Among mga Magbabasa Nangutana
Ang mga Saksi ni Jehova Usa ba ka Protestanteng Relihiyon?
Ang mga Saksi ni Jehova wala mag-isip nga sila usa ka Protestanteng relihiyon. Nganong wala man?
Ang relihiyong Protestante nagsugod sa Uropa sa ika-16 nga siglo aron sa pagreporma sa Iglesya Romana Katolika. Ang pulong “Protestante” unang gigamit ngadto sa mga sumusunod ni Martin Luther sa usa ka asembliya sa Speyer niadtong 1529. Sukad niadto ang maong pulong nagtumong na sa tanan nga nagtuo sa mga prinsipyo ug katuyoan sa Repormasyon. Ang Merriam-Webster’s Collegiate Dictionary, 11th Edition, naghubit sa Protestante ingong “usa ka membro sa bisan hain sa daghang denominasyon sa relihiyon nga dili motuo sa awtoridad sa Papa ug nagtuo sa mga prinsipyo sa Repormasyon nga ang mga tawo isipong matarong pinaagi lamang sa pagtuo sa Diyos, nga ang tanang magtutuo maoy magwawali, ug nga ang Bibliya maoy bugtong tinubdan sa gipadayag nga kamatuoran.”
Bisan tuod ang mga Saksi ni Jehova dili motuo sa awtoridad sa Papa, ug bug-os nga midawat sa Bibliya ingong bugtong tinubdan sa kamatuoran, sila lahi sa Protestanteng mga relihiyon sa daghang paagi. Ngani, ang The Encyclopedia of Religion nagtumong sa mga Saksi ni Jehova ingong “nalahi.” Tagda ang tulo ka pananglitan nga sila nalahi.
Una, bisan tuod ang Protestanteng mga relihiyon nagsalikway sa pipila ka tulumanon sa pagsimba sa Katolikong relihiyon, ang mga lider sa Repormasyon nagtuo gihapon sa pipila ka doktrina sa Katoliko, sama sa Trinidad, impiyernong-kalayo, ug pagkadili-mamatay sa tawhanong kalag. Apan ang mga Saksi ni Jehova nagtuo nga ang maong mga doktrina maoy supak sa Bibliya ug nga kana nagpasiugdag sayop nga pagtuo bahin sa Diyos.—Tan-awa ang panid 4-7 niining magasina.
Ikaduha, ang gipasiugda sa relihiyon sa mga Saksi ni Jehova mao ang pagpanudlo, dili ang pagprotesta sa usa ka relihiyon. Gisunod nila ang tambag sa Bibliya: “Apan ang ulipon sa Ginoo dili kinahanglang makig-away, kondili kinahanglang magmaluloton sa tanan, maayong magtutudlo, ug mapailobon. Kinahanglan siyang magmalumo sa dihang magatul-id sa mga tawo nga molalis sa iyang mga pulong.” (2 Timoteo 2:24, 25, The Jerusalem Bible) Tinuod, giyagyag sa mga Saksi ni Jehova ang panagsumpaki tali sa giingon sa Bibliya ug sa gitudlo sa daghang relihiyon. Apan ang ilang tumong mao ang pagtabang sa sinserong mga indibiduwal aron sila makabatog tukmang kahibalo bahin sa Diyos ug sa iyang Pulong, ang Bibliya, dili sa pagreporma sa ubang mga relihiyon. (Colosas 1:9, 10) Kon may mga membro sa ubang relihiyon nga mosupak gayod kanila, ang mga Saksi ni Jehova molikay sa pagpakigdebate kay kana walay kapuslanan.—2 Timoteo 2:23.
Ikatulo, lahi sa Protestanteng kalihokan nga nabahin sa ginatos ka denominasyon, ang mga Saksi ni Jehova padayong nagkahiusa ingong organisasyon. Kon bahin sa doktrina sa Bibliya, ang mga Saksi ni Jehova diha sa kapig 230 ka nasod nagsunod sa tambag ni apostol Pablo nga “magasulti nga may panagkauyon.” Walay pagkabahinbahin sa ilang taliwala. Hinunoa, sila bug-os nga ‘nagkahiusa sa samang kaisipan ug sa samang panghunahuna.’ (1 Corinto 1:10) Uban sa ilang mga isigkamagtutuo, sila nanlimbasog nga “mosunod sa pagkausa sa espiritu sa nagahiusang bugkos sa pakigdait.”—Efeso 4:3.