Pagtabang sa Uban sa Pag-alagad Kang Jehova nga Tibuok-Kalag
1 Si Jehova hustong nagabaod nga ang matag usa kanato mag-alagad kaniya nga tibuok-kalag. (Mar. 12:30; Col. 3:23) Sa tinagsatagsa kita gustong mobuhat sa labing maayo nga atong mahimo sa pag-alagad kaniya.—Mat. 13:23.
KON SA UNSANG PAAGI MAKATABANG
2 Adunay ubay-ubay nga mga tawo kinsa sa regular nagatambongan sa tanang miting sa kongregasyon. Ang uban nahimo na ganing takos sa pagsugod nga moambit sa pag-alagad sa kanataran. Apan, dili ang tanan mihukom sa paghimog pahinungod ug pagpabawtismo. Ato ba silang matabangan niining paagiha? Aduna ba kitay kinasingkasing nga panaghisgot uban kanila sa personal? Hayan ang prangka, malulotong pagsubli sa artikulong “Unsay Nakaulang sa Akong Pagpabawtismo?” sa mga panid 21-26 sa Agosto 15, 1982, Bantayanang Torre (mga panid 27-31, Pebrero 15, 1982 sa Ingles) makabulig.
3 Basin ang uban maoy regular nga mga magmamantala kinsa nagaoksilyare payunir ngadtongadto. Kini ba sila kayha makahimog gikinahanglang mga pagpasibo aron mahimong mga oksilyare payunir nga makanunayon? Hayan posible ba nga sila mahimong mga regular payunir? May mga panahon, nga ang mga pulong sa pagtambag gikan sa usa ka ginikanan, ansiyano, o gikan sa usa ka payunir makapalihok kanila sa pag-alagad nga bug-os pa segon sa itugot sa ilang mga katakos ug mga kahimtang.—2 Tim. 4:2.
IHATAG ANG PAGPALIG-ON
4 Ang uban basin mahimong takos sa pagkatudlo ingong ministeryal nga mga alagad o mga ansiyano. (1 Tim. 3:1) Pinaagig pagpahimulos sa mapuslanong tabang nga gitanyag pinaagig Teokratikanhong Ministeryong Tunghaan, ang maong mga tawo mahimo mang epektibo nga mga mamumulong sa publiko. Imo bang mahunahuna ang ubang mga pribilehiyo nga ang pipila diha sa imong pamilya o kongregasyon posibleng mahimong takos kon sila makadawat ug pipila ka pagbulig?
5 Kinahanglang atong itanyag kang Jehova ang labing maayong pag-alagad nga atong ikahatag kaniya. (Pin. 4:11) Buot tang buhaton ang iyang kabubut-on nga tibuok-kalag ug buligan ang uban sa pagbuhat niana usab. (Efe. 6:6) Kadtong masanongon sa tabang ug pagpalig-on maylabot sa pag-alagad kang Jehova nga tibuok-kalag makapaneguro nga si Jehova mohatag sa “angay nga ganti.”—Col. 3:24.