamilyahanong panaghiusa nakab-ot pinaagi sa pagpasundayag sa gugma, usa ka bunga sa espiritu sa Diyos.

Britanya

◻ Ang usa ka kasinatian gikan sa Britanya nagailustrar giunsa ni Jehova sa pagpanalangin ang usa ka bana nga nagapakitag gugma, pailob, ug pagkamainantoson sa pagdumala sa iyang asawa. Sa dihang ang bana nahidangat sa kamatuoran 12 anyos nga miagi, ang mapait nga pagsupak sa iyang asawa mitultol kaniya sa pagbatog legal nga diborsiyo. Bisan pa niana, ang bana mipadayon sa pagpakita kaniyag kalulot, nga gipaneguro nga siya naatiman pag-ayo sa pinansiyal, naghimog ginagmayng mga buluhaton alang kaniya sa regular. Tapos sa upat ka tuig ug bisan pa sa iyang kanhing pagsupak, gihukom sa bana ang paghisgot sa kamatuoran kaniya sa makausa pa. Sa dihang gisugyot niya nga ang usa ka igsoong babaye magtuon sa Bibliya uban niya, siya misugot, sa dako niyang katingala. Sa kadugayan siya mibarog alang sa kamatuoran ug nabawtismohan. Ang bana wala gayod mawad-i sa iyang gugma alang kaniya, ug sa gipamatud-an niyang gidawat niya ang kamatuoran, gihangyo siya sa bana nga magminyo pag-usab. Siya nalipay, nga wala gayod magdahom nga himoon niya kadto tungod sa iyang kanhing daotang tinamdan. Sila naminyo na pag-usab sa halos walo na ka tuig, ug ang duruha maayog pag-uswag sa kamatuoran.

South Pacific

◻ Kapin sa 20 ka tuig nga miagi, ang usa ka batan-ong lalaki sa usa ka isla sa Tuvalu sa South Pacific misulat sa Watch Tower Society nga mihangyog mga basahon. Walay mga Saksi niadto diha sa isla. Bisan pa niana, gibasa niya ang mga basahon sa iyang kaugalingon ug nakaila nga kadto ang kamatuoran. Ugaling, mapait nga misupak ang iyang asawa sa iyang bag-ong pagtuo, mao nga iya kanang gibiyaan.

Sa dili pa dugay, sa dihang ang mga basahon mabatonan na sa Tuvaluan, ang asawa nakabaton sa pila ka basahon ug nakabasa niana sa iyang kaugalingon. Sa maong panahon nailhan niya ang kamatuoran ug mireklamo ngadto sa iyang bana: “Niining tanan nga katuigan nabatonan nimo ang kahayag, apan wala kana nimo ipataas. Nganong wala ka magpatin-aw nganong nagtuo ka nga husto ang mga Saksi?” Nga nahiusa na karon sa kamatuoran sa Bibiya, kining magtiayona misugod sa pagpakig-uban sa mga Saksi.

Sa dihang ang duha nila ka anak babaye, nga nag-eskuyla sa Fiji, mipauli, gipahibalo sila sa mga ginikanan sa ilang desisyon nga mahimong mga Saksi ni Jehova. Gidasig nila ang mga batang babaye nga moduyog kanila sa usa ka pagtuon sa Bibliya, apan sa ilang katingala, nadiskobrehan nilang ang mga batang babaye nagtambongan na sa mga tigom sa Fiji. Ang pamilya malipayong nagdawat nga tingob sa kamatuoran, ug ang amahan, ang inahan, ug usa sa mga anak babaye nahimong mga magmamantala sa Gingharian.

Dako gayod nga kalipay ang pagkakitang ang kamatuoran sa Bibliya ug ang gugma nagahiusa sa mga pamilya sa tibuok kalibotan.