Pagpadako sa Sanga sa Pilipinas
1 Kap-atan ka tuig kanhi, niadtong Pebrero, 1948, ang sanga sa Pilipinas mibalhin sa hedkuwarter niini ngadto sa 186 Roosevelt Avenue, Quezon City. Sukad niadto, ug hangtod sa presenteng panahon, kini nakaalagad na sa intereses sa Gingharian dinhi sa Pilipinas. Niadtong 1954, 1962, ug 1972, ang bag-ong mga tinukod gidugang samtang ang pag-uswag mitulin. Karon ang presenteng dinugtongdugtong nga mga tinukod nahimong gamay na usab kaayo alang sa 107,679 ka magmamantala sa nasod nga maorag maoy kabubut-on ni Jehova nga ang dugang pagpadako himoon diha sa samang dapit.—Isa. 54:2.
2 Sulod sa miaging pipila ka katuigan ang Sosyedad nakahupot ug 23,251 ka metro kuwadradong yuta sa likod sa Roosevelt Avenue nga propyedad ug ang mga plano ginahimo na karon sa pagtukod ug onse-andana balay-puy-anan nga may 73 metros ang gitas-on ug 23 metros ang gilapdon, maingon man sa duha-andanang plantang patikanan nga maoy 83 metros ang gitas-on ug 53 metros ang gilapdon. Sa dihang kini mahuman na, ang presenteng pabrika ug dormitoryo pagaayohon aron mahimong mga opisina ug bag-ong ‘reception area’ ug Kingdom Hall ang mopuli sa presenteng daandaang mga tinukod sa Roosevelt Avenue. Ang dibuho o laraw sa arkitekto nga anaa sa mga panid 4 ug 5 moabag kanimo sa pagtino kon unsa ang hitsura sa maong proyekto kon mahuman na.
PROGRESO SA PAGKAKARON
3 Sa Abril, 1988, ang permiso sa pagtukod nakuha gikan sa lokal nga mga awtoridad aron tukoron ang balay-puy-anan ug plantang patikanan. Sa Mayo ug Hunyo, ang mga igsoon gikan sa ‘International Volunteer Construction Workers’ nga iya sa Sosyedad misugod sa pagpangabot ug ang trabaho nakasugod na. Ang daang mga tinukod diha sa maong luna gipangguba na, ug ang pagkalot gisugdan para sa silong sa maong balay-puy-anan.
4 Ang Nagamandong Lawas mihukom nga ang kadaghanan sa trabaho pagabuhaton sa mga igsoon diha sa paaging boluntaryo inay kay ipakontrata ang trabaho ngadto sa kompaniya sa gawas. Ang balay-puy-anan mao ang labing taas nga tinukod nga sukad gitukod sa kaugalingong mga boluntaryong trabahante nga iya sa Sosyedad, ug siyempre, kining proyektoha mao ang kinadak-an sa pagkakaron nga ginahimo sukad masukad diha sa kasaysayan sa sanga sa Pilipinas!
5 Aron adunay kasak-an ang boluntaryong mga trabahante nga moari sa Bethel, ang Sosyedad mihikay sa pagpalit ug usa ka dakong tinukod nga mga tunga-kilometro ang gilay-on gikan sa Bethel, ug kini gamiton para sa temporaryong mga puy-anan tali sa 100 ug 200 ka trabahante. Ang mga kahikayan gihimo usab alang sa dugang lawak kan-anan para sa maong mga boluntaryong trabahante, ug ang mga opisina sa pagpanukod gipahimutang didto sa dapit tukoran. Sa panahong imong mabasa kini, sa walay duhaduha ang trabaho nagauswag na ug maayo.
MAHINANGPONG MGA BOLUNTARYO
6 Posible kayha ang pagtukod niining gidak-ona sa maong mga tinukod nga ang gamiton maoy boluntaryong mga trabahante lamang? Ang maong butang mahimong imposible diha sa sistema sa mga butang ni Satanas, apan tungod sa maayo kaayong espiritu sa panaghiusa ug kooperasyon nga nagalungtad sa organisasyon ni Jehova, kini malampos man. Nagaingon ang Salmo 110:3 nga ang kang Jehova nga “katawhan mahinangpong magatanyag sa ilang kaugalingon sa adlaw sa iyang militaryong gahom,” ug kini tinuod dili lamang diha sa buluhatong pagsangyaw ug paghimog mga tinun-an, kondili usab diha sa mga proyekto sa pagpanukod nga sama niini. Siyempre, sa tanan niini, kita nagatutok kang Jehova sa pagpanalangin sa proyekto, kay ingon sa gisulti sa Salmo 127:1: “Gawas kon si Jehova mismo ang magatukod sa balay, walay kapuslanan ang paghago niana sa iyang mga magtutukod.”
