Ang Kalipay sa Pagkinabuhing Simple
SI Daniel ug Miriam nagminyo niadtong Septiyembre 2000 ug mipuyo sa siyudad sa Barcelona, Spain. “Nagkinabuhi mi nianang giingon sa uban nga normal nga kinabuhi,” matod ni Daniel. “Tungod sa among trabaho, kami makakaon diha sa mahalong mga restawran, makabakasyon sa laing nasod, ug makapalit ug dekalidad nga mga sinina. Regular pod ming mosangyaw.” Dayon may nausab.
Sa usa ka kombensiyon niadtong 2006, natandog pag-ayo si Daniel sa usa ka pakigpulong diin may pangutanang gipatungha: “Gibuhat ba nato ang tanan sa pagtabang niadtong ‘nagsusapinday’ padulong sa kalaglagan aron makasubay sila sa dalan paingon sa kinabuhing walay kataposan?” (Prov. 24:11) Gipasiugda niini ang responsabilidad sa pagpaambit sa makaluwas sa kinabuhing mensahe sa Bibliya. (Buh. 20:26, 27) Nahinumdom si Daniel, “Gibati nako nga nakig-estorya si Jehova nako.” Gihisgotan sab sa pakigpulong nga ang pagpauswag sa ministeryo makahatag ug dugang kalipay. Nahibalo si Daniel nga tinuod kana. Si Miriam nagpayunir na ug nakasinatig makapalipayng mga panalangin.
Si Daniel miingon, “Nakadesisyon ko nga panahon na nga mohimog mga kausaban.” Ug gibuhat niya kana. Gimenosan niya ang iyang oras sa trabaho, siya nagpayunir ug naghunahuna sa kalipay nga ilang bation ni Miriam kon moalagad sila diin mas dakog panginahanglan sa mga magmamantala sa Gingharian.
MGA HAGIT, DAYON MAKAPALIPAYNG BALITA
Sa Mayo 2007, si Daniel ug Miriam miresayn sa ilang trabaho ug miadto sa Panama, usa ka nasod nga ilang nabisita kaniadto. Ang ilang bag-ong teritoryo naglakip sa pipila ka isla sa Bocas del Toro Archipelago sa Caribbean Sea, nga kadaghanan sa namuyo maoy mga lumad nga Ngabe. Nakahunahuna si Daniel ug Miriam nga kon gamiton nila ang ilang tinigom, makapabilin sila sa Panama sulod sa mga walo ka bulan.
Mobiyahe sila sa mga isla pinaagig sakayan ug bisikleta, ug mahinumdoman gyod nila ang ilang unang biyahe sa bisikleta—mga 32 kilometros agi sa titip nga mga bukid, ilalom sa naglagiting nga kainit sa adlaw. Si Daniel hapit makuyapi tungod sa kakapoy. Bisan pa niana, sa mga balay ubay sa ilang ruta, maabiabihon silang gipadayon sa mga pamilyang Ngabe, ilabina dihang nakakat-on ang magtiayon ug pipila ka ekspresyon diha sa lokal nga pinulongan. Ngadtongadto, sila nagdumalag 23 ka Bible study.
Apan dihang nahurot na ang ilang tinigom, naguol ang magtiayon. Nahinumdom si Daniel: “Nanglugmaw ang among mga luha dihang naghunahuna mi bahin sa among pagpauli sa Spain. Naguol kaayo ming mobiya sa among mga Bible study.” Pero paglabayg usa ka bulan, nakadawat silag makapalipayng balita. Si Miriam miingon: “Gidapit mi sa pag-alagad ingong mga espesyal payunir. Lipay kaayo mi nga makapabilin sa among asaynment!”
ILANG DAKONG KALIPAY
Niadtong 2015, tungod sa mga kausaban sa organisasyon, si Daniel ug Miriam nakadawat ug bag-ong asaynment ingong mga regular payunir. Unsa may ilang buhaton? Misalig sila sa saad sa Salmo 37:5: “Itugyan kang Jehova ang imong dalan, ug salig kaniya, ug siya molihok.” Nakakita silag trabaho aron masuportahan ang ilang pagpayunir, ug nag-alagad sila karon sa usa ka kongregasyon sa lungsod sa Veraguas, Panama.
Si Daniel miingon: “Sa wala pa mi mobiya sa Spain, wala mi kaseguro kon makahimo ba mi sa pagkinabuhing simple. Karon, nahimo na namo, ug wala mi makulangi sa among panginahanglan.” Unsa ang ilang dakong kalipay? Sila miingon, “Dili hitupngan ang kalipay nga bation diha sa pagtabang sa mapainubsanong mga tawo nga makakat-on bahin kang Jehova!”