Di-Pormal nga Pagsangyaw Diha sa Iningles-ug-Sinultihan nga Teritoryo sa Mexico

ARON pahimuslan ang panahon samtang naghulat sa iyang mga kauban sa biyahe didto sa Atenas, si apostol Pablo naghimog di-pormal nga pagsangyaw. Ang Bibliya nagtaho: “Siya misugod sa pagpangatarongan . . . sa matag adlaw diha sa tiyanggihan ngadto kanilang atua didto.” (Buhat 17:17) Sa iyang pagpanaw gikan sa Judea paingon sa Galilea, si Jesus di-pormal nga nagsangyaw sa babayeng taga-Samaria tapad sa atabay. (Juan 4:3-26) Ikaw ba nagpahimulos sa matag kahigayonan sa pagsulti bahin sa maayong balita sa Gingharian sa Diyos?

Ang Iningles-ug-sinultihan nga teritoryo sa Mexico maoy maayo gayod nga dapit alang sa di-pormal nga pagsangyaw. Ang mga turista moadto sa mga dapit nga bakasyonan, ang mga estudyante manungha diha sa mga unibersidad, ug ang retiradong mga langyaw nga nanimuyo sa Mexico kanunayng moadto sa mga parke ug mga restawran. Daghang Saksi ni Jehova nga makamaong mo-Iningles hanas nang makig-estorya niining mga tawhana. Sa pagkatinuod, alisto sila sa pagpakigsulti kang bisan kinsa nga langyaw ug hitsura o Iningles ug sinultihan. Atong tan-awon kon giunsa nila kini paghimo.

Makadaghang higayon nga ang mga igsoon gikan sa ubang nasod nga nag-alagad diha sa Iningles-ug-sinultihan nga teritoryo magpailaila sa ilang kaugalingon sa mga tawo nga sa ilang tan-aw mga langyaw ug mangutana kanila kon taga-diin sila. Kasagaran ang langyaw mangutana sa Saksi kon unsay iyang gihimo sa Mexico ug mohatag kinig higayon sa Saksi sa pagpaambit sa Kristohanong mga pagtulon-an. Pananglitan, si Gloria, kinsa nag-alagad diin mas dako ang panginahanglan diha sa Iningles-ug-sinultihan nga teritoryo sa Oaxaca, dali nga makasugod sa pagpakig-estorya nianang paagiha. Sa pagpauli gikan sa di-pormal nga pagsangyaw diha sa plasa sa lungsod, giduol siya sa usa ka magtiayon nga taga-Inglaterra. Ang babaye miingon: “Dili ko makatuo nga makakita ko ug itom nga babaye dinhi sa Oaxaca!” Imbes masuko, mikatawa si Gloria, ug nag-estorya sila kon unsay gihimo ni Gloria sa Mexico. Si Gloria gidapit sa babaye sa iyang balay aron mangape. Human magkasabot kon kanus-a sila sunod magkita, gitanyagan siya ni Gloria ug mga magasing Bantayanang Torre ug Pagmata!, apan wala kini dawata sa babaye, nga nag-ingon nga siya ateyista o dili motuo nga dunay Diyos. Si Gloria miingon nga malipay siyang makig-estorya sa mga ateyista ug gustong mahibalo sa iyang opinyon bahin sa artikulong “Mga Dapit sa Pagsimba—Gikinahanglan ba Nato Kini?” Gidawat kini sa babaye, nga miingon: “Maayo kaayo kon imo kong makombinsir nga dunay Diyos.” Daghan silag makaikag nga naestoryahan samtang nangape. Sa ulahi mibalik ang magtiayon sa Inglaterra, apan ang panag-estoryahay nagpadayon pinaagig e-mail.

Si Gloria nakig-estorya usab kang Saron, usa ka estudyante nga taga-Washington, D.C., nga nagtabang sa nitibong mga babaye sa Oaxaca nga maoy gikinahanglan aron makatapos sa iyang master’s degree. Human sa paghatag ug komendasyon kang Saron sa iyang pagtabang, gisaysay ni Gloria kon unsay iyang gihimo sa Mexico. Miresulta kini ug maayong panag-estorya bahin sa Bibliya ug kon unsay buhaton sa Diyos dili lamang sa mga kabos kondili sa tanan. Si Saron miingon nga nakakatawa siya kay bisan tuod dili gayod siya makig-estorya sa mga Saksi didto sa Tinipong Bansa, ang usa sa una niyang nahimamat sa Mexico maoy Saksi ni Jehova! Si Saron midawat ug pagtuon sa Bibliya ug nagsugod dihadiha sa pagtambong sa Kristohanong mga tigom.

