Sugilanon sa Kinabuhi

Pagpasalamat Kang Jehova—Pinaagi sa Bug-os-Panahong Pag-alagad!

SUMALA SA GIASOY NI STANLEY E. REYNOLDS

Natawo ako sa London, Inglaterra, sa 1910. Human sa Gubat sa Kalibotan I, ang akong mga ginikanan mibalhin ngadto sa usa ka gamayng balangay sa Wiltshire nga ginganlag Westbury Leigh. Sa batan-on pa, kasagarang mahibulong ako, ‘Kinsa ang Diyos?’ Wala gayoy makatug-an kanako. Ug wala gayod nako masabti kon nganong ang ingon ka gamayng komunidad sa amoa nagkinahanglan ug duha ka kapilya maingon man usa ka simbahan aron simbahon ang Diyos.

SA 1935, upat ka tuig sa wala pa magsugod ang Gubat sa Kalibotan II, ang akong manghod nga lalaki, si Dick, ug ako nagbisikleta paingon sa Weymouth sa habagatang baybayon sa Inglaterra aron magkamping. Samtang nanglingkod kami sa among tolda nga naminaw sa pagbunok sa ulan ug naghunahuna kon unsay buhaton, usa ka edaran nga talahorong lalaki ang miduaw ug nagtanyag kanako ug tulo ka giya sa pagtuon sa Bibliya—ang The Harp of God, Light I, ug Light II. Gikuha nako kadto, nga nalipay nga dunay butang nga makawala sa kalaay. Dihadiha nalingaw ako sa akong nabasa, apan wala koy ideya nga kini bug-os nga mag-usab sa akong kinabuhi—ug sa akong igsoon usab.

Pagpauli nako, ang akong inahan miingon kanako nga si Kate Parsons, kinsa nagpuyo sa among balangay, nag-apod-apod sa samang matang sa literatura sa Bibliya. Ilado siya tungod kay, bisan tuod tigulang na kaayo, mosakay siya sa usa ka gamayng motorsiklo aron sa pagduaw sa mga tawo sa among nakatag nga komunidad. Nakigkita ko niya, ug nalipay siya nga ihatag kanako ang mga librong Creation ug Riches maingon man ang ubang mga publikasyon sa Watch Tower Society. Giingnan sab ko niya nga siya usa sa mga Saksi ni Jehova.

Human mabasa ang mga libro uban sa akong Bibliya, akong nahibaloan nga si Jehova mao ang matuod nga Diyos ug buot nakong mosimba kaniya. Busa nagpadala ako ug sulat sa pagluwat sa among simbahan ug misugod sa pagtambong sa mga panagtuon sa Bibliya diha sa balay ni John ug Alice Moody. Nagpuyo sila sa Westbury, ang among kinadul-ang lungsod. Pito lamang kami sa maong mga miting. Una pa ug pagkahuman sa mga miting, si Kate Parsons magpatokar sa harmonium samtang kami duyog nga manganta ug mga alawiton sa Gingharian nga madasigon!

Unang mga Adlaw

Nasabtan nako nga kami nagkinabuhi na sa hinungdanong mga panahon, ug nangandoy ako nga makapakigbahin sa buluhatong pagsangyaw nga gitagna diha sa Mateo 24:14. Busa miundang ko sa pagpanigarilyo, mipalit ug bag, ug nagpahinungod sa Dakong Diyos, si Jehova.

Sa Agosto 1936, si Joseph F. Rutherford, ang presidente sa Watch Tower Society, miduaw sa Glasgow, Scotland, aron mopakigpulong bahin sa ulohang “Armagedon.” Bisan tuod ang Glasgow maoy mga 600 kilometros ang gilay-on, determinado ako nga maatua didto ug mabawtismohan sa maong kombensiyon. Nihit ang kuwarta, busa gikarga nako ang akong bisikleta sa tren paingon sa Carlisle, usa ka lungsod sa utlanan sa Scotland, ug nagbisikleta gikan didto ug 160 kilometros paamihan. Sa pagpauli nagbisikleta usab ako sa dakong bahin sa biyahe, nga mipauli nga hago kaayo apan napalig-on sa espirituwal.

Sukad niadtong panahona, nagbisikleta ako bisan asa ako moadto sa pagpakig-ambit sa akong pagtuo uban sa mga tawo sa kasikbit nga mga balangay. Niadtong mga adlawa ang matag Saksi may kard nga testimonya uban ang usa ka Kasulatanhong mensahe nga ipabasa sa mga tagbalay. Migamit usab kami ug madaladalang mga ponograpo aron ipatokar ang mga plaka sa mga pakigpulong sa Bibliya sa presidente sa Sosyedad. Ug, siyempre, kanunay kaming magdaladala ug bag sa magasin,a nga maoy nagpaila kanamo ingong mga Saksi ni Jehova.

