“Unsay Nagakahitabo sa Pransiya?”

“Kagawasan, minahal nga kagawasan,” mao kini ang mga pulong gikan sa “La Marseillaise,” ang nasodnong awit sa Pransiya. Sa walay duhaduha, ang kagawasan maoy usa ka butang nga angayng pabilhan. Apan, ang di pa dugayng mga hitabo sa Pransiya nakapatunghag kabalaka nga ang pasukaranang mga kagawasan ginadaot. Mao kana ang rason nga, niadtong Biyernes, Nobyembre 3, 2000, tinagpulo ka libo sa mga Saksi ni Jehova nang-apod-apod ug 12 ka milyong kopya sa linaing tract nga nag-ulohang “Unsay Nagakahitabo sa Pransiya? Mahimo bang Mawagtang ang Kagawasan?”

SA DAGHANG tuig na karon, ang mga Saksi ni Jehova sa Pransiya ginaatake sa lainlaing mga politiko ug kontra-sekta nga mga grupo. Kini misangpot sa mga kalisdanan alang sa mga Saksi ingong indibiduwal, diha sa kongregasyon, ug sa tibuok nasod. Apan, sa Hunyo 23, 2000, ang Conseil d’État, ang kinatas-ang korte sa Pransiya, nagpakanaog ug hinungdanong desisyon nga nagpalig-on sa nangibabaw nga paghukom sa 31 ka ubos nga mga korte diha sa kapin sa 1,100 ka kaso. Gikompirmar sa hataas nga korte nga ang pagsimba sa mga Saksi ni Jehova bug-os nga nahiuyon sa balaod sa Pransiya ug nga ang ilang mga Kingdom Hall may katungod nga dili pangayoag buhis sama sa ubang mga relihiyon.

Ugaling, kay wala gayod panumbalinga kining maong desisyon, ang eksemsiyon sa buhis nga gihatag sa balaod ngadto sa relihiyosong mga organisasyon dili gihapon ihatag sa Ministry of Finance sa Pransiya ngadto sa mga Saksi ni Jehova. Ang Ministry naningil ug 60-porsiyentong buhis sa mga amot nga ihatag sa mga Saksi ug mga higala nga nakig-uban sa 1,500 ka lokal nga mga kongregasyon sa Pransiya. Kining kasoha ginahusay pa karon.

Ang tumong sa bag-o pang gihisgotan nga kampanya mao ang pagyagyag niini nga panagsumpaki ug sa pagpasiugda sa mga kapeligrohan nga gipasabot sa maong dili-makataronganong pagpaningil ug buhis ug sa giduso nga mga balaod nga magdaot sa relihiyosong kagawasan sa tanan.a

Usa ka Adlaw nga Dugayng Nahuman

Sa alas dos sa kaadlawon, ang mga Saksi diha sa pipila ka kongregasyon nagsugod sa pagpang-apod-apod sa tract sa gawas sa mga estasyonan sa tren ug sa mga pabrika ug dayon sa mga erport. Pagka-alas sayis, misugod ang kisaw sa kalihokan sa Paris. Mga 6,000 ka boluntaryo mipuwesto sa hinungdanong mga dapit aron mahimamat ang mga tawong nagpadulong sa ilang trabaho. Usa ka batan-ong babaye mikomento: “Dalayegon ang inyong ginahimo alang sa relihiyosong kagawasan. Dili lang mga Saksi ni Jehova ang nalangkit.” Sa Marseilles, kapin sa 350 ka Saksi nanagtag sa tract diha sa mga estasyonan sa subwey ug sa dalan. Sulod sa usa ka oras, gisibya sa nasodnong estasyon sa radyo ang kampanya, nga gisultihan ang mga mamiminaw nga dili matingala kon duolon sila sa mga Saksi ni Jehova. Sa Strasbourg, nahimutangan sa hedkuwarter sa Uropanhong Korte sa Tawhanong mga Katungod, ang mga nagabiyahe naglinya nga mapailobon sa sentrong estasyonan sa pagdawat sa ilang kopya. Mikomento ang usa ka abogado nga, bisan tuod dili siya mouyon sa among tinuohan, siya maikagong nagbantay sa among kaso sa hukmanan, tungod kay ang among pagpakigbisog hinungdanon ug makataronganon.

Sa alas otso, bisan mibunok ang ulan, 507 ka Saksi sa siyudad sa Grenoble sa Alpino sistematikong nang-apod-apod sa tract sa kadalanan o nagbutang niini diha sa mga buson. Kay nakamatikod nga dunay nagakahitabo, gipahunong sa mga drayber sa trak ug trambiya ang ilang mga sakyanan aron mangayog tract. Sa siyudad sa Poitiers sa kasadpan, ang mga nagbiyahe sakay sa tren nga nangabot sa alas nuybe nakadawat na sa tract didto sa dapit nga ilang gigikanan. Sa Mulhouse, duol sa utlanan sa Alemanya, 40,000 ka kopya ang napanagtag na.

Pagka-alas diyes, daghang kongregasyon nakapang-apod-apod na ug sobra sa katunga sa ilang mga tract. Samtang padayong naglakat ang mga oras nianang buntaga, pipila ra gayod ka tawo ang mibalibad sa pagdawat sa tract, ug daghang makaiikag nga mga panaghisgot ang miresulta. Sa Besançon, kapin lang sa 80 kilometros gikan sa utlanan sa Switzerland, usa ka batan-ong lalaki mipahayag ug interes sa Bibliya ug nangutana kon nganong gitugotan sa Diyos ang pag-antos. Gidapit siya sa Saksi nga ilang ipadayon ang maong panaghisgot diha sa Kingdom Hall sa duol, diin gisugdan dayon ang usa ka pagtuon sa Bibliya sa brosyur nga Unsay Gikinahanglan sa Diyos Kanato?