Daghang langyaw ang namalhin ug puyo sa mga baybay nga bakasyonan sa Mexico, nga nangandoy ug samag paraiso nga lugar. Gigamit ni Laurel kini nga pangandoy aron makasugod ug mga panag-estorya didto sa Acapulco, nga nangutana sa mga tawo kon mora bag paraiso ang Acapulco kon itandi sa dapit nga ilang gigikanan ug kon unsay ilang nagustohan niini. Dayon iyang ipatin-aw nga sa dili madugay ang tibuok yuta mahimo unyang tinuod nga paraiso. Kini nga paagi sa pagpakig-estorya sa usa ka babayeng taga-Canada nga iyang nahimamat sa opisina sa usa ka beterinaryo miresulta ug pagtuon sa Bibliya. Dili kaha epektibo usab kini nga paagi diha sa dapit nga imong ginapuy-an?

‘Sa Kadalanan ug sa mga Plasa’

Kasagarang masugdan ang panag-estorya diha sa kadalanan ug mga plasa pinaagi sa pagpangutana: “Makasulti ka ba ug Iningles?” Daghang Mexicano ang makasulti ug Iningles tungod sa ilang trabaho o tungod kay nakapuyo sila sa Tinipong Bansa.

Giduol sa magtiayong Saksi ang usa ka tigulang nga babayeng nag-wheelchair nga ginatulod sa usa ka nars. Ilang gipangutana ang babaye kon makasulti ba siya ug Iningles. Makasulti siyag Iningles tungod kay dugay siyang nagpuyo sa Tinipong Bansa. Siya midawat sa Ang Bantayanang Torre ug Pagmata!, nga wala pa siya makasulay pagbasa sukad, ug gipailaila niya ang kaugalingon nga siya si Consuelo ug gihatagan niya sila sa iyang adres. Sa dihang ilang giadto ang maong adres paglabay sa upat ka adlaw, ilang nasayran nga puy-anan diay kadto sa mga tigulang nga gidumala sa Katolikong mga madre. Sa primero lisod nga makontak si Consuelo tungod kay natahap ang mga madre ug miingon nga dili sila maatubang ni Consuelo. Ang magtiayon miinsistir sa mga madre sa pagsulti kang Consuelo nga mobisita sila ug gustong mangomosta kaniya. Gipadayon ni Consuelo ang magtiayon. Sukad niadto, kining 86-anyos nga tigulang nga babaye maikagon sa regular nga pagtuon sa Bibliya, bisan pa sa negatibong mga komento sa mga madre. Nakatambong na sab siya ug pipila ka Kristohanong mga tigom.

Ang Proverbio 1:20 nag-ingon: “Ang matuod nga kaalam nagasinggit sa makusog diha sa dalan. Diha sa mga plasa kini nagapatugbaw sa iyang tingog.” Matikdi kon sa unsang paagi kana nahitabo sa plasa sa San Miguel de Allende. Sayo sa buntag niana, giduol ni Ralph ang usa ka edarang lalaki nga naglingkod sa bangko. Nakurat kaayo ang lalaki nga gitanyagan ug Ang Bantayanang Torre ug Pagmata! ug iyang giasoy kang Ralph ang iyang sugilanon.

Beterano siya sa gubat sa Vietnam ug tungod sa kaguol nga nakakitag daghan kaayong nangamatay, siya gitugkan ug nerbiyos dihang sundalo pa siya. Gikan sa panggubatan, gibalhin siya ngadto sa kampo. Didto, gihatagan siya ug trabaho sa paghinlo sa patayng mga lawas sa mga sundalo agig pag-andam niini aron ipadala sa Tinipong Bansa. Karon, 30 ka tuig nang milabay, kanunay gihapon siyang uromon ug makuyawan. Nianang buntaga, samtang naglingkod diha sa plasa, siya hilom nga nag-ampo nga nangayog tabang.

Gidawat sa beterano ang literatura ug ang pagdapit sa pagtambong sa Kingdom Hall. Human makatambong sa tigom, siya miingon nga sulod sa duha ka oras diha sa Kingdom Hall, iyang nabati ang kalinaw sa unang higayon sa 30 ka tuig. Kining tawhana miduaw sa San Miguel de Allende sa pipila lang ka semana, apan napahimuslan niya ang daghang pagtuon sa Bibliya ug nagtambong sa tanang tigom hangtod nga mipauli siya. Dihay gihimong kahikayan aron mapadayon ang iyang pagtuon.

