Sa Unsang Paagi ang Kristohanong Pagtulon-an Makaapektar sa Komunidad?

ANG nag-unang mga artikulo naghisgot kon nganong ang tinuod nga mga Kristohanon dili mag-apil-apil sa politika. Apan, unsaon nila pagpakita nga sila interesado sa pagpauswag sa komunidad nga ilang gipuy-an? Ang usa ka paagi mao ang pagsunod sa sugo ni Jesus: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo.”—Mateo 28:19, 20.

Ang pagsunod sa sugo ni Jesus sa “paghimog mga tinun-an” nalambigit sa pagtuman sa iyang instruksiyon nga mahimong samag asin ug kahayag sa kalibotan. (Mateo 5:13, 14) Unsay kalambigitan? Unsay epekto nianang buluhatona sa mga tawo?

Ang Mensahe ni Kristo —Makapreserbar ug Makalamdag

Ang asin makapreserbar; kini makapugong sa pagkadunot. Sa susama, ang mensahe nga gisugo ni Jesus nga dad-on sa iyang mga sumusunod ngadto sa katawhan sa tanang kanasoran makapreserbar usab. Kadtong modawat ug mopadapat sa pagtulon-an ni Jesus mapanalipdan batok sa moral nga kadunotan nga kaylap karon. Sa unsang paagi? Sila makakat-on sa paglikay sa mga buhat nga makadaot sa panglawas, sama sa pagpanigarilyo, ug sila makaugmad sa mga hiyas sama sa gugma, pakigdait, hataas-nga-pailob, kalulot, ug pagkamaayo. (Galacia 5:22, 23) Tungod sa maong mga hiyas, sila magmapuslanon sa katilingban. Ang mga Kristohanon nga magpaambit niining makapreserbar nga mensahe ngadto sa ilang kasilinganan makahatag ug kaayohan sa ilang komunidad.

Komosta ang ilustrasyon bahin sa kahayag? Maingong ang bulan magpabanaag sa kahayag gikan sa adlaw, ang mga sumusunod ni Kristo magpabanaag sa “kahayag” gikan kang Jehova. Sila nagsilbing mga tigpabanaag pinaagi sa makapalamdag nga mensahe nga ilang gisangyaw ug sa ilang maayong mga buhat.—1 Pedro 2:12.

Si Jesus dugang nagpasiugda sa kaamgiran tali sa kahayag ug sa pagkahimong tinun-an pinaagi sa pag-ingon: “Ang mga tawo magdagkot ug lampara ug magpahimutang niini, dili ilalom sa bukag nga sukdanan, kondili diha sa tangkawan, ug kini molamdag kanilang tanan nga anaa sa balay. Sa susama palamdaga ang inyong kahayag atubangan sa mga tawo.” Ang nagsigang lampara nga gibutang sa tangkawan makita sa tanan. Sa susama, ang pagsangyaw ug ang ubang maayong mga buhat sa tinuod nga mga Kristohanon kinahanglang makita sa tanan. Ngano? Si Jesus miingon nga kadtong makakita sa maayong mga buhat maghimaya, dili sa mga Kristohanon, kondili sa Diyos.—Mateo 5:14-16.

Responsabilidad sa Tanan

Sa dihang si Jesus miingon: “Kamo ang kahayag sa kalibotan” ug “palamdaga ang inyong kahayag,” siya nagtumong sa tanan niyang tinun-an. Ang sugo ni Jesus dili mapalampos sa pipila lang ka indibiduwal nga anaa sa lainlaing relihiyon. Hinunoa, ang tanang magtutuo mao “ang kahayag.” Ang pito ka milyong Saksi ni Jehova, nga nagpuyo sa kapig 235 ka kayutaan, nagtuo gayod nga responsabilidad nilang tanan ang pagduaw sa ilang mga silingan aron ipaambit ang mensahe nga gipasangyaw ni Kristo sa iyang mga sumusunod.

Unsay tema sa mensahe sa mga Saksi ni Jehova? Sa dihang gihatag ni Jesus ang instruksiyon sa pagwali, wala niya sugoa ang iyang mga sumusunod sa pagsangyawg sosyal o politikal nga reporma, panaghiusa sa Simbahan ug Gobyerno, o unsa mang sekular nga ideolohiya. Hinunoa, siya nagtagna: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran.” (Mateo 24:14) Busa, isip pagsugot sa sugo ni Jesus, ang tinuod nga mga Kristohanon karon nagpadayon sa pagsangyaw bahin sa Gingharian sa Diyos—ang bugtong kagamhanan nga makawagtang sa daotang sistema ni Satanas ug makapatunghag matarong nga bag-ong kalibotan.

Sa pagkatinuod, sa dihang magbasa sa mga asoy sa Ebanghelyo, dunay duha ka pangunang butang bahin sa ministeryo ni Jesus nga makaapektar sa buluhaton sa tinuod nga mga Kristohanon karon. Hisgotan kana sa sunod artikulo.

[Blurb sa panid 8]

Sa unsang paagi ang mensahe sa mga Kristohanon samag asin?

[Blurb sa panid 9]

Sa unsang paagi ang mensahe ni Kristo samag lampara diha sa ngitngit nga dapit?