Kon Unsaon Pagsilsil ang Gugma Alang sa Diyos Diha sa Kasingkasing sa Inyong Anak

ANG pag-ugmad ug suod nga relasyon uban kang Jehova nga Diyos maoy usa ka dakong hagit karon alang sa usa ka tawo. (Salmo 16:8) Sumala sa gitagna, kita nagkinabuhi sa “makuyaw nga mga panahong lisod sagubangon.” Ang kadaghanang tawo “mga mahigugmaon sa kalipayan inay nga mga mahigugmaon sa Diyos.” (2 Timoteo 3:1-5) Sa pagkatinuod, talagsaon gayong makaplagan karon ang tiunay nga gugma alang sa Diyos.

Kon buot natong masilsil ang gugma alang sa Diyos diha sa kasingkasing sa usa ka bata, kinahanglan gayod kitang maningkamot sa pagbuhat niana. Kinahanglang masilsil ang gugma alang sa Diyos diha sa kasingkasing sa atong mga anak. Sa unsang paagi mahimo nato kini?

Kinasingkasing nga Komunikasyon

Ikasilsil nato ang gugma alang sa Diyos diha sa kasingkasing sa atong mga anak kon ang ato mismong kasingkasing nahupngan ug gugma alang kaniya. (Lucas 6:40) Mao kini ang gipasabot sa Bibliya sa nag-ingon kini: “Higugmaon mo si Jehova nga imong Diyos sa bug-os mong kasingkasing ug sa bug-os mong kalag ug sa bug-os mong kusog. Ug kining mga pulonga nga akong gisugo kanimo niining adlawa kinahanglan nga maanaa sa imong kasingkasing; ug isilsil mo kini sa imong anak.”—Deuteronomio 6:4-7.

Sa unsang paagi masilsil nato ang gugma alang sa Diyos diha sa kasingkasing sa atong anak? Una, kinahanglang masayran nato kon unsay anaa sa iyang kasingkasing. Ikaduha, kinahanglang ipadayag nato kon unsay anaa sa ato mismong kasingkasing.

Sa dalan paingon sa Emmaus uban sa duha niya ka tinun-an, gidasig una sila ni Jesu-Kristo sa pagpahayag sa ilang mga gilaoman ug mga gikabalak-an. Taudtaod pang namati si Jesus kanila ayha pa niya tul-ira ang ilang panghunahuna pinaagi sa pagpatin-aw sa Kasulatan. Sa ulahi mikomento sila: “Dili ba ang atong mga kasingkasing nagdilaab man samtang nakigsulti siya kanato?” Ang maong kabildohay maoy pananglitan sa kinasingkasing nga komunikasyon. (Lucas 24:15-32) Sa unsang paagi atong masabtan ang pagbati sa atong anak?

Di pa dugay, ang pipila ka ginikanan nga maayong mga panig-ingnan sa pagtuo nga may mga anak nga hamtong na o hapit nang mohamtong karon gipangutana bahin sa kinasingkasing nga komunikasyon. Pananglitan, sa Mexico anaa si Glen nga may upat ka dagko nang mga anak.a Siya miingon: “Ang madayganon nga komunikasyon tali sa mga ginikanan ug mga anak dili awtomatikong mahitabo. Gidesisyonan namong magtiayon nga mogahin lang kamig gamayng panahon sa dili-kaayo kinahanglanong mga kalihokan aron makagahin kamig mas dakong panahon uban sa among mga anak. Sa tin-edyer pa sila, usahay makig-estorya kami kanila sa tibuok gabii bahin sa bisag unsa na lay ilang mahunahunaan. Sa pagpangaon usab, pinaagi sa pagpaminaw sa ilang giestoryahan, among masabtan ang ilang mga suliran ug malulotong tul-iron ang ilang sayop nga mga hilig sa paagi nga sagad dili nila mamatikdan.”

