Pagsuportar sa Programang Pagpanukod ug Kingdom Hall
1 Karong mga adlawa ang mga Kristohanon nagapadayon sa pag-atiman alang sa espirituwal buluhatong pagpanukod nga gisugdan ni Jesus mga 1,960 ka katuigan kanhi sa misugod siya sa pagpanigom ug mga tinun-an. (Mat. 4:17; 7:24, 25, 28; Juan 7:46) Si Jehova dagaya nga mipanalangin niining buluhatona. (Prov. 10:22) Samtang kita molakaw sa pagmantala sa Gingharian sa Diyos, kita usab nagapanukod sa pag-atiman sa umaabot nga kauswagan.—Eccl. 11:6.
2 Sa kada tuig sa Pilipinas duolan sa 100 ka bag-ong kongregasyon ang maporma, ug kini nagakinahanglag mga Kingdom Hall nga matigoman. Dugang pa, daghang Kingdom Hall gamay na kaayo o daan na o gitukod sa mahuyang nga materyales ug busa gikinahanglang pulihan. Sulod sa miaging lima ka tuig, kapin sa 600 ka bag-ong Kingdom Hall ang gitukod sa Pilipinas tungod sa kahikayang pahulam ug salapi sa Kingdom Hall. Kini gitagana pinaagig ‘Kingdom Hall Fund,’ nga nagakinahanglan ug suportar sa mga igsoon sa tibuok kalibotan. Ang dalayegong positibong tinamdan sa mga igsoon sa paghulip niini nga panginahanglan gigantihan ug dako.—Sal. 41:1; Prov. 19:17; Eccl. 11:1; Luc. 14:13, 14.
MAHIGUGMAONG TABANG GITANYAG SA DAGHAN
3 Ang ‘Kingdom Hall Fund’ sa Sosyedad nagalihok ingong “nagatuyok nga pundo.” Nga mao, ang mga amot nga madawat ibutang ngadto sa kuwenta nga gigamit lamang alang sa paghimog mga pahulam nga salapi aron tabangan ang mga kongregasyon sa pagpatunghag salapi sa ilang mga proyekto sa Kingdom Hall. Samtang ang mga kuwarta nga madawat giisip ingong mga amot ngadto sa ‘Kingdom Hall Fund,’ kini dili mahimong usa ka “gasa” aron humanon ang maong proyektong Kingdom Hall. Hinunoa, ang gipahulam nga salapi ngadto sa mga kongregasyon kinahanglang bayaran. Sa himoon kini ang naipon nga mga bayad uban sa padayong mga amot gikan sa mga kongregasyon ginapahulam ngadto gihapon sa ubang mga kongregasyon alang sa ilang mga proyekto sa pagpanukod.
4 Uyon sa among sulat ngadto sa tanang kongregasyon sa Enero 1, 1991, daghang kongregasyon ang regular nga mitabang pinaagig mga resolusyon nga nag-awtorisar ug salapi nga iamot ngadto sa ‘Kingdom Hall Fund.’ Bisan ang uban nga nagabayad sa nahulam nga salapi sa ilang mga Kingdom Hall nagapadala man ug dugang mga amot ngadto sa ‘Kingdom Hall Fund,’ nga sa ingon ‘nagatagad, dili lang sa personal nga interes sa ilang mga kaugalingon, kondili sa personal nga interes alang nianang sa uban.’ (Filip. 2:4) Kini dalayegon kaayo ug ginapabilhan. Bisan pa ang kongregasyon naghimog resolusyon, ang usa ka contribution box para sa ‘Kingdom Hall Fund’ nga kombeniyenteng gibutang diha sa Kingdom Hall magpaarang sa mga tawong nagatinguhang moamot sa kinabubut-on ngadto sa pundo sa pagbuhat niana. Ang bisan unsang kuwarta nga gihulog niining ‘contribution box’ kinahanglang ipadala ngadto sa Sosyedad nga dugang pa niadtong gihimo pinaagig resolusyon sa kongregasyon.