Pagpayunir sa Panahon sa Gubat

Ang akong igsoong lalaki nabawtismohan sa 1940. Ang ikaduhang gubat sa kalibotan nagsugod sa 1939, ug nakita namo ang dinaliang panginahanglan sa bug-os-panahong mga magwawali. Busa, among gitunol ang among mga aplikasyon sa pagpayunir. Mapasalamaton kami nga giasayn nga magkauban sa puy-anan sa payunir sa Bristol, aron moduyog didto kang Edith Poole, Bert Farmer, Tom ug Dorothy Bridges, Bernard Houghton, ug ubang mga payunir kansang pagtuo dugay na namong gidayeg.

Wala madugay usa ka gamayng van nga gisulatan ug “MGA SAKSI NI JEHOVA” diha sa mga kilid niini sa tatawng mga letra ang miabot aron sa pagpasakay kanamo. Ang drayber mao si Stanley Jones, kinsa sa ulahi nahimong misyonaryo sa Tsina ug kinsa gibartolina didto sulod sa pito ka tuig tungod sa iyang buluhatong pagsangyaw.

Samtang nagpadayon ang gubat, panagsa ra kaming makatulog pag-ayo sa gabii. Ang mga bomba mangahulog palibot sa among puy-anan sa payunir, ug kinahanglang kanunay kaming magbantay alang sa makasunog nga mga misil. Usa ka gabii mibiya kami sa kinapusoran sa Bristol human sa usa ka maanindot nga asembliya nga gitambongan sa 200 ka Saksi ug nakaabot sa medyo hilwas namong pinuy-anan latas sa pinisik sa gipaulan nga mga bala gikan sa mga antiaircraft.

Pagkasunod buntag si Dick ug ako namalik sa siyudad aron sa pagkuhag pipila ka butang nga among nabiyaan. Nakurat kami. Nahapay ang Bristol. Ang tibuok kinapusoran sa siyudad nalumpag ug nasunog. Ang Park Street, diin nagbarog kanhi ang among Kingdom Hall, maoy pundok sa nag-aso nga kagun-oban. Hinuon, walay Saksi nga namatay o nasamdan. Maayo na lang, gibalhin na namo ang among literatura sa Bibliya gikan sa Kingdom Hall ug giapod-apod kini sa kabalayan sa mga membro sa kongregasyon. Gipasalamatan namo si Jehova nianang tanan.

Wala Damhang Kagawasan

Ang Kongregasyon sa Bristol diin ako nag-alagad ingong nagadumalang magtatan-aw miuswag ngadto sa 64 ka ministro sa panahon nga nadawat nako ang akong papeles sa pagrekluta alang sa serbisyo militar. Daghang ubang Saksi ang gibilanggo tungod sa ilang neyutral nga baroganan, ug nagdahom ako nga ang akong kagawasan sa pagsangyaw susamang makutohan. Gihusay ang akong kaso diha sa lokal nga Hukmanan sa Bristol diin si Brader Anthony Buck, usa ka kanhing opisyal sa bilanggoan, misulti alang kanako. Siya usa ka maisogon, walay-kokahadlok nga tawo, lig-ong dumadapig sa kamatuoran sa Bibliya, ug tungod sa iyang maayong pagrepresentar, sa wala damha gihatagan ako ug bug-os nga eksemsiyon gikan sa serbisyo militar sa kondisyon nga ipadayon nako ang akong bug-os-panahong ministeryo!

Nalipay ako nga gihatagan akog kagawasan, ug determinado akong gamiton kini sa pagsangyaw kutob sa maarangan. Sa dihang nakadawat ako ug tawag nga paadtoon sa sangang buhatan sa London aron makigsulti kang Albert D. Schroeder, ang magtatan-aw sa sanga, siyempre natingala ako kon unsay naghulat kanako. Tiaw mo kana kadako sa akong katingala sa dihang gidapit ako nga moadto sa Yorkshire aron sa pag-alagad ingong nagapanawng magtatan-aw, nga nagaduaw ug lainlaing mga kongregasyon kada semana aron sa pagtabang ug pagdasig sa mga igsoon. Mibati akong dili-kuwalipikado sa maong asaynment, apan may eksemsiyon ako ug busa libreng moadto. Busa gidawat nako ang pagtultol ni Jehova ug kinabubut-ong miadto.

Gipailaila ako ni Albert Schroeder sa mga igsoon panahon sa usa ka asembliya sa Huddersfield, ug sa Abril 1941, gisugdan nako ang akong bag-ong asaynment. Pagkamakalilipay nga makaila kadtong minahal nga mga igsoon! Ang ilang gugma ug kalulot labi pang nakapaapresyar kanako nga si Jehova dunay katawhan nga bug-os nga debotado kaniya kinsa naghigugmaay sa usag usa.—Juan 13:35.

