Paglaom Taliwala sa Kalisdanan—Usa ka Asembliya sa Kampo sa mga Kagiw
ANG kampo sa mga kagiw sa Kakuma anaa sa amihanang bahin sa Kenya, duol sa utlanan sa Sudan. Kini gipuy-ag kapin sa 86,000 ka tawo. Ang maong dapit maoy uga kaayo, nga sa maadlaw ang temperatura makaabot pag 50°C. Kaylap ang kabangisan taliwala sa mga kagiw. Ang daghan sa kampo nawad-an nag paglaom. Hinuon, adunay pipila nga nagmalaomon.
Ubay-ubayng Saksi ni Jehova ang nahilakip sa mga kagiw, nga madasigong nagsangyaw sa maayong balita sa Gingharian. Sila maoy sakop sa usa ka gamayng kongregasyon sa Lodwar, nga maoy 120 kilometros pahabagatan gikan sa kampo. Ang sunod nga kongregasyon maabot sa walo ka oras nga pagdrayb.
Sanglit ang mga kagiw dili libreng makabiyahe sa gawas sa kampo, ang daghan dili makatambong sa mga asembliya ug kombensiyon nga gipahigayon sa mga Saksi ni Jehova. Tungod niini, gihikay nga ang usa ka adlaw sa espesyal nga asembliya pagahimoon sulod sa kampo.
Pagbiyahe Paingon sa Amihanan
Aron masuportahan ang asembliya, 15 ka Saksi sa lungsod sa Eldoret, nga maoy 480 kilometros sa habagatan sa kampo, miboluntaryo sa paghimo sa lisod nga biyahe paingon sa uga kaayo nga dapit sa amihanan, uban sa usa ka estudyante sa Bibliya nga nagpagamit sa iyang gamayng bus ug drayber. Ang kinasingkasing nilang tinguha mao ang pagdasig ug pagpalig-on sa ilang kaigsoonan.
Nagsugod ang biyahe sa matugnaw ug sayong kabuntagon sa kabukiran sa kasadpang Kenya. Libaongon kaayo ug tungason ang dalan agi sa kaumahan ug kalasangan una molugsong sa kabugangan sa mainit nga desyerto. Nanibsib sa umaw nga yuta ang mga panon sa kanding ug kamelyo. Nagbaktas ubay sa dalan ang mga nitibong nagsul-ob sa ilang naandang besti, nga daghan kanila nagdalag mga puspos, mga pana, ug mga udyong. Human sa pagbiyaheg 11 ka oras, ang mga Saksi nakaabot sa Lodwar, nga maoy mainit ug abogong dapit nga adunay halos 20,000 ka tawo. Human sa mainitong pag-abiabi sa lokal nga mga Saksi, ang mga biyahedor natulog aron sila maandam alang sa kalihokan sa hinapos sa semana.
Pagkabuntag, ang mga bisita nanuroy aron motan-aw sa pipila ka talan-awon sa maong dapit. Ang Lanaw Turkana, nga maoy kinadak-ang lanaw sa Kenya, kinahanglang unahon nila sa pagtan-aw. Kay gilibotan ug daghang kilometro nga desyertong kamingawan, kini maoy puy-anan sa labing daghang buaya sa kalibotan. Ang alkaline nga katubigan nakatabang pagsuportar sa pipila ka tawo nga nagpuyo sa daplin sa lanaw. Gipahimuslan sa mga bisita ang kagabhion pinaagi sa pagtambong sa Tunghaan sa Teokratikanhong Ministeryo ug sa Tigom sa Pag-alagad kauban sa lokal nga kongregasyon. Sila adunay nindot nga Kingdom Hall, nga gitukod sa tuig 2003 ingong usa sa mga proyekto sa programa sa konstruksiyon sa mga Saksi alang sa kabos nga mga nasod.
