Bug-os Gamita ang Atong mga Depensa
1 Si Satanas nagaatake sa mga pamilya karon, nga todatoda gayod sa paglaglag kanila. Pagkamakaguol nga ang mga anak malangkit sa seksuwal nga imoralidad, sa paghuboghubog, sa abuso sa droga, o uban pang pagkadaotan! Ang uban sa aktuwal nakakita sa ilang mga anak lalaki o babaye nga naanod gikan kang Jehova, nga nalumsan sa kalibotanong panghunahuna ug mga kailibgon. (Prov. 10:1; 17:21) Sa samang panahon, daghang batan-on ang nagpabiling mahinlo ug padayong puliki sa ilang kaugalingon diha sa buluhaton ni Jehova. (3 Juan 3, 4) Unsa ang nagpahimog kalainan? Sa daghang hitabo mao ang determinasyon sa mga ginikanan ug mga anak man sa paggamit sa bug-os sa gitaganang panagang o depensa.
GINIKANANONG MGA KAAKOHAN
2 Ang usa ka importanteng depensa mao ang bug-os nga pagsabot sa mga amahan sa mga kinahanglanon ni Jehova alang sa ulo sa usa ka panimalay ug sa pag-ila sa panginahanglan nga mosalig kang Jehova alang sa pagtultol. Ang dedikadong amahan kinahanglang manguna sa pamilya sa espirituwal nga programa sa pag-ampo, sa pagtuon, ug sa balaang pag-alagad. (1 Tim. 5:8) Kon dahomon man niya nga ang iyang asawa ug mga anak motahod sa iyang awtoridad, siya gayod magpasundayag ug kangaya diha sa iyang pagkamasinundanon sa Diyos ug sa Iyang kapunongan. (1 Juan 5:3) Sa dihang sundogon sa usa ka amahan si Jehova pinaagig pagdumala sa iyang banay diha sa mainit, mahigugmaon, ug masubayong paagi, iyang makuha ang ilang pagtahod, ug sila mas nga inklinado sa pagsunod sa iyang panig-ingnan. Kini magpatunghag kadayegan ug dungog kang Jehova.
3 Mahinumdoman ba nimo ang bahin sa kombensiyong “Mga Ginikanan—Ipahiangay ang mga Instruksiyon Aron Lukmayon ang Inyong mga Anak”? Naglakip kadto ug pasundayag nga nagpakita sa usa ka pamilyang nagtuon sa artikulo gikan sa Ang Bantayanang Torre. Gitagad sa mga ginikanan ang matag bata ug ang lebel sa iyang katakos sa pagkat-on. Dili kadto maorag makina nga paagi sa pangutana-ug-tubag, kondili ang mga ginikanan mipunting sa pag-abot o paglukmay sa kasingkasing sa ilang mga anak pinaagig kamatuoran. Kamong mga sister hayan makahinumdom ilabina sa paagi nga ang inahan mapaluyohon kaayo sa iyang bana, nga nagpakita ug pagkamasinakopon ug sa ingon nagahatag ug maayong ehemplo alang sa mga anak.—Efe. 5:21-24.
MGA ANAK—UNSA ANG GIDAHOM NI JEHOVA KANINYO?
4 Maingon gayod nga ang inyong mga ginikanan napaubos sa atake ni Satanas, mao man usab kamo. Unsa man ang inyong mga panalipod? Ang pagkamasinundanon kang Jehova ug sa inyong mga ginikanan. Ang inyong mga ginikanan nagapakaon ug nagasuportar kaninyo. Ingon niana ang ilang gibuhat sa mga katuigan. Apan samtang kamo magakahamtong, gidahom nga kamo mopas-an sa espirituwal nga mga kaakohan. Kinahanglang huptan ninyo ang kamatuoran nga inyoha gayod. Gidahom ni Jehova nga buhaton ninyo ang inyong nahibaloan nga husto. (Eccl. 11:9) Kon nakakat-on kamo nga ang dalan ni Jehova maoy matarong, nan anaa ra kaninyo sa pagbaton ug maayong panabot sa pagsunod niana.
5 Samtang kamo magatubo sa edad, ang hagit sa pagpabiling mahinlo sa moral mahimong mas matuloron. Aduna ing tibuok-kalibotang epidemya sa mahugaw nga impluwensiya, ug kamo nagaatubang niana sa matag adlaw. Ang inyong depensa anaa diha sa paghigugma kon unsa ang maayo ug sa pagdumot kon unsa ang daotan. (Sal. 52:3; 97:10) Pakig-uban kanila nga nahigugma kang Jehova. Basaha kanang makapalig-on. Tan-aw nianang maayo. (Filip. 4:8) Kon tentalon, hinumdomi ang sangpotanan sa batan-ong lalaki nga nangandoy ug kasingkasing. (Prov. 7:6-27) Magpagiya kang Jehova diha sa imong mga hunahuna ug mga buhat, ug kamo magapabiling luwas sa iyang kiliran.
6 Oo, kamong mga ginikanan ug mga anak man kinahanglang magpabiling maigmat sa mga kapeligrohan nga nagalikos kanatong tanan. Pinaagig paggamit sa bug-os sa atong mga depensa, kita mogula nga madaogon sa pakigbugno ug makapribilehiyo sa pagdayeg kang Jehova sa walay kataposan.