PAGPATUNGHAG SALAPI SA PAGTUKOD UG KINGDOM HALL
5 Sa dihang ang usa ka kongregasyon maghunahuna sa pagtukod ug bag-ong Kingdom Hall, kinahanglang tagdon pag-ayo sa mga ansiyano ang katakos sa kongregasyon sa pagbayad sa galastohan nga nalangkit. (Luc. 14:28-30) Dili maalamon nga maghulam ug bug-os nga kantidad gikan sa Sosyedad kondili adunay pagsurbi nga unang himoon aron sa pagtino (1) kon pila ang maamot sa mga igsoon aron makabulig sa pagpalit sa yuta ug sa galastohan sa pagtukod, (2) kon pila ang hulamon diha sa lokal ug unsang gidugayon nga ang salapi mabatonan, ug (3) kon pila ang binulan nga ikaamot sa mga magmamantala aron ibayad sa bisan unsang gikinahanglang hulamon nga dugang pa sa normal nga mga galastohan.
6 Ibutang sa hunahuna nga ang mas nga pagpatunghag salapi diha sa lokal, menos ang inyong panginahanglan sa paghulam gikan sa Sosyedad ug busa menos ang kinahanglan ninyong bayaran sa kada bulan. Kon ang kongregasyon makapatunghag salapi sa kaugalingong pagpalit ug yuta ug unya mohangyo ug tabang sa Sosyedad alang sa pagtukod, kini ang gipalabi. Apan, wala kami magdasig sa paghulam ug kuwarta gikan sa mga igsoon, nga dahomon nga bayaran kana gikan sa salapi nga pahulam sa Sosyedad sa dihang maaprobahan kana.
7 Human matino ang mga puntos sa itaas, ang mga ansiyano mohisgot gayod sa ilang giplanong proyekto uban sa magtatan-aw sa sirkito, kinsa makahatag kanilag tambag ug mga sugyot sa maong proyekto. Sa dihang mosulat ang kongregasyon sa Sosyedad alang sa tabang sa pahulam nga salapi, ang magtatan-aw sa sirkito kinahanglang modugang ug usa ka sulat rekomendasyon maylabot sa panginahanglan ug pagkamapuslanon sa maong proyekto. Ang tabang sa salapi itagana samtang adunay pundo ug sumala sa maong panginahanglan. Palihog matikdi: Ang Nagamandong Lawas sugod sa Septiyembre 1, 1991 naglimite na sa kantidad sa salapi nga atong magamit alang sa ipahulam nga kuwarta sa Kingdom Hall tungod sa pinansiyal nga mga panginahanglan sa ubang mga dapit. Kini nagakahulogan nga kadto lamang nga mga hangyo sa mga pahulam nga salapi nga gikinahanglan gayod mao ang pagaaprobahan, ug bisan kining mga hangyoa kinahanglang maghulat sa dugaydugay gayod nga panahon antes mabatonan ang supisyenteng mga pundo.
MAALAMONG PAGGAMIT SA PUNDONG SALAPING GITAGANA
8 Sa dihang madawat na ang pahulam nga salapi, ang usa ka komite sa pagtukod kinahanglang organisahon ug ang hustong mga talaan sa panalapi pagahuptan sa tanang transaksiyon. Pagahimoon ang kanunay nga mga report ngadto sa kongregasyon bahin sa galastohan sa maong pundo ug ang progreso sa konstruksiyon. Ang kuwartang nadawat gikan sa Sosyedad dili gayod gamiton sa bisan unsang katuyoang negosyo o pagpahulam ngadto sa mga igsoon. Kini maoy salapi nga gigahin na alang sa sagradong katuyoan ug busa kinahanglang dili gamiton sa ubang mga paagi.