Di-Pormal nga Pagsangyaw sa Trabahoan ug Tunghaan

Isulti mo ba sa imong mga kauban sa trabaho nga Saksi ni Jehova ka? Gihimo kini ni Adrián, nga nagtanyag ug mga apartment nga paabangan sa mga bakasyonista sa Cape San Lucas. Tungod niini, ang iyang kauban sa trabaho nga si Judy miasoy: “Sa miaging tulo ka tuig, kon dunay moingon nako nga mag-Saksi ni Jehova ko, ako gayong ingnan, ‘Inigputi sa uwak!’ Apan gusto kong mobasa ug Bibliya. Sa akong hunahuna, ‘Dili ni lisod, kay ganahan man kong mobasa.’ Apan, mga unom pa lang gani ka panid ang akong nabasa nakita ko nga nagkinahanglan ko ug tabang. Ang ako rang mahunahunaan nga makatabang nako mao ang kauban sa trabaho nga ginganlag Adrián. Gusto kong makig-estorya niya kay siya ra ang desenteng tawo didto.” Misugyot dayon si Adrián sa pagduaw kaniya uban sa iyang trato, si Katie, ug sa pagtubag sa tanang pangutana ni Judy. Gisugdan ni Katie ang pagtuon sa Bibliya uban niya, ug wala madugay si Judy nahimong bawtismadong Saksi.

Ikaw ba makasangyaw sa di-pormal nga paagi diha sa tunghaan? Duha ka Saksi ang nagtuon ug Kinatsila diha sa unibersidad apan wala moeskuyla ug usa ka adlaw aron sa pagtambong ug Kristohanong asembliya. Sa pagbalik nilag eskuyla, gisugo sila sa pag-asoy sa Kinatsila kon unsay ilang gihimo. Ilang gipahimuslan ang higayon sa pagsangyaw sa Kinatsila kutob sa ilang maarangan. Ang maestra, si Silvia, interesado kaayo bahin sa tagna sa Bibliya. Midawat siya ug pagtuon sa Bibliya sa Iningles ug karon usa na ka magmamantala sa maayong balita. Daghang membro sa iyang pamilya nagtuon na usab. Si Silvia miingon: “Nakaplagan na nako ang dugay na nakong gipangita sa tibuok kong kinabuhi.” Oo, ang di-pormal nga pagsangyaw makapatungha ug maayong bunga.

Naggamit sa Ubang Kahigayonan

Ang pagkamaabiabihon motultol sa paghatag ug pamatuod. Nahitabo kana kang Jim ug Gail, nga nag-alagad sa San Carlos, Sonora. Usa ka babaye nga nagsuroy sa iyang mga iro sa alas 6:00 s.b. mihunong sa pagtan-aw sa nindot nilang lagwerta. Gidapit siya ni Jim ug Gail aron mangape. Sa unang higayon sa 60 ka tuig, siya nakadungog bahin kang Jehova ug sa paglaom sa kinabuhing walay kataposan. Nasugdan ang usa ka pagtuon sa Bibliya.

Si Adrienne usab maluloton sa mga estranghero. Nagkaon siya sa usa ka restawran sa Cancún sa dihang giduol siya sa usa ka batang lalaki nga nangutana kon siya ba taga-Canada. Sa dihang mitubag siya ug oo, ang bata miingon nga siya ug ang iyang inahan naningkamot sa pagtabang sa iyang igsoong babaye sa paggamag report sa klase bahin sa mga taga-Canada. Ang inahan, nga makamaong mo-Iningles, miduol. Human nga mapailobong gitubag ang iyang mga pangutana bahin sa mga taga-Canada, si Adrienne miingon: “Apan dunay importante kaayong rason kon nganong mianhi ko dinhi gikan sa Canada—sa pagtabang sa mga tawo sa pagbaton ug kahibalo bahin sa Bibliya. Interesado ka bang makabaton ug kahibalo bahin niini?” Ang babaye mitubag nga interesado siya. Napulo ka tuig na nga wala siya magsimba ug naningkamot sa pagtuon sa Bibliya sa iyang kaugalingon. Iyang gihatag kang Adrienne ang iyang adres ug numero sa telepono, ug nasugdan ang usa ka makapatagbaw nga pagtuon sa Bibliya.