Ang kinasingkasing nga komunikasyon naglangkit usab sa pagpadayag kon unsay anaa sa ato mismong kasingkasing. Si Jesus miingon: “Ang maayong tawo magapagula ug maayo gikan sa maayong bahandi sa iyang kasingkasing, . . . kay gikan sa kadagaya sa kasingkasing ang iyang baba magasulti.” (Lucas 6:45) Si Toshiki, kansang tulo ka anak maoy bug-os-panahong mga ministro sa Hapon, nag-ingon: “Daghang higayon nga gisaysayan ko sila kon nganong nakabaton akog pagtuo kang Jehova—kon nganong lig-on ang akong pagtuo nga siya naglungtad ug kon sa unsang paagi ang ako mismong kaagi sa kinabuhi nakakombinsir kanako nga ang Bibliya tinuod ug maoy kinamaayohang giya sa kinabuhi.” Sa Mexico, si Cindy nag-ingon: “Kanunay kaming mag-ampo uban sa mga bata. Sa dihang ilang madungog ang kinasingkasing nga mga pulong sa ilang amahan, nahibalo sila nga si Jehova dili lang hinanduraw.”

Dakog Impluwensiya ang Atong Panig-ingnan

Ang atong pagkinabuhi mas dako pag epekto kay sa atong mga pulong kay kini magpakita sa atong mga anak kon unsa ka dako ang atong paghigugma sa Diyos. Tungod kay namatikdan sa mga tawo ang pagkamasinugtanon ni Jesu-Kristo kang Jehova, ilang nasabtan ang iyang lalom nga gugma alang sa Diyos. Miingon si Jesus: “Aron nga mahibalo ang kalibotan nga gihigugma ko ang Amahan, sumala gayod sa gisugo kanako sa Amahan nga pagabuhaton, kana ang akong ginabuhat.”—Juan 14:31.

Si Gareth, nga usa ka Saksi ni Jehova sa Wales, mikomento: “Kinahanglang masabtan sa among mga anak nga among gihigugma si Jehova ug nga kami naningkamot sa pagbuhat sa iyang kabubut-on. Pananglitan, masabtan sa akong mga anak nga angkonon ko ang akong mga sayop agig pagsugot sa gisugo sa Diyos kanato. Ang akong mga anak naningkamot usab sa pagbuhat niana.”

Si Greg nga taga-Australia miingon: “Gusto namong masabtan sa among mga anak nga ang kamatuoran mao ang labing hinungdanong butang sa among kinabuhi. Sa dihang modesisyon kami kabahin sa trabaho o kalingawan, among tagdon una kon maapektohan ba ang among Kristohanong mga obligasyon. Nalipay kami nga kini usab ang tinamdan sa among 19-anyos nga anak babaye diha sa iyang pag-oksilyare payunir.”

Pagtabang sa Atong mga Anak nga Makasabot sa Diyos

Kita dili makahigugma o makasalig sa usa ka tawo nga dili nato masabtan. Gusto ni apostol Pablo nga motubo ang gugma sa mga Kristohanon sa Filipos alang sa Diyos mao nga siya misulat: “Mao kini ang padayon ko nga ginaampo, nga ang inyong gugma mosamot pa sa pagdagaya uban ang tukmang kahibalo ug bug-os nga katakos sa pag-ila.” (Filipos 1:9) Si Falconerio, nga nagmatuto ug upat ka anak sa Peru, nag-ingon: “Ang regular nga pagbasa ug pagtuon sa Bibliya uban kanila makapalig-on sa ilang pagtuo. Usahay mapakyas ako sa pagtuon uban kanila, ug akong nakita nga nabugnaw ang ilang gugma alang sa Diyos.” Si Gary nga taga-Australia nag-ingon: “Gipakita ko kanunay sa akong mga anak ang pamatuod nga nagakatuman ang mga tagna sa Bibliya. Ipakita ko usab kanila ang mga kaayohan sa pagpadapat sa mga prinsipyo sa Bibliya. Ang regular namong pagtuon sa Bibliya ingong pamilya nakatabang pag-ayo sa pagpalig-on sa ilang pagtuo.”