Sa udto daghang Saksi naggamit sa ilang panahon sa tingpaniudto aron sa pagsangyaw sulod sa usa o duha ka oras. Sa tibuok hapon, nagpadayon ang pagpang-apod-apod, ug daghang kongregasyon natapos pagka-alas tres o alas kuwatro niana nga hapon. Sa siyudad sa Reims, nga ilado sa paggamag champagne, ang pipila ka tawo nga nagtuon o nakig-uban kanhi sa mga Saksi ni Jehova nagpahayag sa ilang tinguha sa pagpakig-uban pag-usab sa kongregasyon. Sa Bordeaux tulo ka pagtuon sa Bibliya sa balay ang gisugdan. Sa mao gihapong siyudad, misulod sa tindahan ang usa ka Saksi aron mopalit ug mantalaan ug nakita ang nagtipun-og nga mga tract ibabaw sa estante. Ang tag-iya sa tindahan, nga Saksi kanhi, nakadawat sa tract ug naghimog seroks nga mga kopya niini aron iya mismong ipanagtag tungod kay nakaamgo sa kahinungdanon niini.

Sa Le Havre, Normandy, nakurat ang usa ka babayeng Protestante nga nakadungog diha sa radyo nga ang mga amot sa mga Saksi ni Jehova gipangayoan ug buhis. Mahinamon niyang gidawat ang tract ug gidayeg ang mga Saksi tungod sa ilang maisogong pagsulti batok sa maong inhustisya. Sa alas 7:20 s.g., ang balita sa TV sa rehiyon sa Lyons nagkomento bahin sa pagpang-apod-apod nga nag-ingon: “Ganihang buntag mas sayon nga likayan ang taligsik kay sa likayan ang mga tract sa mga Saksi ni Jehova.” Duha ka Saksi ang giinterbiyo ug mipatin-aw sa mga rason sa maong kampanya.

Ang mga Saksi nga buot nga makigbahin human sa ilang sekular nga trabaho nag-apod-apod ug pipila ka tract sa mga tawong namauli ug nagbutang sa uban diha sa mga buson. Sa mga lungsod sama sa Brest ug Limoges—nga ilado tungod sa mga porselana niini—ang mga tawo nga nanggawas sa sinehan sa alas 11:00 s.g. maoy lakip sa kataposang nakadawat sa tract nianang adlawa. Ang nabiling mga tract gitigom ug gipang-apod-apod pagkasunod buntag.

Mga Resulta

Usa ka Saksi misulat: “Ang atong mga kaaway nagtuo nga nagakahuyang kita tungod sa ilang ginahimo. Sa pagkatinuod, sukwahi niana ang nagakahitabo.” Sa kadaghanang kongregasyon, kapin sa 75 porsiyento sa mga Saksi nakigbahin nianang adlawa, ang uban migugol ug 10, 12, o 14 ka oras niini nga kalihokan. Sa Hem, sa amihanang Pransiya, human sa panggabii nga trabaho, usa ka Saksi nag-apod-apod sa tract gikan sa alas singko sa buntag hangtod sa alas tres sa hapon. Sa haduol nga Denain, diin may kongregasyon na sukad pa sa 1906, 75 ka Saksi migugol ug 200 ka oras sa pagpang-apod-apod sa tract sa Biyernes. Ang uban, bisan pa sa katigulangon, sakit, ug daot nga panahon, determinado usab sa pagpakigbahin. Sa Le Mans, pananglitan, tulo ka igsoong nag-edad ug mga 80 migugol ug duha ka oras sa pagbutang sa tract nganha sa mga buson, ug usa ka Saksi nga nag-wheelchair nanagtag sa tract atubangan sa estasyonan sa tren. Ug pagkamakapadasig nga makita ang daghang dili-aktibo kanhi nga mga Saksi nga nakigbahin niining linaing kalihokan!

Walay duhaduha, kini nga pagpang-apod-apod miresulta sa dakong pagpamatuod. Ang mga tawo gikan sa lainlaing matang sa kinabuhi, nga daghan kanila talagsa rang makontak diha sa ilang mga balay, nakadawat ug kopya sa tract. Nagtuo ang ubay-ubayng mga tawo nga kini nga aksiyon nakahimo ug labaw pa kay sa pagpanalipod lang sa intereses sa mga Saksi. Giisip kini sa daghan ingong pagdepensa sa kagawasan sa tanlag ug sa pagsimba sa tanang tawo sa Pransiya. Ingong pamatuod niini, daghang tawo ang nangayog dugang nga mga kopya sa tract aron ihatag sa mga higala, kauban, o mga paryente.

Oo, gipasigarbo sa mga Saksi ni Jehova sa Pransiya ang pagpaila sa ngalan ni Jehova ug pagdepensa sa intereses sa Gingharian. (1 Pedro 3:15) Sila tim-os nga naglaom nga sila ‘makapadayon sa pagkinabuhi nga mahusay ug malinawon uban ang bug-os nga diyosnong pagkamahinalaron ug pagkaugdang’ ug nga linibo pa ang magduyog kanila sa pagdayeg sa ilang langitnong Amahan, si Jehova.—1 Timoteo 2:2.

[Footnote]