Pagtanyag sa Maayong Balita—Diha sa Mainampoong Paagi
1 Misulat ang apostol nga si Pablo nga malig-onon: “Kay sa tanang butang ako nakabaton ug kalig-on pinaagi kaniya nga nagahatag kanako ug gahom.” (Filip. 4:13) Kita usab kinahanglang bug-os nga mosalig kang Jehova aron ikatanyag ang maayong balita nga maisogon. Sa unsang paagi atong mahimo kini?
2 Gipasiugda ni Jesus ang panginahanglan alang kanato sa “pag-ampo kanunay ug dili moundang.” (Luc. 18:1) Mitambag si Pablo: “Padayon sa pag-ampo.” (1 Tes. 5:17) Oo, ang kalig-on magsumikad sa pag-ampo. Hayan kita mag-ampo alang sa kahigayonan sa pagpamatuod sa uban, alang sa kaalam ug pagkamailahon diha sa buluhatong pamalaybalay, ug sa kalamposan sa pag-abot sa mga kasingkasing sa atong mga ginatun-an sa Bibliya. Gikinahanglan ta sa pag-ampo alang sa pagpauswag sa intereses sa Gingharian sa tibuok nga kalibotan. (Mat. 24:14) Kita kinahanglang ‘magtukaw’ diha sa pag-ampo aron dili makatulog sa espirituwal ug mapauswag ang atong pagpabili sa pribilehiyo sa pagsulti bahin sa mga katuyoan ni Jehova.—Col. 4:2.
SA MGA PAGTUON SA BIBLIYA
3 Ngano ang pag-ampo importante kaayo diha sa pagtuon sa Bibliya? Ang pagsugod uban ang pag-ampo magbutang kanato diha sa hustong panghunahuna ug makabulig kana sa estudyante sa pagkaamgo sa kahinungdanon kon unsa ang ginahisgotan. Ang estudyante usab makakat-on kon unsaon sa pag-ampo pinaagig atong panig-ingnan.—Luc. 11:1.
4 Unsa ang pipila ka butang nga atong ikalakip sa mga pag-ampo diha sa mga pagtuon sa Bibliya? Ang modelong pag-ampo ni Jesus ug ang pag-ampo ni Pablo maylabot sa mga taga-Filipos maoy ekselenteng mga ehemplo. (Mat. 6:9-13; Filip. 1:9-11) Dili man kinahanglang taas ang atong mga pag-ampo, kondili kini maglangkit sa tino nga mga butang. Ato gayong ilakip ang mga pulong sa pagdayeg kang Jehova. (Sal. 145:3-5) Ang pagbutyag sa ngalan sa estudyante, nga nagaila tingali sa iyang mga kahimtang, ug sa pag-ampo nga siya mouswag sa espirituwal nga paagi maoy makaayo. Samtang siya magauswag, atong mahangyo ang panalangin ni Jehova sa iyang mga panlimbasog sa pagtambong sa mga tigom ug sa pagpaambit sa kamatuoran ngadto sa uban. Ilakip ang mga hangyo alang sa panalangin ni Jehova sa tibuok-kalibotang buluhatong pagsangyaw.
ALANG SA ATONG MGA IGSOONG LALAKI UG BABAYE
5 Ang tanan sa katawhan ni Jehova maoy atong kaubanang mga mamumuo. (1 Cor. 3:9) Busa, sa dihang baldahon sa kalibotanong mga awtoridad ang buluhatong pagsangyaw, kita mapalihok sa pag-ampo “bahin sa mga hari ug ang tanan kanila nga anaa sa hataas nga katungdanan.” Alang sa unsang katuyoan? “Aron nga kita makapadayon sa mahusay ug malinawon nga kinabuhi uban sa bug-os nga debosyon ug pagkamatim-oson.” (1 Tim. 2:1, 2) Ang maong mga pag-ampo kon maohon maoy sa pagdapig sa atong mga igsoon sa tibuok nga kalibotan.
6 Pinaagig pag-ampo, atong mahangyo ang kalig-on alang sa atong mga igsoon kinsa nagasangyaw ubos sa malisod nga mga kahimtang ug alang kanilang masakiton sa espirituwal. (2 Tes. 3:1, 2) Maayo usab sa pag-ampo alang sa mga ansiyano, nagabiyaheng mga magtatan-aw, ug sa Nagamandong Lawas—ang tanan “kanilang nagapangabudlay taliwala kaninyo.”—1 Tes. 5:12.
7 Gikinahanglan tang itugyan kang Jehova ang atong mga kabalaka. (Sal. 55:22; 1 Ped. 5:7) Kita gipasaligan nga unsa man ang atong hangyoon nga uyon sa iyang kabubut-on, siya magapatalinghog kanato. (1 Juan 5:14) Busa, kon mag-ampo kita alang sa tabang ni Jehova sa atong ministeryo, kita magmasaligon gayod nga siya magapatalinghog ug magpalampos sa atong tinguha.—2 Tim. 4:5.