Dugang mga Pribilehiyo sa Pag-alagad

Usa ka dili-makalimtang lima-ka-adlaw nga nasodnong kombensiyon ang gihimo sa 1941 sa De Montfort Hall sa Leicester. Bisan pag girasyon ang pagkaon ug gikutohan ang nasodnong transportasyon, ang nanambong miuswag ngadto sa kinatas-ang ihap sa Dominggo nga 12,000; apan, nianang panahona diha lamay kapin sa 11,000 ka Saksi sa nasod. Ang mga plaka sa mga pakigpulong sa presidente sa Sosyedad gipatokar, ug ang librong Children giluwatan. Kadtong maong kombensiyon tinong usa ka hinungdanong yugto sa teokratikanhong kasaysayan sa katawhan ni Jehova sa Britanya, bisag gipahigayon kadto taliwala sa Gubat sa Kalibotan II.

Wala madugay human niining kombensiyona, gidapit ako nga moalagad uban sa pamilyang Bethel sa London. Didto, ako nagtrabaho sa mga departamento sa shipping ug packing ug sa ulahi sa opisina, nga nagdumala sa mga butang maylabot sa mga kongregasyon.

Ang pamilyang Bethel kinahanglang moagwanta sa mga pagpamomba sa kahanginan diha sa London gabii ug adlaw, maingon man sa kanunayng pag-imbestigar sa mga awtoridad sa responsableng mga igsoon nga nagtrabaho didto. Si Pryce Hughes, Ewart Chitty, ug Frank Platt ngatanan gibilanggo tungod sa ilang neyutral nga baroganan, ug ngadtongadto si Albert Schroeder gipapauli sa Tinipong Bansa. Bisan pa niini nga mga pagpit-os, ang mga kongregasyon ug ang intereses sa Gingharian padayong giatiman.

Pag-adto sa Gilead!

Pagkatapos sa gubat sa 1945, miaplay ako alang sa misyonaryong pagbansay sa Watchtower Bible School of Gilead ug gidawat sa ikawalong klase sa 1946. Gihikay sa Sosyedad nga ubay-ubay kanamo, lakip kang Tony Attwood, Stanley Jones, Harold King, Don Rendell, ug Stanley Woodburn, molawig gikan sa Cornish nga pangisdaang pantalan sa Fowey. Usa ka lokal nga Saksi ang naghikay nga makasakay kami sa usa ka gamayng barko sa kargamento nga nagdala ug puting kulonon alang sa paggamag seramik. Ang among katulganan huot kaayo, ug ang salog kanunayng mabahaan. Nakaginhawa na kamig lawom sa dihang sa kataposan nagsingabot kami sa pantalan diin kami mosulod, ang Philadelphia!

Ang tunghaan sa Gilead maayong pagkapahimutang sa South Lansing sa amihanang New York, ug ang pagbansay nga akong nadawat didto makahuloganon kaayo kanako. Ang mga estudyante sa among klase naggikan sa 18 ka nasod—ang unang higayon nga ang Sosyedad nakaarang sa pagpalista sa daghan kaayong ministro gikan sa langyawng kayutaan—ug kaming tanan nahimong suod nga mga higala. Nalipay gayod ako sa pagpakig-uban sa akong kauban sa kuwarto, si Kalle Salavaara nga taga-Pinlandia.

Tulin nga nanglabay ang panahon, ug sa pagkatapos sa lima ka bulan, ang presidente sa Sosyedad, si Nathan H. Knorr, miabot gikan sa hedkuwarter sa Brooklyn aron ihatag kanamo ang among mga diploma ug ipahibalo kanamo kon asa ang among mga asaynment. Niadtong mga adlawa, ang mga estudyante wala mahibalo sa ilang mga destinasyon hangtod kini ipahibalo panahon sa seremonyas sa graduwasyon. Giasayn ako nga mobalik sa Bethel sa London aron sa pagpadayon sa akong buluhaton didto.

Balik sa London

Pig-ot ang mga tuig human sa gubat sa Britanya. Ang pagkaon ug daghang ubang kinahanglanon, lakip ang papel, padayong girasyon. Apan nakapaigoigo ra kami, ug miuswag ang intereses sa Gingharian ni Jehova. Dugang pa sa pagtrabaho sa Bethel, nag-alagad ako sa distrito ug sirkito nga mga asembliya ug nagduaw sa mga kongregasyon, lakip na sa pipila diha sa Irlandia. Usa usab ka pribilehiyo nga mahimamat si Erich Frost ug ang ubang mga igsoong lalaki ug babaye nga taga-Uropa ug masayran gikan kanila ang integridad sa kaubang mga Saksi nga nag-atubang sa makalilisang nga mga kahimtang sa mga kampong konsentrasyon sa Nazi. Ang pag-alagad sa Bethel sa pagkatinuod maoy usa ka bulahang pribilehiyo.

