Ipaambit ang Espirituwal nga mga Bahandi sa Uban
1 Sama kang Moises, ang moderno-adlaw nga mga Saksi ni Jehova nahibalo nga ang materyal nga mga bahandi niining kalibotana dili ikatandi sa bili sa espirituwal nga mga bahandi. (Heb. 11:26) Ang salapi makapalit ug mga balay, mga kotse, ug ubang mga kabtangan, apan dili mapalit niana ang kinabuhi, kalinaw sa hunahuna, o ang pag-uyon ni Jehova.
2 Ang kahibalo ug pagsabot bahin sa Pulong sa Diyos ug katuyoan maoy tinuod espirituwal nga mga bahandi. (Col. 2:3) Kining talagsaong mga bahandi makahatag ug dalisay nga kalipay karon, uban sa solidong paglaom sa ugma-damlag. Pagkabulahan gayod nato nga nakadawat sa maong espirituwal nga mga bahandi!
KON SA UNSANG PAAGI MAPADATO ANG UBAN
3 Matabangan ta ang daghang uban pa nga mahimong dato sa espirituwal pinaagig pagpaila nila ngadto sa atong mga publikasyon, kay kini motultol man kanila ngadto sa ‘natagong mga bahandi’ sa diyosnong kaalam. (Prov. 2:4) Sa Hulyo ug Agosto, atong itanyag ang bisan unsang brosyur sa matag tukmang higayon. Kon atong hinumdoman kon sa unsang paagi kining mga basahona nagpadato sa atong kinabuhi, kita dili magduhaduha kondili mangita ug mga paagi sa pagtanyag sa mga brosyur ngadto sa daghang tawo nga kutob sa atong maarangan. (Prov. 3:27) Paghimog mga notasyon sa mga adres sa mapahimutang ang indibiduwal nga mga magasin, uban sa tumong nga balikon kana ug tanyagan sa brosyur, uban sa tuyo nga makasugod ug usa ka pagtuon sa Bibliya sa balay.
4 Sa espirituwal nga diwa, sa unsang paagi kita mahisama sa tawong mahadlokon-Diyos sa Salmo 112 kinsa nagpang-apod-apod gayod sa iyang bililhong mga butang? (Sal. 112:1, 3, 9) Gikinahanglan tang pangitaon ang karnerohong mga tawo ug abagan silang matagbaw ang ilang espirituwal nga panginahanglan. (Mat. 5:3) Kini nagakinahanglan nga pahimuslan ta ang matag higayon sa pagpamatuod sa pormal ug di-pormal nga paagi.
5 Sa ubang dapit, ang pagsangyaw sa magabii nahimong mabungahon kaayo sanglit kay sa maong panahon ang mga tawo sa kasagaran anaa sa balay. Nasulayan mo na bang mosangyaw sa pultahan ngadto sa pultahan sa usa o mas pang oras sa dili pa ang inyong Pagtuon sa Basahon sa Kongregasyon? Nganong dili himoon ang tinong kahikayan alang sa pagbuhat niini?
6 Aduna ka ba ing panahon sa pagpamatuod diha sa imong dapit trabahoanan? Usa ka sister mibutang sa pipila ka magasin ibabaw sa iyang talad-sulatanan aron ang uban makakita niana. Sa wala pa matapos ang buntag, ang tanang magasin napahimutang na. Ubay-ubay gayod sa iyang kaubanan sa trabaho ang nagpakitag tinuod nga interes, ug siya nakakuhag 18 ka suskrisyon.
7 Ang salapi, bulawan, ug tanang uban pang mga bahandi dili ikatandi sa espirituwal nga mga bahandi sa kahibalo nga atong nakab-ot pinaagi sa organisasyon ni Jehova. Pinaagig pagpaambit sa atong espirituwal nga mga bahandi sa uban, atong ginapakita ang apresasyon kon unsa ang atong nadawat ug atong mahuptan ang padayong panalangin ni Jehova.—Prov. 19:17.