Dagana nga Malahutayon ang Lumba
“Daganon nato nga malahutayon ang lumba nga gibutang sa atong atubangan.”—HEB. 12:1.
1, 2. Sa unsa gitandi ni apostol Pablo ang Kristohanong pagkinabuhi?
KADA tuig, ginahimo ang mga maraton sa daghang lugar. Ang hawod nga mga magdadagan moapil aron modaog. Apan ang uban malipay na nga makatapos sa lumba.
2 Sa Bibliya, ang Kristohanong pagkinabuhi gitandi sa lumba. Gipasiugda kini ni apostol Pablo sa iyang unang sulat sa mga Kristohanon sa Corinto. Siya misulat: “Wala ba kamo mahibalo nga ang tanang magdadagan sa usa ka lumba modagan, apan usa lamang ang makadawat sa ganti? Dagan sa paagi nga inyong makab-ot kini.”—1 Cor. 9:24.
3. Unsay gipasabot ni Pablo sa miingon siya nga usa lang ang makadawat sa ganti?
3 Gipasabot ba ni Pablo nga usa lang ka Kristohanon ang makadawat sa ganti sa kinabuhi? Dili gayod! Ang mga magdadagan nagbansay ug nanglimbasog gayod aron modaog. Buot ni Pablo nga manglimbasog usab ang mga Kristohanon aron maangkon ang ganti nga kinabuhing walay kataposan. Oo, ang tanang Kristohanon nga makahuman sa lumba makadawat sa ganti.
4. Unsay kinahanglan natong mahibaloan bahin sa lumba sa kinabuhi?
4 Kanang mga pulonga makapadasig apan angayng seryosohon sa tanang Kristohanon karon. Ngano? Kay dako kaayo ang ganti—kinabuhing walay kataposan sa langit o sa Paraisong yuta. Tinuod, ang lumba dugayng mahuman ug hago; dunay daghang kabaldahan ug kapeligrohan. (Mat. 7:13, 14) Ikasubo, ang uban naghinayhinay o nanghunong. Unsa ang mga lit-ag ug kapeligrohan diha sa lumba sa kinabuhi? Sa unsang paagi ka makalikay niana? Unsay imong mahimo aron makahuman ug makadaog sa maong lumba?
Kinahanglang Molahutay Aron Makadaog
5. Unsay giingon ni Pablo bahin sa lumba diha sa Hebreohanon 12:1?
5 Sa sulat ni Pablo sa Hebreohanong mga Kristohanon sa Jerusalem ug Judea, iyang gihisgotan pag-usab ang bahin sa lumba. (Basaha ang Hebreohanon 12:1.) Iyang gihisgotan kon nganong angayng molahutay diha sa lumba ug kon unsay angayng buhaton aron makadaog. Sa dili pa nato susihon ang mga leksiyon sa sulat ni Pablo sa mga Hebreohanon, ato unang hisgotan kon nganong gisulat niya kini ug kon unsay iyang gidasig kanila nga buhaton.
6. Sa unsang paagi gipit-os sa mga lider sa relihiyon ang mga Kristohanon?
6 Ang mga Kristohanon sa unang siglo, ilabina kadtong nagpuyo sa Jerusalem ug Judea, nag-atubang ug daghang pagsulay ug kalisdanan. Sila gipit-os pag-ayo sa Hudiyong mga lider sa relihiyon, nga dakog impluwensiya sa katawhan niadtong panahona. Una pa niana, nakombinsir sa maong mga lider ang mga tawo nga si Jesu-Kristo usa ka rebelde ug kriminal nga angayng patyon. Ug determinado silang ipadayon ang pagsupak. Sa basahon sa Mga Buhat, atong mabasa ang bahin sa ilang paglutos sa mga Kristohanon human sa Pentekostes 33 K.P. Kini nakapalisod pag-ayo sa matinumanong mga Kristohanon.—Buh. 4:1-3; 5:17, 18; 6:8-12; 7:59; 8:1, 3.
