Lig-ona ang Pagtuo sa Pulong sa Diyos
1 Kon aduna man gayoy panahon nga ang malig-on nga pagtuo gikinahanglan, kini karon na. Daghang tawo walay pagtuo gayod ug walay paglaom sa ugma-damlag. Ang relihiyoso ug politikal nga mga lider sagad kaayo nga mipalaom sa kawang nga mga paglaom nga ang daghang katawhan dayag nga nanghupaw. Sa pagkamatuod, ingon sa gipatin-aw ni apostol Pablo, ang “pagtuo dili iya sa tanang tawo.” (2 Tes. 3:2) Apan, ang pagtuo nahuptan sa mga Saksi ni Jehova. Aduna kita ing bug-os nga pagsalig nga ang mga saad nga makaplagan diha sa Pulong sa Diyos mamatuman.
2 Ang malig-ong pagtuo mao ang nagapalahi sa mga Saksi ni Jehova gikan sa ubang katawhan. Kini mopalihok sa maayong mga buhat nga magpaayo sa uban maingon man sa atong kaugalingon, samtang kini nagapasidungog sa Diyos. Ang maong pagtuo moresulta sa pagtugot sa Pulong sa Diyos nga maoy mogahom sa atong kinabuhi. Ang presente-adlaw nga internasyonal nga panag-igsoonay sa tinuod nga mga Kristohanon nagapasundayag sa kabililhon sa pagbaton ug pagtuo sa Bibliya ingong dinasig nga Pulong sa Diyos.—2 Tim. 3:16.
KON NGANONG TABANGAN ANG UBAN SA PAGBATON UG PAGTUO
3 Sanglit kay nameligro ang mga kinabuhi, aduna kitay kusganong rason sa pagbulig sa uban nga makabaton ug pagtuo. Nga ginahinumdoman kini, sa Nobyembre atong itanyag sa unang higayon ang Ang Bibliya—Pulong sa Diyos o sa Tawo? Ang tuyo niining bag-ong libro mao ang pag-abag sa mga tawo nga makasabot nga ang Bibliya maoy Pulong sa Diyos. Nagahisgot kini ug nagapukan sa daghan nga mga pagdaot nga gitumong batok sa Pulong sa Diyos. Nagahatag kinig mga tubag nga makapatagbaw ngadto sa ubay-ubay nga mga pangutana, sama sa: Ang Bibliya ba di-siyentipikanhon? Kini ba nagasumpakiay sa iyang kaugalingon? Kini ba sugilambong o estorya lamang? Ang mga milagro nga gihisgotan diha sa Bibliya nahitabo ba gayod? Napamatud-an ba sa arkiyolohiya nga bakak ang kasaysayanhong pagkatukma sa Bibliya? Dugang pa, kining basahona mipresentar ug daghan sa maayo kaayong mga pamatuod sa pagkadinasig sa Bibliya. Kini nagapatagad ngadto sa matuod nga mga tagna sa Bibliya ug sa kahibudngang pagkaharmonya niini sa katibuk-an.
4 Ang mapuslanong kaalam sa Bibliya ug ang gahom niini sa pag-usab sa mga tawo ngadto sa kaayohan maoy bahin lamang sa pamatuod nga nagalig-on nga ang Bibliya maoy Pulong sa Diyos. Kita mao ang responsable sa pagbulig sa mga tawo sa pagkakat-on niining ebidensiyaha. Sa pagbuhat niini, kita gayod una nga motudlo nila sa pagtuo sa ginasulti sa Bibliya.
5 Lagmit gayod nga kita natabangan sa pagbaton ug pagtuo sa Pulong sa Diyos pinaagig usa ka pagtuon sa Bibliya sa balay. Kon kita nabenepisyohan tungod kay aduna usa nga nagtuon uban kanato, buot ta man nga mobalik gilayon ngadto kanilang atong napahimutangan ug literatura ug tanyagan ug pagtuon sa Bibliya sa balay aron tabangan silang makabaton ug pagtuo.
BAG-ONG LIBRO MAKABULIG SA PAGBATON UG PAGTUO
6 Sa dihang sa tininuod timbangtimbangon ang ebidensiya, ang sinserong tawo modawat gayod nga ang Bibliya maoy Pulong sa Diyos. Kining bag-ong libro nagabutyag ug daghan sa maong pamatuod diha sa paaging daling mabatonan. Gusto tang palig-onon ang uban sa pagdawat sa Bibliya ingong Pulong sa Diyos ug sa pagkinabuhi subay sa dinasig nga tambag niini. Kadtong mohimo niini makapatugbabaw nga malipayon sa tim-os nga pag-ampo sa salmista: “Palandonga kon giunsa ko sa paghigugma ang imong mga lagda. O Jehova, buhion mo ako sumala sa imong mahigugmaong-kalulot. Kamatuoran ang natingban sa imong pulong, ug ang tagsatagsa sa imong matarong mga tulomanon nagapadayon sa walay kataposan.”—Sal. 119:159, 160.
7 Sa Nobyembre, atong mapalig-on ang uban sa pagbasa ug pagtuon sa Pulong sa Diyos pinaagig pagtanyag sa basahong Ang Bibliya—Pulong sa Diyos o sa Tawo? sa amot nga ₱16.00.