9 Dakong salapi ang madaginot pinaagig boluntaryong trabaho kon kana mabatonan. Kon daghang igsoon diha sa kongregasyon maoy mga panday, mga mason o kantero, mga elektrisiyan, ubp., ang ilang pagboluntaryo sa ilang panahon ug mga kahanas makabulig ug dako sa pagpamenos sa galastohan sa maong proyekto. Nakaplagan nga kadtong mga kongregasyon nga naggamit ug daghang binayran nga mga trabahante daling nahurot ang kuwarta antes mahuman ang proyekto nga ilang gisugdan.
10 Ang laing paagi sa pagdaginot ug salapi mao ang pagpilig simpleng desinyo nga dili mahalon ug wala magkinahanglag dakong trabaho. Ang Sosyedad wala magrekomendar ug maambong nga entrada nga adunay desinyo sa ‘watchtower’ nga gitukod niana, kay kini mahal ug wala-kinahanglana. Bisan pa kon ang kongregasyon adunay igong salapi, dili maalamon nga himoon ang sobrang mga dekorasyon ug mahalong mga desinyo. Dili mapuslanon nga adunay maambong nga atubangan sa Kingdom Hall ug unya mosulay sa pagdaginot ug salapi sa mas importanteng mga butang, sama sa mga kasilyas, luna sa literatura, mga lingkoranan, ubp.—Filip. 1:10.
11 Ang Sosyedad adunay simpleng mga desinyo nga inyong mahangyo kon gusto ninyo ug kini makatabang sa inyong konstruksiyon sa Kingdom Hall. Kon kamo mogamit sa lokal nga arkitekto sa pagdesinyo sa tukoronon, paneguroon nga sundon niya ang mga gimbut-an sa komite sa pagtukod, tungod kay sagad ang desinyo mismo mahimong punto kana sa pagtino sa galastohan sa maong tukoronon. Pinaagig pagwagtang sa wala-kinahanglanang mga desinyo ug paghupot niana nga simple, ang usa ka maanindot nga Kingdom Hall matukod man nga dili dako ang gasto.
PAGKAMATINUMANON SA PAGSUPORTAR SA SALAPING GINAPAHULAM
12 Kadtong mga kongregasyon nga wala maghulam makapakita sa ilang suportar niining tibuok-kalibotang kahikayan pinaagig regular nga mga amot ngadto sa ‘Kingdom Hall Fund.’ Ingon sa gihisgotan sa itaas, bisan ang pipila nga nagabayad sa pahulam nga salapi nagahatag man ug dugang mga amot ngadto sa tibuok-kalibotang pundo. Apan tungod kay dagkong mga kantidad ang napahulam na karon ngadto sa mga kongregasyon, ang labing importanteng amot nga mahimo sa usa ka kongregasyon nga adunay nahulam nga salapi mao ang pagkamatinumanon sa regular nga pagpadala sa ilang binulang mga bayad ngadto sa Sosyedad. Tungod kay ang atong kongregasyon gitugyanan sa pundong salapi sa paggamit niana nga temporaryo, kita gayod maoy mga piniyalan sa maong salapi, ug ingon sa gisulti sa 1 Corinto 4:2: “Kon unsa ang gikinahanglan sa mga piniyalan mao nga ang tawo makaplagan nga kasaligan.”
13 Diin ang usa ka kongregasyon nagadawat ug pahulam nga salapi gikan sa Sosyedad ug unya nagapasagad sa pagbayad segon sa gikasabotan, kini gayod dili pagpakitag mahigugmaong espiritu, kay ang maong pundong salapi wala man ikabalik ngadto sa Sosyedad aron gamiton sa pagtabang sa ubang mga kongregasyon. Sayod kita nga ang tanan buot nga magpakita sa ilang apresasyon pinaagig regular nga pag-amot ngadto sa pagbayad sa nahulam nga salapi.
