Pagtanyag sa Maayong Balita​—Pinaagig Tabang Gikan sa Espiritu ni Jehova

¹ Aron magmalamposon diha sa ministeryo sa Gingharian, atong gikinahanglan ang pagtultol ug panalangin ni Jehova. Maoy hinungdanon nga kita magaampo alang sa tabang sa balaang espiritu diha sa atong buluhaton.​—Luc. 11:13.

² Sa dihang nagapamatuod ngadto sa tinong mga tipo sa mga tawo, mahimong gikinahanglan ta nga ilabinang mangandam pag-ayo. (Itandi ang 1 Corinto 2:1-5.) Apan ang espiritu sa Diyos motabang kanato kon atong pangayoon kana, ug kita makaarang sa husto ug matin-aw nga pagpasabot sa kamatuoran.

³ Ang balaang espiritu mohatag kanato sa gikinahanglang kaisog sa pagsulti sa kamatuoran ngadto sa “tanang matang sa mga tawo.” (1 Tim. 2:3, 4; 1 Tes. 2:2) Siyempre, ang pagkamaisogon wala man magkahulogan nga kita mahimong mapahitas-on o mahagiton sa atong panggawi.

UGMARA ANG BUNGA SA ESPIRITU

⁴ Nag-ingon ang apostol nga si Pedro nga sa dihang magasulti, kita gayod magbaton ug “malumong panghunahuna ug halalom nga pagtahod.” (1 Ped. 3:15) Ang kalulot maoy usa ka bunga sa espiritu nga ilabinang importante sa dihang makiglabot sa mga tawo nga di-makataronganon. Ang laing bunga sa espiritu makaabag usab sa pagdumala sa masulayong mga kahimtang. (Gal. 5:22, 23) Dili ta gayod isipon nga ang pagsalikway sa pipila ingon nga insulto personal. Hinunoa, amgoha nga tingali wala nila masabti ang kabililhon sa mensahe. Tungod kay nakabaton niining tinamdana kini motabang kanato sa pagkahimong maluloton ug matinahoron. Kon angay, himoa ang malulot nga pulong sa dihang mobiya. Kini aduna ing makaayong epekto sa mga tawo nga dili mauyonon.​—Prov. 15:1.

⁵ Samtang anaa sa ministeryo kita ginapanid-an sa uban. Ang atong panaghisgot ug pamatasan kinahanglan kanunay nga walay ikasaway. Dili ang tanan nagapabili sa atong buluhaton. Daghan ang dili maminaw. Ayawg kaluya. Hinumdomi nga kita nagapangita sa mga karnerohon. (Mat. 10:12-14) Ang atong pamatasan diha sa pag-alagad sa kanataran kinahanglang magpasidungog sa Diyos pinaagig pagsumbaliksilaw sa bunga sa iyang espiritu, ug kini hayan magpalukmay sa mga kasingkasing sa pipila.​—2 Cor. 6:3.

⁶ Kon ang tawo nga atong ikasulti tinuod nga puliki, kita tingali makasulti nga mubo ra. Pero ang atong pagkamatinagdanon mahimong magpatunghag mas mainit nga sanong sa sunod higayon nga ang usa ka Saksi moduaw. Ang espiritu sa Diyos motabang kanato sa pagpakitag dalisay nga gugma ug mahimong mapuangoron ug malulot. Kita nagakalipay nga ang Diyos diha sa iyang kaluoy nagatugot sa mga tawo ug daghang kahigayonan sa pagpatalinghog, uban sa resulta nga ang uban sa kataposan nagamatuohon.​—1 Cor. 13:4.

⁷ Samtang tugotan ta ang espiritu sa Diyos sa pagtultol sa atong mga panlimbasog, atong itanyag ang mensahe diha sa paagi nga makapadani sa makataronganong mga tawo. Himoang tumong mo nga “dayandayanan ang pagtulon-an sa atong Manluluwas, ang Diyos, diha sa tanang butang.”​—Tito 2:10.