Sulod sa napulo ka tuig nakaila nako si Joan Webb, usa ka espesyal payunir nga nag-alagad sa Watford, usa ka lungsod sa amihanan sa London. Sa 1952 naminyo kami. Buot namong duha nga magpadayon sa bug-os-panahong pag-alagad, busa nalipay kami sa dihang, human ako mobiya sa Bethel, gitudlo ako ingong magtatan-aw sa sirkito. Ang among unang sirkito maoy ubay sa habagatang baybayon sa Inglaterra, sa Sussex ug Hampshire. Ang sirkitong buluhaton dili sayon niadtong mga adlawa. Kasagaran mobiyahe kami pinaagi sa bus, bisikleta, ug pagbaktas. Daghang kongregasyon ang may dagko, banika nga mga teritoryo, nga kasagarang lisod abton, apan ang gidaghanon sa mga Saksi nagpadayon sa pag-uswag.

New York City 1958

Sa 1957, nadawat nako ang laing imbitasyon gikan sa Bethel: “Gusto ba nimong moanhi sa sangang buhatan ug moabag sa mga kahikayan sa pagbiyahe alang sa nagsingabot nga internasyonal nga asembliya nga pagahimoon sa Yankee Stadium ug sa Polo Grounds sa New York City sa 1958?” Si Joan ug ako sa wala madugay nagkapuliki sa pag-atiman sa mga aplikasyon gikan sa mga igsoon alang sa mga ayroplano ug barko nga giabangan sa Sosyedad. Kini mao ang iladong Balaang Kabubut-on Internasyonal nga Asembliya, nga gitambongan sa 253,922. Niining kombensiyona, 7,136 ang nagpasimbolo sa ilang pagpahinungod kang Jehova pinaagi sa paglusbog sa tubig—kapin sa duha ka pilo sa gidaghanon sa nabawtismohan sa makasaysayanhong okasyon sa Pentekostes 33 K.P., sumala sa gitaho diha sa Bibliya.—Buhat 2:41.

Si Joan ug ako dili gayod malimot sa kalulot ni Brader Knorr sa dihang personal niya kaming gidapit nga motambong sa asembliya aron motabang pag-atiman sa mga delegado nga nangabot sa New York City gikan sa 123 ka kayutaan. Kadto maoy malipayon ug makapatagbawng kasinatian alang kanamong duha.

Mga Panalangin saBug-os-Panahong Pag-alagad

Pagbalik namo, nagpadayon kami sa nagapanawng buluhaton hangtod nga nagsakit kami. Si Joan naospital, ug ako nakaagom sa dili grabe nga estrok. Mibalhin kami sa grupo sa mga espesyal payunir apan sa ulahi nakapribilehiyo na usab sa temporaryong pag-alagad diha sa sirkitong buluhaton. Ngadtongadto, namalik kami sa Bristol diin nagpabilin kami sa bug-os-panahong pag-alagad. Ang akong igsoong lalaki, si Dick, nagpuyo sa duol uban sa iyang pamilya, ug sagad namong hinumdoman ang nangagi.

Nahalap ako nga wala nay pagkaayo tungod sa gitangtang nga mga retina sa 1971. Sukad niadto naglisod kaayo ko sa pagbasa, busa nakaplagan nakong kahibulongang tagana gikan kang Jehova ang mga rekording sa cassette sa literatura sa Bibliya. Si Joan ug ako nagdumala gihapon ug mga panagtuon sa Bibliya sa balay, ug latas sa katuigan, nakapribilehiyo kami sa pagtabang sa mga 40 ka tawo nga makadangat sa kahibalo sa kamatuoran, lakip na sa usa ka pamilya nga dunay pito ka membro.

Sa dihang gipahinungod namo ang among kinabuhi kang Jehova kapin sa 60 ka tuig kanhi, ang among tinguha mao ang pagsulod sa bug-os-panahong pag-alagad ug pagpabilin diha niana. Pagkamapasalamaton namo nga nakabaton gihapon sa kusog sa pag-alagad sa Dakong Jehova—ang bugtong paagi nga kami makapasalamat kaniya tungod sa iyang kaayo kanamo ug sa among katuigan sa malipayong panag-uban!

[Footnote]

[Hulagway sa panid 25]

Uban sa akong igsoong si Dick (layong bahin sa wala; si Dick nagtindog) ug ubang mga payunir atubangan sa puy-anan sa payunir sa Bristol

[Hulagway sa panid 25]

Ang puy-anan sa payunir sa Bristol sa 1940

[Mga hulagway sa panid 26]

Stanley ug Joan Reynolds sa adlaw sa ilang kasal, Enero 12, 1952, ug karon