7. Nganong makuyaw ang panahong gikinabuhian sa mga Kristohanon nga gisulatan ni Pablo?
7 Ang maong mga Kristohanon nagkinabuhi usab sa panahong talitapos na ang Hudiyohanong sistema. Gipasidan-an sila ni Jesus nga laglagon sa Diyos ang Jerusalem. Gisultihan usab sila sa mahitabo una pa ang kalaglagan ug gihatagag instruksiyon kon unsay angayng buhaton aron maluwas. (Basaha ang Lucas 21:20-22.) Nan, unsay angay nilang buhaton? Si Jesus nagpasidaan: “Bantayi ang inyong kaugalingon nga ang inyong mga kasingkasing dili mabug-atan sa pagpalabig kaon ug sa pagpalabig inom ug sa mga kabalaka sa kinabuhi, ug sa kalit kanang adlawa dihadiha modangat kaninyo.”—Luc. 21:34.
8. Nganong ang ubang Kristohanon naghinayhinay o mihunong sa pag-alagad?
8 Dihang misulat si Pablo sa mga Hebreohanon, mga 30 ka tuig na ang milabay sukad sa pagpasidaan ni Jesus. Unsa nay ilang kahimtang? Ang uban nabalda sa kapit-os sa adlaw-adlawng pagkinabuhi ug naluya sa espirituwal. (Heb. 5:11-14) Lagmit nagtuo ang uban nga mas sayon kon magkinabuhi sila sama sa kadaghanang Hudiyo. Ilang gihunahuna nga ang maong mga Hudiyo nagtuo man gihapon sa Diyos ug nagsunod sa pipila ka bahin sa Balaod. Ang uban usab nakombinsir o nahadlok sa pipila diha sa kongregasyon kinsa namugos sa pagsunod sa Balaod ni Moises ug sa tradisyon sa mga Hudiyo. Unsay gisulti ni Pablo aron madasig ang mga Kristohanon sa paglahutay sa lumba?
9, 10. (a) Sa hinapos sa Hebreohanon kapitulo 10, unsay gidasig ni Pablo? (b) Nganong si Pablo misulat bahin sa mga buhat sa pagtuo sa karaang mga saksi?
9 Giinspirar ni Jehova si Pablo sa pagsulat sa Hebreohanong mga Kristohanon sa pagpalig-on kanila. Sa kapitulo 10 sa iyang sulat, si Pablo nagpatin-aw nga ang Balaod maoy ‘landong sa maayong mga butang nga moabot’ ug nagpasiugda sa bili sa halad lukat ni Kristo. Sa hinapos sa kapitulo, si Pablo nagdasig kanila: “Gikinahanglan nga kamo molahutay, aron nga, human kamo makabuhat sa kabubut-on sa Diyos, kamo makadawat sa katumanan sa saad. Kay ‘sa makadiyot nga panahon na lamang,’ ug ‘siya nga moanhi moabot na ug dili magalangan.’”—Heb. 10:1, 36, 37.
10 Sa Hebreohanon kapitulo 11, gipatin-aw ni Pablo kon unsay kahulogan sa tinuod nga pagtuo sa Diyos. Siya naghisgot ug mga pananglitan sa mga babaye ug lalaki nga nagpasundayag ug pagtuo. Lain na ba usab kini nga tema? Dili. Ang apostol nasayod nga ang iyang mga isigkamagtutuo angayng mahibalo nga ang pagtuo nagkinahanglag kaisog ug paglahutay. Ang panig-ingnan sa karaang mga alagad ni Jehova magpalig-on sa mga Hebreohanon sa pagsagubang sa mga pagsulay ug kalisdanan. Busa, human hisgoti ang mga buhat sa pagtuo sa matinumanong mga alagad kanhi, si Pablo miingon: “Sanglit gilibotan man kita sa ingon kabagang panganod sa mga saksi, tangtangon usab nato ang tanang kabug-at ug ang sala nga daling makasabod kanato, ug daganon nato nga malahutayon ang lumba nga gibutang sa atong atubangan.”—Heb. 12:1.
