TUBAG SA MGA PANGUTANA BAHIN SA BIBLIYA
Makatabang ba nato ang mga anghel?
Sama nga gitabangan kaniadto sa mga anghel ang alagad sa Diyos nga si Daniel, ginatabangan sab nila karon ang mga tawo nga makabenepisyo sa maayong balita
Sa wala pa buhata ni Jehova nga Diyos ang tawo, dugay na niyang gilalang ang minilyong mga anghel. (Job 38:4, 7) Sila maoy gamhanang espiritung linalang nga nagserbisyo sa Diyos. Usahay sugoon sila sa paggiya ug pagpanalipod sa mga alagad sa Diyos. (Salmo 91:10, 11) Karon, ginatabangan sa mga anghel ang mga tawo nga makabenepisyo sa maayong balita nga ginatudlo sa mga sumusunod ni Jesus.—Basaha ang Pinadayag 14:6, 7.
Angay ba tang moampo sa mga anghel alang sa tabang? Dili. Ang pag-ampo maoy buhat sa pagsimba, nga angay lang himoon para sa Diyos. (Pinadayag 19:10) Kay sulugoon sa Diyos, ang mga anghel mosunod lamang sa iyang mga sugo, dili sa tawo. Busa, sa Diyos lang ta angayng moampo pinaagi ni Jesus.—Basaha ang Salmo 103:20, 21; Mateo 26:53.
May daotan bang mga anghel?
Parehas sa tawo, ang mga anghel makapili sa paghimog maayo o daotan. Ikasubo, daghang anghel ang mirebelde sa Diyos. (2 Pedro 2:4) Ang una si Satanas; ang uban misunod ug nahimong mga demonyo. Sa ulahi, si Satanas ug ang mga demonyo gipalayas sa langit ug gihulog dinhi sa yuta.—Basaha ang Pinadayag 12:7-9.
Sukad sa 1914, nagkagrabe ang pagkadaotan ug kapintasan. Nagpasabot kini nga hapit nang hanawon sa Diyos si Satanas ug ang mga demonyo. Dayon himoon pag-usab sa Diyos nga Paraiso ang yuta.—Basaha ang Pinadayag 12:12; 21:3, 4.