Ang Adlaw sa Espesyal nga Asembliya
Ang Dominggo gigahin alang sa adlaw sa espesyal nga asembliya. Ang Lodwar nga Kongregasyon ug ang bisitang mga igsoon gitugotan pagsulod sa kampo pagka-alas 8:00 s.b., busa ang mga Saksi maikagon nga mosugod ug sayo. Among gisubay ang naglikolikong dalan agi sa umaw nga dapit paingon sa utlanan sa Sudan. Nagbuntaog ang gansangong kabukiran ibabaw sa dalan. Ang talan-awon miluag sa pagkaabot na sa balangay sa Kakuma. Nag-ulan niadto, ug gibahaan ang pipila ka bahin sa dili-sementadong dalan paingon sa kampo. Ang kadaghanang balay hinimo sa yuta nga tisa ug inaptan ug sin o lona. Ang mga grupo sa mga Etiopiano, taga-Somalia, taga-Sudan, ug uban pa may kaugalingong gipuy-ang mga lugar. Ang mga kagiw madasigong nag-abiabi sa mga bisita.
Ang asembliya gihimo sulod sa bansayanang sentro. Dihay mga dibuho sa bungbong nga naghulagway sa makalilisang nga mga hitabo sa kinabuhi sa kagiw, apan ang pagkamalaomon maoy naghari niadtong adlawa. Ang matag pakigpulong gipahayag sa Iningles ug Swahili. Ang pipila ka mamumulong nga larinong mosulti sa duha ka pinulongan nagpahayag diha sa duha ka pinulongan. Usa ka igsoong kagiw nga taga-Sudan maoy mihatag sa unang pakigpulong, “Pagsusi sa Atong Simbolikong Kasingkasing.” Ang ubang mga bahin gipahayag sa bisitang mga ansiyano.
Ang bawtismo maoy usa ka espesyal nga bahin sa matag asembliya. Pagkatapos sa diskurso sa bawtismo, ang tanang mata gipunting sa usa ka kandidato sa dihang siya mitindog. Si Gilbert mikagiw kauban sa iyang amahan gikan sa ilang pinuy-anang nasod panahon sa pagmasaker sa usa ka kaliwat didto sa 1994. Sa sinugdan, ilang gidahom nga dili na sila mameligro sa Burundi, apan sa wala madugay naamgohan nila nga sila nameligro pa. Si Gilbert mikagiw ngadto sa Zaire, dayon ngadto sa Tanzania—nga may mga higayon nga nagtago sa lasang—ug sa kataposan ngadto sa Kenya. Nakahilak ang daghan samtang siya giabiabi sa mamumulong ingong usa ka igsoon sa kongregasyon. Samtang nagtindog atubangan sa gamayng asembliya nga may 95 ka tawo, si Gilbert tin-aw ug masaligong mitubag “Ndiyo!”—ang Swahili alang sa “Oo!”—sa duha ka pangutana sa mamumulong. Siya ug ang pipila ka igsoon nagkalot nga kinamot ug gamayng lungag ug kana gihanigan ug lona nga atop kaniadto sa iyang puy-anan sa kampo. Sa pagpasundayag sa iyang kaikag nga mabawtismohan, niadtong buntaga siya ang naghakot ug tubig ginamit ang timba ug gipuno ang maong lungag, nga siya lang usa ang naghakot!
Usa sa hinungdanong mga bahin sa sesyon sa hapon mao ang pag-asoy ug mga kasinatian bahin sa talagsaong kahimtang sa mga Saksing kagiw. Usa ka brader nagsaysay kon giunsa niya pagduol ang usa ka lalaking nagpahulay sa silong sa kahoy.
“Alang kanimo, tanang panahon ba nga layo ka sa kapeligrohan samtang naglingkod sa silong sa kahoy?”
“Oo,” tubag sa lalaki. Unya siya midugang pag-ingon, “Apan dili, dili hinuon kon gabii.”
Unya gibasa sa brader ang Miqueas 4:3, 4: “Sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila.” “Abi mo,” siya misaysay, “sa bag-ong kalibotan sa Diyos, layo na ta sa kapeligrohan sa tanang panahon.” Ang lalaki midawat ug basahong makatabang sa pagtuon sa Bibliya.
