Gikinahanglan ba ang Mapuslanong Tambag?

KARON, daghan ang nagtuo nga may katakos sila sa pag-ila sa maayo ug daotan ug may katungod sila sa pagbuhat ug bisan unsa nga gusto nila. Ang uban nag-ingon nga puwedeng buhaton ang bisan unsang butang basta makapalipay kini sa tawo. Kini dako kaayog epekto sa kaminyoon ug sa kinabuhing pamilyahanon, nga dugay nang giisip nga pangunang mga gambalay sa katilingban sa tawo.—Genesis 3:5.

Tagda si Verónica,a nga nagpuyo sa Mexico. Siya misugilon: “Sa hapit na ang among ika-15 nga anibersaryo sa kasal, gisultihan ako sa akong bana nga siya dunay laing baye. Siya miingon nga sanglit kining babayhana mas batan-on ug nakapalipay kaniya, dili niya kini biyaan. Morag dili ko makatuo nga ang akong kinasuorang higala dili na nako makauban kanunay. Abi nako kaniadto nga ang kamatayon sa atong mga minahal mao ang makahatag ug kinagrabehang kaguol. Apan para nako, ang pagpanapaw mas makapaguol tungod kay wala lang ako mawad-i sa tawong akong gihigugma pag-ayo kondili siya padayon nga nagahimo sa mga butang nga makasakit kanako.”

Tagda usab ang kahimtang sa 22-anyos nga lalaking diborsiyado nga dunay anak nga lalaki apan dili gustong moabaga sa iyang mga responsibilidad ingong amahan. Siya nagsalig sa iyang inahan nga maoy moatiman kaniya ug sa iyang anak. Kon ang iyang inahan dili mosugot sa tanan nga iyang pangayoon, mapungot siya ug mamalikas, nga samag walay-batasang anak. Ang iyang inahan walay mahimo nianang mangil-ad nga batasan.

Kini dili talagsaon nga mga kahimtang. Ang legal nga panagbulag ug diborsiyo komon na bisan diin. Daghang bata ang nakaeksperyensiya nga usa sa ilang mga ginikanan mibiya sa panimalay aron magsugod ug laing kinabuhi. Ang ubang mga batan-on nawad-an na ug pagtahod sa uban, lakip na sa ilang mga ginikanan, ug naghimog mga butang nga halos dili mahanduraw nga himoon sa mga batan-on kaniadto. Ang pag-eksperimento sa sekso, pag-abuso sa droga, pag-atake sa mga batan-on, ug pagpatay sa kabataan sa ilang mga magtutudlo o mga ginikanan naandan na diha sa daghang kayutaan. Ug tingali nakamatikod ka nga dili lang ang pagmatutog bata ug kaminyoon ang nag-atubang ug mga problema sa kalibotan karon.

Samtang kita nagtan-aw niini nga mga panghitabo, tingali matingala kita kon unsa nay nagakahitabo sa katilingban. Kon tinuod nga nahibalo ang mga tawo kon unsay maayo ug daotan, nganong wala gihapon masulbad ang daghan kaayong problema? Kita ba nagkinahanglan ug mapuslanong tambag? Aduna bay makahatag nianang mapuslanong tambag, usa nga napamatud-ang kasaligan? Bisan tuod daghan ang nag-ingon nga motuo sila sa Diyos ug sa iyang sinulat nga Pulong, kini daw wala makaimpluwensiya sa ilang mga desisyon. Apan unsang mga kaayohan ang atong makuha kon kita mangayog tambag sa Diyos? Atong hisgotan kana sa sunod nga artikulo.

[Footnote]