7 Ato nang nakita ang ekselenteng espiritu sa internasyonal nga kooperasyon diha sa pagplano niining dakong proyekto. Ang ‘Construction Office’ sa Brooklyn, maingon man ang sanga sa Hapon, naghago gayod sa pag-andam sa maong mga plano. Ang mga trabahante magagikan sa daghan lainlaing mga nasod, diin sila nakatrabaho na sa ubang sanga nga mga proyekto sa pagpanukod. Pagkakahibulongang butang tan-awon ang paglihok sa matuod Bag-ong Kalibotang panaghiusa!
“AKO BA MAKABOLUNTARYO?”
8 Sa walay duhaduha kining pangutanaha mosantop dayon sa imong hunahuna. Siyempre, dili posible para sa tanan sa pagtrabaho sa maong proyekto sa pagpanukod. Apan, ang Sosyedad mipadala na ug sulat, nga may petsang Mayo 1, 1988, uban sa “Information Sheets” aron ihatag ngadto kanilang buot nga moaplay ingong temporaryong mga trabahante sa maong proyekto. Kadtong pagatawgon hatagan ug mas detalyadong Questionnaire nga pagasulatan ug dayon, kon uyonan, sila pahibaloon ug dapiton. Kining grupoha mao ang dakong dugokan sa mga trabahante nga mopabilin sa proyekto sa regular nga paagi.
9 Apan, sa ulahi kami mosulat sa mga kongregasyon ug ipatin-aw kon sa unsang paagi ang uban makaari sa usa ka semana lamang o sa usa ka bulan aron makaambit sa proyekto bisan sa mubong panahon. Ang dugang impormasyon umaabot maylabot niining puntoha.
10 Dugang pa, sanglit kay ang atong grupo sa boluntaryong pagpanukod magtrabaho man sa mga Sabado ug mga Domingo, ang mga kongregasyon sa palibot sa Metro Manila mahimong tawgon sa pagpadala ug tinong mga tipo sa mga boluntaryo sa pag-abag sa mga hinapos ang semana. Niining paagiha, daghang kaigsoonan ang makaarang sa pagpakig-ambit.
11 Siyempre, buot namong ipasiugda dinhi nga wala gayoy moanhi lamang sa Bethel kon wala dapita, kay kini magpahinabog dakong kalibog. Kini ilabinang tinuod sa mga hinapos ang semana, sa dihang ang mga kongregasyon dapiton sa pag-ambit. Ang mga imbitasyon himoon sa pulipuli nga paagi ug ang inyong kongregasyon pagadapiton segon sa gikinahanglan, kon ikaw anaa sa dapit nga dili kaayo layo gikan sa Metro Manila. Busa among giawhag ang tanan nga palihog maghulat hangtod ang pagtawag himoon sa dili pa maghikay kang bisan kinsa sa pagboluntaryo. Niining paagiha ang tanang butang magalihok nga “mahapsay ug pinaagig kahikayan.”—1 Cor. 14:40.
12 Busa, kadtong adunay espesyal nga mga kahanas sa pagtukod kinsa buot nga motabang mahimong mokuhag “Information Sheet” gikan sa mga ansiyano diha sa ilang kongregasyon ug sulatan kana. Kadtong dili makaari sa bug-os-panahon apan makaarang sa pagbulig sa pipila ka panahon sa maong proyekto kinahanglang maghulat hangtod ang dugang impormasyon gikapadala pinaagi sa kongregasyon niining puntoha.
“SA UNSANG PAAGI PA NGA AKO MAKATABANG?”
13 Kon ikaw wala sa kahimtang nga sa pisikal makaboluntaryo sa maong proyekto, tingali ang pangutana sa itaas mosantop sa hunahuna. Ang kamatuoran mao nga ang tanan sa katawhan ni Jehova dinhi sa Pilipinas makabulig man pinaagig pagpadala ug boluntaryong mga amot ngadto sa Sosyedad diha sa regular nga paagi. Kini maoy sa pagkakaron ang labing mahal nga proyekto nga ang Sosyedad sukadmasukad mihimo niini dinhi sa Pilipinas. Pinaagig pagbuhat niini sa boluntaryong kahago inay kay ipakontrata, ang kadaghanan sa gipahinungod nga salapi sa Sosyedad madaginot. Sa gihapon, ang dakong salapi gikinahanglan. Ang mga igsoon sa ubang kayutaan, pinaagig pagtultol sa Nagamandong Lawas, nagapadala ug salapi ngari kanato sa pagtabang sa maong proyekto. Hibalo kami nga ikaw, usab, buot nga moambit, walay sapayan sa pagkagamay niana, sa pagsuportar sa maong buluhaton.