14 Maoy Kasulatanhon sa paghatag ug pinansiyal nga suportar. Ang Hebreong pulong nga gihubad nga “amot” (contribution) nagakahulogang “sagradong bahin” (sacred portion). (Ex. 25:2, Reference Bible, footnote) Dili kita makapadato kang Jehova pinaagig atong mga amot ngadto sa iyang buluhaton, pero niining paagiha kita nagapakita sa atong gugma kaniya ug sa atong mga igsoon, ug siya nagapanalangin kanato.—1 Cron. 29:14-17; Prov. 3:9.
15 Si Pablo misulat sa 2 Corinto 8:12: “Kay kon ang pagkaandam maoy una, kini ilabinang madawaton sumala sa nabatonan sa usa ka tawo, dili sumala sa wala mabatoni sa usa ka tawo.” Maoy maayo kon ang tanan diha sa kongregasyon mapalig-on sa regular nga paggahin ug usa ka kantidad sumala sa ilang katakos ug tinguha. (Itandi ang 1 Corinto 16:1-4.) Si Tertullian misulat bahin sa unang Kristohanong kongregasyon: “Ang kada tawo makausa sa kada bulan nagadalag pipila kasarangang salapi—o sa panahong gusto niya, ug lamang kon buot niya, ug kon siya makaarang; kay wala may gipugos; kana maoy boluntaryong halad.” Siyempre, kon ang usa naghimog saad kang Jehova diha sa iyang kasingkasing sa paghatag ug tinong salapi sa kada bulan aron sa pagbulig sa balayranan sa nahulam nga kuwarta sa Kingdom Hall, nan kinahanglang iyang “buhaton kon unsa gayod ang gisaad sa iyang kasingkasing,” nga matinumanong nagatuman sa iyang saad.—2 Cor. 9:7.
HUPTI KANUNAY ANG MASIBOTONG ESPIRITU
16 Ang tanan pagadayegon sa ilang pagkamahinatagon sa pagsuportar sa ‘Kingdom Hall Fund.’ Daghang ekspresyon sa apresasyon ang nadawat gikan sa mga kongregasyon nga natabangan na, ug ang ngalan ni Jehova nabayaw diha sa komunidad diin ang bag-ong mga Kingdom Hall natukod. Tungod niini nga kahikayan, ang usa ka “pagkaangay-angay” nagakahitabo taliwala sa mga kongregasyon. (2 Cor. 8:14) Daghang gagmay o mas pobreng mga kongregasyon ang makaarang sa pagtukod ug mga Kingdom Hall, nga imposible kon wala ang kahikayang pahulam ug salapi.
17 Sa panahon sa pagtukod sa bag-ong Kingdom Hall, ang kadasig, kasibot, ug positibong espiritu makadugang sa kalamposan sa maong proyekto. Ang samang espiritu kinahanglang magpadayon samtang nagatinguha kita sa pagtabang sa daghan pa nga makig-uban kanato didto sa Kingdom Hall. Ang maong kasibot mosangpot sa mga kauswagan diha sa tigtambongan sa mga tigom ug sa tingusbawan sa kongregasyon.
18 Samtang kita magapadayon sa pagpalapad sa atong ministeryo, nga nagapanikaysikay gayod sa atong kaugalingon, sa walay duhaduha ang panalangin ni Jehova magauban kanato. (Luc. 13:24) Kita wala mahibalo kon unsang kauswagana ang nagahulat kanato sa ugma-damlag. Apan kita kinahanglang magmaandam sa pag-abiabi sa bisan unsang umaabot nga pagpanulod sa mga magsisimba. Kana nagakinahanglag pangandam sa atong bahin karon. Busa kita magaampo sa padayong panalangin ug pagtultol ni Jehova. Sa pagpanukod alang sa umaabot, hinaot nga kitang tanan mahimong kaubanang mga mamumuo ni Jehova—sa pisikal nga paagi, materyal nga paagi, ug sa espirituwal nga paagi. Siya gayod magapanalangin kanato samtang sa hustong paagi atimanon ta kadtong nagadali sa pagsulod sa iyang organisasyon sa Gingharian sulod sa ultimang bahin niining kataposang mga adlaw.—Isa. 60:8, 10, 11, 22.