“Panganod sa mga Saksi”
11. Unsay epekto kon atong hinumdoman ang panig-ingnan sa bagang “panganod sa mga saksi”?
11 Ang ‘bagang panganod sa mga saksi’ dili lamang mga tumatan-aw sa lumba nga gustong makakita sa ilang paboritong atleta o tem nga makadaog. Hinunoa, sila samag mga magdadagan nga nakatapos sa lumba. Bisag patay na, sila maisip nga hawod nga mga magdadagan nga makapadasig sa mga bag-ohan. Handurawa kon unsay bation sa usa kon siya nahibalo nga ang pipila ka hawod nga magdadagan nagtan-aw kaniya. Dili ba siya modagan taman sa ginhawa? Ang maong karaang mga saksi makapamatuod nga bisag unsa ka hago ang simbolikong lumba, kana mahimong madaog. Busa angayng hinumdoman sa Hebreohanong mga Kristohanon ang panig-ingnan sa “panganod sa mga saksi” kay kana makadasig kanila sa ‘paglahutay sa lumba.’ Mahimo usab nato kana.
12. Unsay atong makat-onan sa mga tawo sa pagtuo nga gihisgotan ni Pablo?
12 Daghang tawo sa pagtuo nga gihisgotan ni Pablo susama kanatog kahimtang. Pananglitan, si Noe nagkinabuhi sa hapit nang laglagon ang kalibotan pinaagi sa Lunop. Kita nagkinabuhi sa panahon nga hapit nang taposon ang kalibotan ni Satanas. Si Abraham ug Sara gisugo sa pagbiya sa ilang yutang natawhan aron sa pag-alagad kang Jehova ug sa paghulat sa katumanan sa iyang saad. Kita giawhag nga dumilian ang kaugalingon aron mabatonan ang pag-uyon ni Jehova ug ang mga panalangin nga iyang gisaad kanato. Si Moises milatas sa makahahadlok nga kamingawan paingon sa Yutang Saad. Kita usab naglatas niining daotang kalibotan paingon sa gisaad nga bag-ong kalibotan. Ang ilang kasinatian, kalamposan ug kapakyasan, katakos ug kahuyangan, angay gayong palandongon.—Roma 15:4; 1 Cor. 10:11.
Sa Unsang Paagi Sila Milampos?
13. Unsang lisod nga mga buluhaton ang gisugo kang Noe? Nganong nahimo niya kadto?
13 Sa unsang paagi nakalahutay ug milampos sa lumba ang maong mga alagad ni Jehova? Matikdi ang gisulat ni Pablo bahin kang Noe. (Basaha ang Hebreohanon 11:7.) Si Noe wala pa makakitag lunop nga naglaglag sa tanang tawo ug hayop. (Gen. 6:17) Kana wala pa sukad mahitabo. Apan wala kana isipa ni Noe nga imposible. Ngano? Kay siya may pagtuo nga kon unsay isulti ni Jehova, kana iyang tumanon. Si Noe wala mobati nga lisod kaayo ang gisugo ni Jehova kaniya. Hinunoa, “gibuhat niya ang ingon gayod.” (Gen. 6:22) Si Noe daghag buluhaton—pagtukod sa arka, pagtigom sa mga hayop, pagpondog pagkaon para sa mga tawo ug hayop, pagpasidaan bahin sa Lunop, ug paglig-on sa espirituwalidad sa iyang pamilya. Dili gayod kadto sayon! Apan tungod sa pagtuo ug pagkamalahutayon ni Noe, siya ug ang iyang pamilya naluwas ug gipanalanginan.
14. Unsang pagsulay ang naatubang ni Abraham ug Sara? Unsay atong makat-onan niana?
14 Si Abraham ug Sara ang sunod nga gihisgotan ni Pablo nga lakip sa “panganod sa mga saksi” nga naglibot kanato. Nausab ang ilang kinabuhi sa dihang gipabiya sila sa Ur, ug wala sila mahibalo kon unsay ilang dangatan. Apan sila may lig-ong pagtuo kang Jehova ug nagmasinugtanon kaniya bisan sa lisod nga mga kahimtang. Tungod sa pagsakripisyo ni Abraham alang sa matuod nga pagsimba, siya haom nga tawgong “amahan sa tanan nga nagbatog pagtuo.” (Roma 4:11) Pipila lang ka buhat sa pagtuo ni Abraham ug sa iyang pamilya ang gihisgotan ni Pablo kay ang Hebreohanong mga Kristohanon sinati na niini. Apan igo na kadto aron ipakita nga lig-on ang ilang pagtuo. Si Pablo miingon bahin kanila: “Sa pagtuo kini silang tanan nangamatay, bisan ug wala sila makabaton sa katumanan sa mga saad, apan sila nakakita niini sa halayo ug nahinangop niini ug nagpahayag sa dayag nga sila mga estranyo ug temporaryong mga pumoluyo sa yuta.” (Heb. 11:13) Tin-aw nga ang ilang pagtuo ug personal nga relasyon sa Diyos nakatabang nila sa paglahutay sa lumba.
