Ikaw ba Makaoksilyare Payunir sa Marso ug Abril?
1 Gisugdan ni Jesus ang buluhatong pagsangyaw sa maong kahinungdanon nga ang ugma-damlag sa tanang katawhan nagadepende sa sangpotanan niana. (Mat. 4:17) Kining buluhatona moabot sa iyang sangkoanan sa dili pa gayod “ang kataposan,” sa dihang ang mensahe sa Gingharian “nawali na sa tibuok pinuy-anang yuta alang sa pamatuod sa tanang kanasoran.”—Mat. 24:14.
2 Kining buluhatona mas dinalian karon kay sa sukad-masukad. Ang kahikayang katabang nga pagpayunir nakapalig-on sa daghan sa pagkahimong mas aktibo nga mahuman kining buluhatona. Ikaw ba makaoksilyare payunir sa Marso ug Abril?
MAAYO KAAYONG KAHIGAYONAN SA MARSO UG ABRIL
3 Sanglit kay ang Marso aduna ing lima ka Sabado ug ang Abril adunay lima ka Domingo, kini maoy ekselenteng mga bulan sa katabang nga pagpayunir. Bisan ang uban nga may bug-os-panahong trabaho makaarang man sa pagbuhat niini. Ang uban nga nagpayunir sa miaging tuig napanalanginan gayod ug buot nga magpayunir pag-usab niining tuiga. Nganong dili hisgotan kini uban kanilang natudlo nang payunir ug mokuhag pipila mapuslanong sugyot gikan kanila? Usab, makatambong ka man sa miting sa Pebrero 18 nga himoon uban sa malaomang mga katabang nga payunir ug makakuhag dugang pagpalig-on didto.
4 Bisan tuod ang pagpalapad sa atong pag-alagad magpasakripisyo sa ubang personal nga intereses, pinaagig pagpugas nga madagayaon, kita makaani man ug dugang espirituwal nga mga panalangin. (2 Cor. 9:6) Kadtong nagabuhat nga tibuok-kalag alang kang Jehova “mapuno sa kalipay” diha sa dagayang ani sa bag-ong mga tinun-an.—Buh. 13:48, 52.
USA KA TEOKRATIKANHONG TIKANGANAN
5 Daghan nga unang nakatilaw sa oksilyare nga pagpayunir nahimong mga regular payunir. Busa ang katabang nga pagpayunir nagasilbeng tikanganan ngadto sa mas dakong kalipay. Kon ikaw makaoksilyare payunir sa Marso ug Abril, mahimong maugmad mo ang mga balikduaw ug mga pagtuon sa Bibliya nga motabang kanimo sa paghimog hanoy nga pagpadayon ngadto sa regular payunir nga buluhaton sa Septiyembre o mas sayo pa niana.
6 Nganong daghan ang nagapalapad sa ilang ministeryo niining panahona inay kay sa pagpangita ug dugang materyal nga mga bentaha niining sistemaha? Tungod kay sila nahibalo nga “ang kalibotan mahanaw ug mao man ang kailibgon niini, pero siya nga nagabuhat sa kabubut-on sa Diyos magapabilin sa walay kataposan.” (1 Juan 2:17) Sila nagabuhat nga uyon sa ilang pag-ampo nga ang Agalon sa anihon “magpadala ug mga mamumuo ngadto sa iyang anihon.”—Mat. 9:37, 38.
7 Ang pagbuhat kutob gayod sa atong maarangan diha sa pag-alagad kang Jehova magpadayeg kanato ingon niadtong ‘nagahago ug nagapanikaysikay sa ilang kaugalingon sa pagtabang sa tanang matang sa mga tawo aron maluwas.’—1 Tim. 4:10.