“Ang Akong Tabang Nagagikan Kang Jehova”

Ang Pagsakripisyo-sa-Kaugalingon Magdalag Panalangin ni Jehova

GITADLAS sa usa ka lalaki sakay sa bisikleta ang bagang kalasangan sa Cameroon. Sulod sa daghang oras iyang gilatas ang gibahaan ug lapokon nga kadalanan, nga gisagubang ang kapeligrohan aron makapalig-on sa uban. Gibaktas sa duha ka igsoong lalaki sa Zimbabwe ang mga 15 kilometros agi sa nagbahang mga suba, nga naglukdo sa ilang mga sinina ug sapatos aron dili mabasa, aron matudloan ang usa ka aysoleted nga grupo. Sa lain pang lugar, usa ka babaye ang mobangon ug alas kuwatro sa kadlawon aron duawon ug tudloan ang usa ka nars nga nianang mga orasa lang puwede siyang magtuon sa Bibliya.

Sa unsang paagi managsama ang maong tulo ka pananglitan? Silang tanan maoy mga bug-os-panahong ministro sa mga Saksi ni Jehova nga nagapakigbahin sa buluhatong pagpanudlo sa kamatuoran sa Bibliya. Lakip kanila mao ang mga regular ug espesyal payunir, mga misyonaryo, nagapanawng mga magtatan-aw, ug libolibo ka boluntaryo sa panimalayng Bethel sa tibuok kalibotan. Ug silang tanan nailhan ingong masakripisyohon sa kaugalingon.a

Hustong Motibo

Ginatuman sa mga Saksi ni Jehova ang giawhag ni apostol Pablo ngadto kang Timoteo: “Buhata ang kutob sa imong maarangan nga itanyag ang imong kaugalingon sa Diyos ingong inuyonan, usa ka mamumuo nga walay angayng ikaulaw, nga nagagamit sa pulong sa kamatuoran sa hustong paagi.” (2 Timoteo 2:15) Apan unsay nagtukmod sa ginatos ka libong mga Saksi sa pag-alagad ingong bug-os-panahong mga ministro?

Sa dihang pangutan-on ang bug-os-panahong mga ministro kon nganong makugihon kaayo sila sa pag-alagad kang Jehova, ang ilang tubag naglangkit sa gugma alang sa Diyos ug sa isigkatawo. (Mateo 22:37-39) Labing haom kini, tungod kay kon walay gugma ingong panukmod, ang bisan unsang paningkamot walay kapuslanan.—1 Corinto 13:1-3.

Pag-alagad nga Nagsakripisyo sa Kaugalingon

Ang tanang dedikadong mga Kristohanon midawat sa awhag ni Jesus: “Kon adunay buot mosunod kanako, padumilia siya sa iyang kaugalingon ug ipapas-an ang iyang estaka sa pagsakit ug magpadayon sa pagsunod kanako.” (Mateo 16:24) Ang pagdumili sa kaugalingon nagpasabot nga kita kinabubut-ong magtugyan sa atong kaugalingon aron mapanag-iya ug matultolan ni Jehova nga Diyos ug ni Jesu-Kristo. Alang sa daghan, kini mitultol ngadto sa pag-alagad nga nagsakripisyo sa kaugalingon diha sa bug-os-panahong ministeryo.

Daghang Saksi ang naningkamot pag-ayo sa pagpalapad sa ilang pag-alagad kang Jehova. Tagda ang 56-anyos nga si Júlia, usa ka regular payunir sa São Paulo, Brazil. “Usa ka Insek nga brader ang mitawag sa telepono ug nangutana kanako kon andam ba akong magtuon ug Ininsek,” nahinumdom siya. “Tungod sa akong pangedaron, wala na ko maghunahuna pang magtuon ug bag-ong pinulongan. Apan paglabay sa pipila ka adlaw, gidawat nako ang maong malisod nga buluhaton. Karon, makahatag na kog Kasulatanhong mga presentasyon diha sa Ininsek.”

Ang sangang buhatan sa mga Saksi ni Jehova sa Peru nagtaho: “Sa di pa dugayng katuigan, ginatos ka regular payunir ang namalhin ngadto sa wala-pa-maasayn nga mga teritoryo, nga nagpakitag maisogon ug nagasakripisyo-sa-kaugalingon nga espiritu. Sila namalhin ngadto sa lagyong mga lungsod nga walay modernong mga kasangkapan ug lisod pa ang panginabuhian. Kining mga igsoona andam sa pagbuhat kutob sa maarangan aron makapabilin sa ilang mga asaynment. Apan labing hinungdanon, may maayong mga resulta ang ilang kalihokan diha sa ministeryo sa nagkalainlaing dapit. Ang nagapanawng mga magtatan-aw mitaho nga naporma ang bag-ong mga grupo sa tabang niining masakripisyohon-sa-kaugalingon nga mga regular payunir.”

Gipameligro sa pipila ka Kristohanon ang ilang kinabuhi aron makatabang sa ilang isigkamagtutuo. (Roma 16:3, 4) Usa ka magtatan-aw sa sirkito sa usa ka naggubatay nga lugar sa Aprika mitaho: “Sa wala pa mi makaabot sa kataposang barikada tali sa mga teritoryo sa mga rebelde ug sa teritoryo nga gikontrolar sa gobyerno, ang akong asawa ug ako gilibotan sa upat ka pangulo sa rebeldeng mga sundalo ug sa ilang mga badigard, nga nangutana kon kinsa kami. Samtang gisusi ang among mga papeles, ilang nakita nga gikan kami sa lugar nga gikontrolar sa gobyerno, busa natahap sila kanamo. Giakusahan kong espiya. Busa, nakahukom silang itambog ko sa gahong. Gipatin-aw nako kon kinsa kami, ug sa kadugayan gipalakaw ra nila kami.” Mapasalamaton gayod ang mga kongregasyon nga kining masakripisyohon-sa-kaugalingon nga magtiayon milampos sa pagduaw kanila!

Bisan pa sa malisod nga mga kahimtang nga ilang nasinatian, nagkadaghan ang bug-os-panahong mga ministro sa tibuok kalibotan. (Isaias 6:8) Gimahal niining makugihong mga payunir ang ilang pribilehiyo sa pag-alagad kang Jehova. Uban sa samang espiritu sa pagsakripisyo-sa-kaugalingon, milyonmilyon pa ang nanagdayeg karon kang Jehova. Sa baylo, siya dagayang nagapanalangin kanila. (Proverbio 10:22) Kay masaligon sa padayong panalangin ug pagpaluyo, ang maong makugihong mga payunir nagpadayag sa tinamdan sa salmista kinsa miawit: “Ang akong tabang nagagikan kang Jehova.”—Salmo 121:2.

[Footnote]

[Blurb sa panid 9]

“Ang imong katawhan magatanyag sa ilang kaugalingon nga kinabubut-on sa adlaw sa imong puwersa militar.”—SALMO 110:3

[Kahon sa panid 8]

GIMAHAL NI JEHOVA ANG IYANG DEBOTADONG MGA ALAGAD

“Magmalig-on, dili matarog, nga kanunayng puliki diha sa buluhaton sa Ginoo, nga nahibalo nga ang inyong paghago dili makawang may kalabotan sa Ginoo.”—1 Corinto 15:58.

“Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.”—Hebreohanon 6:10.