MGA PANGUTANA GIKAN SA MGA MAGBABASA

Unsay pamatuod nga ang karaang siyudad sa Jerico dali rang nailog?

Sumala sa Josue 6:10-15, 20, ang kasundalohan sa Israel nagmartsa libot sa Jerico kas-a sa usa ka adlaw sulod sa unom ka adlaw. Sa ikapitong adlaw, kapito nila gilibot ang siyudad, ug gipahinabo sa Diyos nga malumpag ang lig-ong mga paril sa Jerico. Tungod niini, nakasulod ang mga Israelinhon ug nailog nila ang Jerico. May nakaplagan ba ang mga arkeologo nga nagpamatuod nga dali rang nailog ang Jerico sama sa giingon sa Bibliya?

Sa karaang panahon, sagad likosan sa mga manunulong ang usa ka pinarilang siyudad. Bisag unsa ka dugay mahuman ang paglikos, kuhaon sa mga mananaog ang bahandi sa siyudad, lakip na ang nahibiling pagkaon. Apan sa kagun-oban sa Jerico, ang mga arkeologo nakakitag abundang suplay sa pagkaon. Bahin niini, ang Biblical Archaeology Review nag-ingon: “Gawas sa mga butang nga gama sa kulonon, nakaplagan ang abundang suplay sa lugas. . . . Talagsaon kini nga panghitabo diha sa rekord sa arkeolohiya sa Palestina. Tingali makaplagan ang usa o duha ka tadyawng lugas, apan talagsaon kaayo ang pagkakaplag ug daghan kaayong lugas.”

Sumala sa Kasulatan, wala kuhaa sa mga Israelinhon ang pagkaon sa Jerico kay gidid-an sila ni Jehova sa pagbuhat niana. (Jos. 6:17, 18) Ang mga Israelinhon miatake panahon sa tingpamulak, human gayod sa ting-ani dihang abunda ang suplay sa lugas. (Jos. 3:15-17; 5:10) Ang kamatuoran nga daghang lugas ang nakaplagan sa Jerico human sa paglikos nagpakita nga dali rang nailog ang siyudad, sama sa giingon sa Bibliya.