Sa Unsang Paagi ang Espiritung mga Linalang Nag-apektar Kanato?

Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Kinsa ang mga anghel?

Ang mga anghel maoy espiritung mga linalang nga nagpuyo sa langit. Sila mas labaw kay sa mga tawo. Ang matuod nga Diyos, kinsa usa usab ka espiritu, naglalang sa mga anghel sa wala pa niya lalanga ang yuta. (Job 38:4, 7; Mateo 18:10) Si Jehova gilibotag milyonmilyon ka maunongong mga anghel.—Basaha ang Salmo 103:20, 21; Daniel 7:9, 10.

2. Motabang ba sa mga tawo ang mga anghel?

Ang mga anghel mitabang sa matarong nga tawong si Lot. Siya nagpuyo sa siyudad nga buot laglagon sa Diyos tungod sa pagkadaotan sa mga tawo. Duha ka anghel ang nagpasidaan kang Lot ug sa iyang pamilya nga mokalagiw. Ang uban naghunahuna nga ang pasidaan tiawtiaw lang ug busa wala magtagad niana. Apan si Lot ug ang iyang mga anak nga babaye naluwas kay sila namati sa pasidaan sa Diyos pinaagi sa mga anghel.—Basaha ang Genesis 19:1, 13-17, 26.

Sumala sa Bibliya, gitabangan sa mga anghel ang mga tawo karon pinaagi sa pagtultol sa buluhaton niadtong matinumanong nagasangyaw sa maayong balita sa Gingharian sa Diyos. (Mateo 24:14) Ang maayong balita naglakip ug pasidaan. Sama sa pasidaan nga gihatag kang Lot, kini dili tiawtiaw. Gikan kini sa Diyos pinaagi sa mga anghel.—Basaha ang Pinadayag 1:1; 14:6, 7.

Mahimong gamiton sa Diyos ang mga anghel sa paglig-on kanato panahon sa mga pagsulay. Migamit siyag usa ka anghel sa paglig-on kang Jesus.—Basaha ang Lucas 22:41-43.

Sa dili madugay, gamiton sa Diyos ang mga anghel sa laing paagi—sa pagwagtang sa mga daotan nga nagpahinabog pag-antos. Kana maghatag ug dakong kahupayan sa katawhan.—Basaha ang 2 Tesalonica 1:6-8.

3. Sa unsang paagi ang mga demonyo nag-apektar kanato?

Maingon nga daghang tawo sa yuta ang nagbuhat ug daotan pinaagi sa pagsupak sa Diyos, sa langit usab daghang anghel ang mirebelde sa Diyos. (2 Pedro 2:4) Ang masinupakong mga anghel gitawag ug mga demonyo. Ang kinalabwan kanila mao si Satanas, ang Yawa. Si Satanas ug ang iyang mga demonyo nagpahisalaag sa katawhan.—Basaha ang Pinadayag 12:9.

Gigamit ni Satanas ang malimbongong mga negosyo, gobyerno sa tawo, ug bakak nga mga relihiyon sa pag-impluwensiya sa mga tawo ug sa pagpatalikod kanila sa Diyos. Busa, si Satanas ang responsable sa inhustisya, kapintasan, ug pag-antos nga naagoman sa katawhan.—Basaha ang 1 Juan 5:19.

4. Sa unsang paagi gipahisalaag sa mga demonyo ang mga tawo?

Daghan ang gilimbongan ni Satanas pinaagi sa pagtudlo nga ang mga patay mahimong espiritu nga makakomunikar sa mga tawo. Hinunoa, ang Bibliya nag-ingon nga ang mga patay wala nay mahimo. (Ecclesiastes 9:5) Apan ang mga demonyo sagad maglimbong sa mga tawo pinaagi sa pagsundog sa tingog sa namatay nga mga minahal. (Isaias 8:19) Gipahisalaag sa mga demonyo ang uban pinaagig mga espiritista, pagpanagna, ug astrolohiya. Ang Pulong sa Diyos nagpasidaan kanato sa paglikay niining tanan. Busa kinahanglan natong sunogon ang bisan unsa nga atong nabatonan nga nalangkit sa mga demonyo ug espiritismo.—Basaha ang Deuteronomio 18:10, 11; Buhat 19:19.

Kon atong gihigugma si Jehova, dili ta angayng mahadlok sa mga demonyo. Kon atong tun-an ang Pulong sa Diyos ug buhaton ang giingon niini, atong masuklan ang Yawa ug masuod kita sa Diyos. Si Jehova mas gamhanan kay sa mga demonyo. Ang iyang matinumanong mga anghel makatabang kanato panahon sa panginahanglan.—Basaha ang Salmo 34:7; Santiago 4:7, 8.

Alang sa dugang impormasyon, tan-awa ang kapitulo 10 niini nga libro, Unsay Tinuod nga Gitudlo sa Bibliya?, nga gipatik sa mga Saksi ni Jehova.