TUBAG SA MGA PANGUTANA BAHIN SA BIBLIYA

Ang Bibliya ba Pulong sa Diyos?

Imong madahom nga ang Pulong sa Diyos talagsaon, ug ingon gayod niana ang Bibliya. Binilyong kopya niini napatik na sa gatosan ka pinulongan. Ang kaalam nga makaplagan sa Bibliya may gahom sa pagbag-o sa mga tawo.​—Basaha ang 1 Tesalonica 2:13; 2 Timoteo 3:16.

Kita nahibalo nga ang Bibliya gikan sa Diyos kay kini tukmang nagtagna bahin sa umaabot. Walay tawo nga makahimo niana. Pananglitan, tagda ang basahon sa Isaias. Ang usa ka kopya niini nga gisulat kapig usa ka siglo una matawo si Jesus nakaplagan diha sa usa ka langob duol sa Patayng Dagat. Kini nag-ingon nga ang siyudad sa Babilonya dili na pagapuy-an. Kana unang natuman daghang katuigan human sa ministeryo ni Jesus sa yuta.​—Basaha ang Isaias 13:19, 20; 2 Pedro 1:20, 21.

Sa unsang paagi gisulat ang Bibliya?

Ang Bibliya gisulat sulod sa mga 1,600 ka tuig. Mga 40 ang magsusulat niini, ug sila nagsunod ug usa lang ka tema nga wala magkasumpakiay sa usag usa. Sa unsang paagi naposible kana? Ang Diyos naggiya sa ilang pagsulat.​—Basaha ang 2 Samuel 23:2.

Usahay ang Diyos makigsulti sa mga magsusulat sa Bibliya pinaagig mga anghel, panan-awon, o damgo. Apan sagad ibutang sa Diyos ang iyang hunahuna ngadto sa hunahuna sa magsusulat ug tugotan kini nga maoy magpilig mga pulong sa pagpahayag sa mensahe sa Diyos.​—Basaha ang Pinadayag 1:1; 21:3-5.