Pag-alagad Kang Jehova sa “Malisod nga mga Adlaw”

“NAG-ANAM ka lisod ang akong paglihoklihok tungod sa akong panglawas,” nanghupaw si Ernst, nga kapin nag 70 anyos.a Nakaeksperyensiya ka ba usab niini? Kon nagkatigulang ug nagkaluya ka na, makasabot ka sa giingon sa Ecclesiastes kapitulo 12. Sa bersikulo 1, ang mga adlaw sa pagkatigulang gitawag ug “malisod nga mga adlaw.” Apan, wala kana magpasabot nga dili na ka magmalipayon. Makabaton gihapon kag makapatagbawng kinabuhi, nga malipayong nag-alagad kang Jehova.

PAGHUPOT UG LIG-ONG PAGTUO

Wala mo mag-inusara sa inyong kalisdanan, minahal nga mga igsoong tigulang. Sa kapanahonan sa Bibliya, ang tigulang nga mga alagad ni Jehova nag-atubang ug susamang mga problema. Pananglitan, si Isaac, Jacob, ug Ahias nahalap o dili na makakita. (Gen. 27:1; 48:10; 1 Hari 14:4) Si Sara mibati nga siya ‘nalawos na.’ (Gen. 18:11, 12) Si Haring David ‘wala na mobatig kainit.’ (1 Hari 1:1) Ang datong si Barzilai dili na lamian sa pagkaon ni makadungog sa mananoyng musika. (2 Sam. 19:32-35) Si Abraham ug Noemi parehong namatyag kapikas.—Gen. 23:1, 2; Ruth 1:3, 12.

Unsay nakatabang nila sa pagpabiling maunongon kang Jehova ug sa paghupot sa ilang kalipay? Dihang tigulang na si Abraham, siya “nahimong kusganon pinaagi sa iyang pagtuo” sa saad sa Diyos. (Roma 4:19, 20) Kita usab nagkinahanglag lig-ong pagtuo. Ang maong pagtuo wala magdepende sa atong edad, mga katakos, o sirkumstansiya. Pananglitan, bisag siya luya, buta, ug naglubog sa banig, ang patriarkang si Jacob nagpakitag lig-ong pagtuo sa mga saad sa Diyos. (Gen. 48:1-4, 10; Heb. 11:21) Karon, ang 93 anyos nga si Ines nag-antos sa pagkaluya sa kaunoran, apan siya miingon: “Matag adlaw gibati nako nga dagaya kong gipanalanginan ni Jehova. Matag adlaw maghunahuna ko bahin sa Paraiso. Kana naghatag kanakog paglaom.” Pagkamaayong tinamdan!

Atong mapalig-on ang atong pagtuo pinaagi sa pag-ampo, pagsusi sa Pulong sa Diyos, ug pagtambong sa mga tigom. Ang tigulang nga manalagnang si Daniel katulo mag-ampo sa usa ka adlaw ug padayong nagtuon sa Pulong sa Diyos. (Dan. 6:10; 9:2) Ang tigulang nga biyudang si Ana “wala gayod mopalta sa templo.” (Luc. 2:36, 37) Dihang motambong mog tigom kon posible ug makigbahin kutob sa inyong maarangan, inyong gipalig-on ang inyong kaugalingon ug ang tanang nanambong. Ug si Jehova malipay gayod sa inyong mga pag-ampo, bisan pag limitado ra ang inyong mahimo.—Prov. 15:8.

Daghan kaninyong matinumanong mga igsoon ang gusto untang makakita aron makabasa ug makabatog kusog aron makatambong sa tigom. Apan tingali nag-anam kana ka lisod, basin imposible pa gani. Nan, unsa may inyong buhaton? Pahimusli kon unsay anaa kaninyo. Daghang dili makatambong sa tigom ang gustong maminaw niana pinaagig telepono. Bisag halap na, ang 79 anyos nga si Inge makapangandam gihapon sa mga tigom. Usa ka brader sa ilang kongregasyon ang tighatagan niyag inimprenta sa kompiyuter nga reperensiya nga gipadak-an ang letra.

Tingali duna moy nabatonan nga gustong mabatonan sa uban—ang panahon. Nganong dili kana gamiton sa pagpamati sa mga rekording sa Bibliya, literatura sa Bibliya, pakigpulong, ug audio drama? Puwede sab ninyong tawgan sa telepono ang mga igsoon aron ipaambit kanila ang usa ka espirituwal nga gasa ug ‘magkadinasigay.’—Roma 1:11, 12.

PAGPABILING AKTIBO SA PAG-ALAGAD SA DIYOS

“Makapaguol kaayo nga dili na ka sama ka aktibo kaniadto,” miingon si Christa, nga mga 85 anyos. Nan, sa unsang paagi mahuptan sa mga tigulang ang ilang kalipay? “Pinaagi sa pagbatog positibong panglantaw,” miingon ang 75 anyos nga si Peter, “nga dili magsigeg hunahuna bahin sa dili na nimo mahimo kondili sa pagkalipay sa kon unsay imong mahimo.”

Makahunahuna ba kamog laing paagi sa pagsangyaw nga mahimo pa ninyo? Si Heidi dili na makapamalaybalay sama kaniadto. Bisag mga 80 anyos na siya, nakakat-on siya sa paggamit sa kompiyuter aron sa pagpadalag mga sulat. Ang ubang tigulang nga magmamantala makasugod ug mga panaghisgot sa Bibliya samtang maglingkod sa parke o sa hunonganag bus. O kon nagpuyo mo sa nursing home, mahimo ba ninyong “teritoryo” ang mga doktor, nars, ug mga residente niana?

Panahon sa iyang pagkatigulang, si Haring David madasigong nagpaluyo sa putling pagsimba. Siya miamot ug kuwarta ug mihimog mga kahikayan alang sa pagtukod sa templo. (1 Cron. 28:11–29:5) Sa susama, kamo makasuportar sa tibuok kalibotang buluhaton sa Gingharian. Nganong dili ninyo paluyohan ang mga payunir ug ubang masibotong mga magmamantala sa inyong kongregasyon pinaagig makapadasig nga mga pulong, gamayng gasa, o simpleng meryenda? Mahimo ninyong iapil sa pag-ampo ang mga batan-on ug ilang pamilya, ang bug-os panahong mga alagad, ang mga masakiton, ug kadtong dunay bug-at nga mga responsabilidad.

Kamo ug ang inyong pag-alagad gipabilhan pag-ayo. Ang atong langitnong Amahan dili gayod magsalikway kaninyo minahal nga mga tigulang. (Sal. 71:9) Si Jehova nahigugma ug nagpabili kaninyo. Sa dili madugay, magkadako ang atong edad nga wala nay masinating kalisdanan. Uban ang kalagsik ug hingpit nga panglawas, kita magpadayon sa pag-alagad sa atong mahigugmaong Diyos, si Jehova, hangtod sa kahangtoran!