Kon ang pagtuon dumalahon sa relaks ug may konsiderasyon nga paagi, ganahan niini ang usa ka bata ug dali ra siyang makakat-on. (Santiago 3:18) “Panahon sa among pagtuon sa Bibliya ingong pamilya, maningkamot kaming dili mangasaba sa mga bata bisan pag sila magpabuyag,” matod ni Shawn ug Pauline sa Britanya nga upat ug anak. “Lainlainon namo ang paagi sa pagdumala sa among pagtuon. Usahay papilion namo ang mga bata kon unsa ang ulohan nga gusto nilang tun-an. Gigamit namo ang mga video nga gigama sa organisasyon ni Jehova. Usahay among balikon ang usa ka bahin sa salida o pahunongon kadiyot aron maestoryahan kana. Sa Britanya gihapon, usa ka inahan nga ginganlag Kim nag-ingon: “Mangandam kog maayo alang sa pagtuon sa pamilya aron makapatungha kog mga pangutana nga makapukaw sa ilang kaisipan. Sadya ang among pagtuon ug sige kamig pangatawa.”

Pagpilig mga Higala

Molambo ang gugma sa atong mga anak alang kang Jehova ug mas pabilhan nila ang matuod nga pagsimba kon kanunay silang kauban sa mga higala sa Diyos. Lisod tingali ang paghikay aron ang atong mga anak may mga higala nga maayong ikaestorya ug ikadula, apan mapuslanon gayod kana. Dugang pa, makaayo sa atong mga anak nga sila makahimamat ug mga Saksi ni Jehova nga naghimo sa bug-os-panahong ministeryo nga ilang karera sa kinabuhi. Daghan kanila ang naghimo niana tungod kay sila nakig-uban sa masibotong mga alagad sa Diyos. Ang usa ka misyonarya nag-ingon: “Tigdapit ang akong mga ginikanan ug mga payunir alang sa pagpangaon. Dayag nga malipayon kaayo sila sa ilang pag-alagad sa Diyos nga buot ko usab nga magpayunir.”

Hinuon, ang impluwensiya diha sa tinamdan sa atong mga anak mahimong maayo o daotan. Busa, ang mga kapeligrohan sa daotang mga kauban magtigi sa mga katakos sa mga ginikanan. (1 Corinto 15:33) Ang pagtudlo sa mga batan-on kon unsaon paglikay sa paglingawlingaw uban sa mga wala mahigugma o wala makaila kang Jehova maoy usa ka kahanas. (Proverbio 13:20) Si Shawn nga naunang gikutlo nag-ingon: “Gitudloan namo ang among mga anak nga magmahigalaon sa ilang mga eskolmet apan kutob ra sa eskuylahan. Nasabtan sa among mga anak kon nganong dili sila angayng mosalmot sa ubang mga kalihokan o sa mga bangga sa dula sa eskuylahan.”

Kon Unsa ka Bililhon ang Pagbansay

Pinaagi sa pagbansay sa atong mga anak sa pagpahayag sa ilang pagtuo sa uban, atong matabangan sila nga malipay sa pagpahayag sa ilang gugma alang sa Diyos. Matod pa ni Mark nga nagpuyo sa Tinipong Bansa: “Buot namong mobatig kalipay ang among mga anak sa pagsangyaw sa uban sa bisan unsang panahon, ug dili lang sa panahong isputing sila aron makigbahin sa pormal nga pagsangyaw. Busa sa dihang moadto kami sa usa ka dapit aron maglingawlingaw, sama sa parke, baybayon, o kalasangan, magdala kamig mga Bibliya ug basahon sa Bibliya ug makigsulti sa mga tawo didto bahin sa among pagtuo. Malingaw gayod ang mga bata sa pagsangyaw uban kanamo nianang paagiha. Sila moapil sa mga panaghisgot ug mopahayag sa ilang pagtuo.”

Daghang tawo ang natabangan sa tigulang nga si apostol Juan aron molambo ang ilang gugma alang sa Diyos. Bahin kanila, siya misulat: “Wala nay labaw nga hinungdan sa akong pagkamapasalamaton kay niining mga butanga, nga akong madungog nga ang akong mga anak nagpadayon sa paglakaw diha sa kamatuoran.” (3 Juan 4) Kon atong isilsil ang gugma alang sa Diyos diha sa kasingkasing sa atong mga anak, seguradong malipay usab kita.

[Footnote]

[Mga hulagway sa panid 9]

Kinahanglang planohon ang kinasingkasing nga pagpakigsulti bahin sa pagtuo

[Hulagway sa panid 10]

Bansaya ang inyong mga anak sa pagpahayag sa ilang gugma alang sa Diyos

[Credit Line]

Courtesy of Green Chimneys Farm