Usa ka sister nga mibiyahe paingon sa Kakuma bag-o rang namatyan ug tulo ka membro sa pamilya. Sa pagkomento bahin sa mga igsoon diha sa kampo, siya miingon: “Kini maoy lisod kaayo nga dapit; bisan pa niana, ilang nahuptan ang lig-ong pagtuo. Sila nagpuyo sa mamingawong dapit, apan sila malipayong nag-alagad kang Jehova. Sila adunay malinawong relasyon uban sa Diyos. Nadasig ako nga magmakigdaiton ug mag-alagad kang Jehova. Wala akoy katarongan sa pagreklamo!”
Ang adlaw sa asembliya dali kaayong natapos. Sa kataposang pakigpulong, gipahayag sa mamumulong nga ang mga tumatambong naggikan sa walo ka nagkalainlaing nasod. Usa sa mga Saksing kagiw miingon nga ang maong asembliya maoy pamatuod sa panaghiusa ug gugma taliwala sa mga Saksi ni Jehova diha sa wala-mahiusa nga kalibotan. Ang ilang pagkamagsoon maoy tinuod nga Kristohanong pag-igsoonay.—Juan 13:35.
[Kahon/Hulagway sa panid 25]
NASALAAG NGA MGA BATA NGA TAGA-SUDAN
Sukad sa pagsugod sa gubat sibil sa Sudan niadtong 1983, lima ka milyong tawo ang nawad-an ug puy-anan. Nalakip kanila maoy mga 26,000 ka batang lalaki, nga nabulag sa ilang mga pamilya. Kaliboan ang midangop sa mga kampo sa mga kagiw sa Etiopia, diin sila nagpabilin ug mga tulo ka tuig. Kay napugos sa pagbalhin na usab, mibaktas silag usa ka tuig pabalik sa Sudan ug mipaingon sa amihanang Kenya, nga gidaot sa mga sundalo, tulisan, sakit, ug sa ihalas nga mga hayop. Katunga lang sa mga bata ang nakalahutay nianang lisod nga mga biyahe, nga sa kadugayan sila nahimong dakong bahin sa Kakuma nga kampo. Alang sa mga ahensiya sa hinabang, sila nailhang nasalaag nga mga bata nga taga-Sudan.
Ang kampo sa mga kagiw sa Kakuma maoy puy-anan karon sa mga kagiw gikan sa daghang nasod sama sa Sudan, Somalia, Etiopia, ug ubang nasod. Sa pag-abot sa kampo, ang kagiw hatagan ug pila ka materyales nga gikinahanglan sa pagpatindog ug balay ug lona para atop. Kaduha sa bulan, ang matag kagiw hatagan ug mga 6 ka kilong harina, 1 ka kilong balatong, ug diyutayng mantika ug asin. Ibaylo sa daghang kagiw ang pipila nila ka rasyon aron makabaton sa ubang mga kinahanglanon.
Ang pipila sa nasalaag nga mga bata nahiusa pag-usab sa ilang mga pamilya o sila nagpuyo sa laing mga nasod. Apan sumala sa Buhatan sa Pagpahiluna Pag-usab sa Kagiw, “kaliboan pa ang nagpabilin diha sa abogon, punog-langaw nga kampo sa kagiw sa Kakuma, diin sila kinahanglang managinot intawon ug pagkaon ug maningkamot nga makaeskuyla.”
[Credit Line]
Courtesy Refugees International
[Mapa sa panid 23]
(Alang sa aktuwal nga pagkahan-ay, tan-awa ang publikasyon)
KENYA
Kampo sa Kakuma
Lanaw Turkana
Lodwar
Eldoret
Nairobi
[Hulagway sa panid 23]
Lisod ang kinabuhi sa kampo
[Hulagway sa panid 23]
Ang tubig girasyon sa kampo sa Kakuma
[Hulagway sa panid 23]
Ang mga Saksing taga-Kenya mihimo sa lisod nga biyahe paamihanan aron sa pagdasig sa ilang kaigsoonan
[Hulagway sa panid 24]
Usa ka misyonaryong naghubad sa usa ka pakigpulong sa lokal nga espesyal payunir
[Hulagway sa panid 24]
Bawtismohanang linaw
[Picture Credit Line sa panid 23]
Rationing water and Kakuma Refugee Camp: Courtesy Refugees International