Duna bay Daotang mga Anghel?

Oo, duna. Diin sila gikan? Hinumdomi nga ang mga anghel gilalang sa Diyos nga dunay kagawasan sa pagpili. Human malalang ang unang lalaki ug babaye, si Adan ug Eva, giabusohan sa usa ka hingpit nga espirituhanong linalang ang iyang kagawasan sa pagpili ug nagpasugod ug rebelyon dinhi sa yuta. Nakombinsir niya si Adan ug Eva sa pagrebelde sa Diyos. (Genesis 3:1-7; Pinadayag 12:9) Wala hisgoti sa Bibliya ang ngalan niining espiritung linalang o kon unsay iyang ranggo didto sa langit una pa siya mirebelde. Apan human sa iyang pagrebelde, husto nga gitawag siya sa Bibliya ug Satanas, nga nagkahulogang “Magsusupak,” ug Yawa, nga nagkahulogang “Tigbutangbutang.”​—Mateo 4:8-11.

Ikasubo, ang pagrebelde batok sa Diyos wala matapos didto. Sa panahon ni Noe, ubay-ubayng mga anghel “mitalikod sa ilang nahiangay nga puloy-anang dapit” sa langitnong pamilya sa Diyos. Sila nanaog sa yuta ug nagsul-ob ug tawhanong lawas aron makapatuyang sa imoral nga mga buhat, nga supak sa katuyoan sa paglalang kanila.​—Judas 6; Genesis 6:1-4; 1 Pedro 3:19, 20.

Unsay nahitabo sa daotang mga anghel? Sa dihang gipalunopan sa Diyos ang tibuok kalibotan sa paghinlo sa yuta, gihukas nila ang ilang tawhanong lawas ug misakag balik sa langit. Apan wala na sila pabalika sa Diyos sa ilang orihinal nga posisyon. Hinunoa, iyang gibalhog sila sa “naglugitom nga [espirituwal nga] kangitngit,” nga gitawag ug Tartaro. (Judas 6; 2 Pedro 2:4) Busa kini nga mga demonyo nagbutang sa ilang kaugalingon ilalom sa gahom ni Satanas nga Yawa, “ang magmamando sa mga demonyo,” kinsa ‘nagtakoban ingong anghel sa kahayag.’​—Mateo 12:24; 2 Corinto 11:14, Ang Biblia, NCV.

Ang Bibliya nagtudlo nga ang Gingharian sa Diyos, usa ka langitnong kagamhanan nga si Jesus ang hari, natukod niadtong 1914.a Human niana, si Satanas ug ang iyang mga demonyo gipalayas gikan sa langit ug gitambog dinhi sa yuta. Ang pagdaghan sa pagkadaotan ug ang grabeng imoralidad sa kalibotan maoy pamatuod sa ilang daotan kaayong impluwensiya.​—Pinadayag 12:9-12.

Apan, ang grabeng pagkadaotan ug kapintasan nagpamatuod nga hapit nang taposon ang ilang mapintas nga pagmando. Kining daotang espiritung mga linalang mawad-an nag gahom. Human sa 1,000 ka tuig nga pagmando sa Gingharian sa Diyos sa paraisong yuta, kining daotang mga espiritu hatagag mubo, kataposang higayon sa pagsulay sa katawhan. Dayon sila laglagon hangtod sa hangtod.​—Mateo 25:41; Pinadayag 20:1-3, 7-10.