Angay Bang Makakat-on ang mga Anak Bahin sa Diyos?

“Ang relihiyon nag-aghat lang kanato sa pagdumot, apan wala mag-aghat kanato sa paghigugmaay.”—JONATHAN SWIFT, INGLES NGA AWTOR.

GIPAHAYAG kana ni Swift niadtong ika-18ng siglo, apan daghan karon ang mouyon kaniya. Ngani, gituohan sa uban nga ang mga ginikanan walay katungod sa pagtudlo sa ilang mga anak bahin sa Diyos. Ilang gibati nga may disbentaha ang mga anak nga gimatuto sa relihiyosong panimalay.

Unsay imong hunahuna? Hain niini ang labing makataronganon?

● Ang mga ginikanan dili angayng tugotan sa pagtudlo sa mga anak bahin sa Diyos.

● Kinahanglang hulaton sa mga ginikanan nga managko ang mga anak una sila tudloan bahin sa relihiyon.

● Samtang bata pa, kinahanglang tudloan sa mga ginikanan ang mga anak sa ilang gituohan bahin sa Diyos. Apan sa magkahingkod na, kinahanglang tudloan sila nga mangatarongan bahin sa ilang tinuohan.

● Obligadong sundon sa mga anak ang gituohan sa ilang mga ginikanan bahin sa Diyos.

Makadaot ba sa mga Anak ang Relihiyon?

Walay mahigugmaong ginikanan nga gustong madaot ang iyang anak. Apan tinuod ba ang gipangangkon sa uban nga dili angayng tudloan ang mga anak bahin sa Diyos? Daghan nang katuigan nga gitun-an pag-ayo sa mga tigdukiduki ang epekto sa tinuohan sa mga ginikanan ngadto sa ilang mga anak. Unsay ilang gikaingon?

Nakita sa mga tigdukiduki nga inay makadaot ang relihiyon, makaayo kini sa personalidad sa anak. Niadtong 2008, gipatik sa mantalaang Social Science Researcha ang usa ka report nga nag-ingon: “Ang relihiyon nakapalig-on sa bugkos sa mga ginikanan ug mga anak.” Kini usab nag-ingon: “Ang relihiyon ug espirituwalidad mopatim-awng hinungdanon sa kinabuhi sa daghang anak ug sa relasyon sa pamilya.” Matikdi nga susama kini sa giingon ni Jesus: “Malipayon kadtong mahunahunaon sa ilang espirituwal nga panginahanglan.”—Mateo 5:3.

Komosta ang giingon nga ayha pa tudloan ang mga anak bahin sa Diyos ug relihiyon kon sila managko na? Wala nila matagad kini nga kamatuoran: Ang hunahuna sa bata samag bakanteng balde. Ang mga ginikanan makapili kon pun-on ba nila kini diha sa ilang panimalay pinaagig moral nga mga prinsipyo ug pagtulon-an nga ilang gibating haom kanila, o kaha tugotan ang nagkadaiyang opinyon sa gawas sa panimalay nga mopuno sa hunahuna ug kasingkasing sa anak.

Unsa ang Sekreto?

Napamatud-an na nga ang relihiyon makasugnib sa pagdumot. Busa unsay buhaton sa mga ginikanan aron malikayan ang kahimtang nga gihubit ni Jonathan Swift? Unsa nga mga pagtulon-an ang itudlo nila sa ilang mga anak aron sila mahigugma sa uban?

Ang sekreto anaa sa tubag niining tulo ka pangutana: (1) Unsay angayng makat-onan sa mga anak? (2) Kinsay angayng magtudlo kanila? (3) Unsa ang labing epektibong mga paagi sa pagtudlo?

[Footnote]