14 Ang uban mobati nga ang kantidad nga ilang ikaamot gamay ra kaayo nga dili madawat. Apan hinumdomi ang gamayng salapi sa balong babaye nga gihisgotan sa Lucas 21:1-4. Kon ang tanan sa kapin sa 100,000 ka magmamantala sa Pilipinas mohatag lang ug ₱5.00 sa matag bulan gikan karon hangtod sa mahuman ang proyekto sa upat ka tuig gikan karon, kini mototal sa amot nga ₱24 milyon! Ug walay duhaduha nga daghan ang makahatag ug mas pa niini, nga nagadepende sa ilang kahimtang.
15 Sa dihang kining maong suplemento hisgotan sa tigom sa pag-alagad, among irekomendar nga ang mga ansiyano mohatag ngadto sa kada magmamantala nga nagatambong ug usa ka tarhitang papel ug hangyoon silang isulat niana ang kantidad nga ilang gibati nga ilang ikaamot, sa tinagsatagsa man o ingong pamilya, sa kada bulan hangtod mahuman ang trabaho sa pagpanukod. Walay mga ngalan nga makita diha sa tarhita sa papel. Ang kantidad nga gitala mao ang maarangan sa matag usa nga dugang pa sa bisan unsang lokal nga mga obligasyon maylabot sa Kingdom Hall, ubp. Dayon, pinasukad sa kantidad nga gibutyag diha niining mga tarhitaha, ang mga ansiyano makapresentar ug resolusyon ngadto sa kongregasyon nga nagatino sa kantidad nga ilang ginauyonan nga ipadala ngadto sa Sosyedad sa matag bulan alang niining espesyal nga katuyoan. Kining kahikayana misaler ug maayo alang sa tabang sa pagbiyahe ngadto sa mga misyonaryo sa miaging tuig, ug among girekomendar nga kini pagasundon. Siyempre, ang matag usa mohatag gayod nga boluntaryo, “sama gayod sa gimbut-an sa iyang kasingkasing.” (2 Cor. 9:7) Apan sa dihang sa boluntaryo matino na sa usa kon pila ang iyang ikahatag sa matag bulan, sa walay duhaduha siya magmahunahunaon na sa pagtuman sa iyang saad diha sa regular nga paagi samtang siya makaarang sa pagbuhat niini. Ang mga amot sa kongregasyon sa matag bulan kinahanglang ibutang sa separadong linya diha sa Remittance form, nga markahang “Branch Construction Donations.”
16 Ang ubang indibiduwal hayan gustong mopadalag mga amot nga diretso sa Sosyedad alang niini nga proyekto, ug kini gipabilhan pag-ayo. Dugang pa, basin adunay mga igsoon nga gustong mopahulam ug salapi sa Sosyedad, kana man walay-tubo o may tubong singko-porsiyento. Mahimong mosulat ang maong mga tawo ngadto sa Sosyedad ug ipadala ang maong salapi nganhi kanamo uban sa sulat nga nagasaysay niana. Ang usa ka “promissory note” igapadala sa madawat na ang maong salapi. Sa bisan unsang panahon nga ang maong tawo nagakinahanglan na sa salapi nga gipahulam, mahimong iyang kuhaon kana. Apan, aron makatabang sa proyekto, mas maayong ang salapi ipundo sa Sosyedad sa labing menos tulo ka tuig kon posible gayod.
17 Mahimong mapaneguro nimo nga ang imong kinabubut-ong mga amot ginapabilhan pag-ayo sa Sosyedad ug gamiton kana nga maalamon sa pagkompleto niining dakong proyekto para sa pagpauswag sa buluhaton sa Gingharian dinhi sa Pilipinas.
18 Aduna pay usa dugang butang nga imong mahimo sa pagtabang. Hinumdomi nga ang panalangin ni Jehova maoy hinungdanon, among gidapit ang imong mga pag-ampo alang sa kalamposan sa maong buluhaton. Kita masaligon nga ang kabubut-on ni Jehova magapalihok sa mga kasingkasing sa tanan sa iyang mga alagad sa pagpaluyo niining buluhatona sa tanang paagi, ug padayon namo kamong pahibaloon sa progreso sa trabaho ngadto sa pagkahuman ug alang sa pagbayaw sa Iyang balaang ngalan.