15. Nganong gibiyaan ni Moises ang datong pagkinabuhi?
15 Si Moises maoy laing sulondang alagad ni Jehova nga lakip sa “panganod sa mga saksi.” Gibiyaan ni Moises ang dungganon ug datong pagkinabuhi, ‘ug gipalabi nga daogdaogon uban sa katawhan sa Diyos.’ Ngano? Si Pablo mitubag: ‘Siya nagtutok sa pagbayad sa ganti. Siya nagpabiling lig-on nga daw nakakita sa Usa nga dili-makita.’ (Basaha ang Hebreohanon 11:24-27.) Si Moises wala magpabalda sa “umalaging kalipay sa pagpakasala.” Ang Diyos ug ang iyang mga saad tinuod gayod kang Moises nga tungod niana siya nagpasundayag ug talagsaong kaisog ug pagkamalahutayon. Iyang gipangunahan ang mga Israelinhon sa paggawas sa Ehipto paingon sa Yutang Saad.
16. Nganong si Moises wala mahigawad dihang siya wala tugoti nga makasulod sa Yutang Saad?
16 Sama kang Abraham, si Moises wala makasinati sa katumanan sa saad sa Diyos. Sa hapit nang mosulod ang mga Israelinhon sa Yutang Saad, si Moises giingnan: “Gikan sa halayo malantaw mo ang yuta, apan dili ka makasulod didto sa yuta nga akong ihatag sa mga anak sa Israel.” Ang hinungdan kay siya ug si Aaron nasuko pag-ayo sa pagkarebelyoso sa katawhan, ug busa sila “wala magmatinumanon [sa Diyos] taliwala sa mga anak sa Israel didto sa mga tubig sa Meriba.” (Deut. 32:51, 52) Si Moises ba nahigawad o nayugot? Wala. Iyang gipanalanginan ang katawhan ug miingon: “Malipayon ka, Oh Israel! Kinsa ba ang sama kanimo, katawhan nga nagatagamtam ug kaluwasan kang Jehova, ang taming sa imong panabang, ug ang Usa nga imong halangdong espada?”—Deut. 33:29.
Mga Leksiyon Alang Kanato
17, 18. (a) Bahin sa lumba sa kinabuhi, unsay atong makat-onan sa “panganod sa mga saksi”? (b) Unsay hisgotan sa sunod artikulo?
17 Sa atong paghisgot sa kinabuhi niadtong nalakip sa “panganod sa mga saksi” nga naglibot kanato, tin-aw nga kita kinahanglang magbatog lig-ong pagtuo sa Diyos ug sa iyang mga saad aron makalahutay sa lumba. (Heb. 11:6) Ang pagtuo angayng mahimong sentro sa atong kinabuhi. Dili sama niadtong way pagtuo, kita nahibalo nga ang Diyos nagsaad ug maayong kaugmaon. Atong nakita ang “Usa nga dili-makita” ug busa makadagan nga malahutayon sa lumba.—2 Cor. 5:7.
18 Ang Kristohanong lumba dili sayon. Apan mahimo natong taposon ang lumba nga malamposon. Atong hisgotan sa sunod artikulo ang dugang tabang nga atong mabatonan.
Makapatin-aw Ka Ba?
• Nganong si Pablo misulat bahin sa mga buhat sa pagtuo sa karaang mga saksi?
• Sa unsang paagi ang panig-ingnan sa “panganod sa mga saksi” makadasig kanato sa pagdagan nga malahutayon?
• Unsay imong nakat-onan sa matinumanong mga saksi sama ni Noe, Abraham, Sara, ug Moises?
[Hulagway sa panid 19]
Si Abraham ug Sara andam mobiya sa hayahayng kinabuhi sa Ur