“Ilabay ang Imong Tinapay Ibabaw sa Katubigan”

Ang paghisgot bahin sa kamatuoran sa Bibliya sa tanang higayon sagad nga moresulta ug pagsangyaw ngadto sa mga tawo nga gamay ra o walay higayon nga makadungog sa mensahe sa Gingharian. Diha sa usa ka puliki nga painitan sa dunggoanang lungsod sa Zihuatanejo, gidapit sa usa ka Saksi ang duha ka langyaw sa paglingkod uban niya diha sa lamesa, kay puno ang painitan. Kini nga magtiayon nagsigeg biyahe sa nagkalainlaing mga dapit sa pito na ka tuig. Ilang gisulti ang ilang negatibong hunahuna bahin sa mga Saksi ni Jehova. Human sa maong panagkita sa painitan, giduaw sa Saksi ang magtiayon diha sa ilang barko ug gidapit sila sa iyang balay. Sila midawat ug kapin sa 20 ka magasin ug 5 ka libro ug misaad sa pagkontak sa mga Saksi sa sunod pantalan nga ilang dunggoan.

Namatikdan ni Jeff ug Deb ang usa ka pamilya nga may matahom nga batang babaye diha sa kan-anan sa shopping center sa Cancún. Sa dihang mikomento sila bahin sa bata, gidapit sila sa ginikanan sa bata nga mangaon ug pizza. Ilang nasayran nga taga-India diay ang maong pamilya. Wala pa sila makadungog sukad bahin sa mga Saksi ni Jehova, ni makakita sa ilang literatura. Paghawa nila sa shopping center may dala na sila nga pipila ka publikasyon sa Saksi.

Sama usab niini ang nahitabo diha sa isla duol sa baybay sa Yucatán. Gihangyo sa usa ka bag-ong minyo nga magtiayong Insek si Jeff sa pagletrato kanila, ug nalipay siya sa paghimo niini. Dayon iyang nasayran nga bisag nagpuyo sila sa Tinipong Bansa sulod na sa 12 ka tuig, sila wala pa gayod makakita o makadungog sukad bahin sa mga Saksi ni Jehova! Usa ka bibo nga panag-estoryahay ang misunod. Gidasig sila ni Jeff sa pagkontak sa mga Saksi inig-uli nila.

Tingali dunay espesyal nga okasyon nga himoon diha sa imong lugar nga magbukas ug higayon alang sa di-pormal nga pagsangyaw. Sa dihang ang presidente sa Tinipong Bansa miduaw sa presidente sa Mexico diha sa iyang ranso duol sa Guanajuato, ang mga reporter gikan sa tanang bahin sa kalibotan nangabot aron sa pagkobre sa maong okasyon. Gipahimuslan sa usa ka pamilyang Saksi kini nga higayon aron makasangyaw sa Iningles. Maayo ang pagsanong. Pananglitan, dihay usa ka reporter nga nakakobre na ug daghang gubat, sama sa nahitabo sa Kosovo ug Kuwait. Usa ka kauban namatay diha sa iyang mga bukton mismo tungod kay gipusil sa esnayper. Sa pagkadungog bahin sa pagkabanhaw, ang reporter mihilak nga nagpasalamat sa Diyos kay gitugotan siya sa pagbaton ug kasayoran nga aduna diay katuyoan ang kinabuhi. Siya miingon nga bisan ug dili na sila magkita pag-usab sa magtiayong Saksi, kining maayong balita gikan sa Bibliya iya gayong tipigan diha sa iyang kasingkasing.

Sama sa gipakita sa nahisgotang mga eksperyensiya, ang sangpotanan sa maong mga pagsangyaw kasagarang dili mahibaloan. Bisan pa niana, ang maalamong si Haring Solomon miingon: “Ilabay ang imong tinapay ibabaw sa katubigan, kay sa paglabay sa daghang adlaw kini imong makaplagan pag-usab.” Miingon usab siya: “Sa buntag ipugas ang imong binhi ug hangtod sa gabii ayaw papahulaya ang imong kamot; kay ikaw wala masayod kon diin kini magmalamposon, dinhi man o didto, o kon silang duha sama nga mahimong maayo.” (Ecclesiastes 11:1, 6) Oo, pagkugi sa ‘paglabay sa imong tinapay’ ibabaw sa daghang katubigan ug dagaya nga “ipugas ang imong binhi,” sama sa gihimo ni Pablo ug Jesus ug niining modernong-adlaw nga mga Saksi sa Iningles-ug-sinultihan nga teritoryo sa Mexico.