Mga Tigom sa Pag-alagad Alang sa Pebrero
Semana sa Pebrero 10-16
5 min: Lokal nga mga pahibalo ug Mga Pahibalo gikan sa Atong Ministeryo sa Gingharian. Paneguroang pahinumdoman ang tanan sa miting niadtong nagaplanong mag-oksilyare payunir sa Marso, Abril, ug Mayo sa Domingo, Pebrero 16.
10 min: “Usa ka Mapuslanong Paagi sa Pagpangandam Alang sa Pag-alagad sa Kanataran.” Hisgoti ang artikulo uban sa tigpaminaw, ug dayon motawag sa tulo o upat ka magmamantala nga natudlo nang daan aron sa paghimog tinong mga komento sa mga paagi nga kining paagiha nakabenepisyo kanila. Pananglitan, mahimong magkomento sila sa pagkalainlain sa mga presentasyon, mga paagi nga ikapahiangay ang materyal ngadto sa lokal nga teritoryo, pagkamapaayon-ayonon, o nga kining paagiha magpatugot sa mga magmamantala sa pagpili sa materyal nga sila mobating komportable sa pagpresentar. Palig-onang mga magmamantala sa pagdala sa ilang kopya sa Atong Ministeryo sa Gingharian ngadto sa mga tigom sa dayon na nga pagsangyaw.
20 min: “Pahibaloa ang Tanan nga Haduol Na ang Tibuok-kalibotang Kasegurohan.” Human sa mubong pasiunang mga komento, tagda ang kada pagbalhin (transition) ug ipasundayag ang paggamit niana pinaagig andam-kaayong mga magmamantala segon sa itugot sa panahon. Kon mapuslanon, maayong ang mopasundayag sa Pagbalhin Isip 2 maoy usa ka batan-on. Ang Pagbalhin Isip 3 nagatugot sa magmamantala nga labing menos magbilin ug makapainteres Kasulatanhong punto diha sa hunahuna sa tagbalay. Sa kainit palig-ona ang mga igsoon sa paggamit sa usa sa gisugyot nga mga pasiuna sa panid 4 ug sa usa niining mga pagbalhina.
10 min: Panaghisgot sa “Aborsiyon” gikan sa librong Nangatarongan, mga panid 25-6. Human sa mubong pasiuna, nga nagapakita kon sa unsang paagi ang aborsiyon anaa sa mga balita karon ug kabalaka ngadto sa mga minilyong katawhan, ipaila ang tagboan (setting) sa usa ka sister nga nagadumalag pagtuon sa Bibliya. Ang bag-ong estudyante sa Bibliya nagatug-an sa sister bahin sa iyang dulot nga kabalaka tungod sa pagkamabdos. Iyang gipatin-aw kon sa unsang paagi siya nabalaka, tungod kay ang pinansiyal nga kahimtang sa pamilya di man maayo. Ang iyang kalibotanong mga paryente nag-awhag kaniya nga magpahulog gilayon. Gisugyot sa sister nga ilang paklion ang librong Nangatarongan ug susihon ang Kasulatan aron tinoon kon unsa ang pagtamod ni Jehova sa kinabuhi sa di pa natawong bata ug kon iya bang giisip nga husto ang aborsiyon. Ila unang tagdon ang kahulogan sa aborsiyon. Dayon ilang hisgotan ang mga pangutana, mga teksto, ug ubang mga komento sa mga panid 25-6. Kinahanglang tabangan sa sister ang maong estudyante sa pagpangatarongan ug sa pag-ila sa pagkasagrado sa kinabuhi.
Awit 30 ug paniklop nga pag-ampo.
Semana sa Pebrero 17-23
10 min: Lokal nga mga pahibalo ug Teokratikanhong mga Balita. Ilakip ang taho sa kuwenta ug balos-pasalamat sa donasyon.
15 min: “Mga Pasiuna nga Mapapaminaw ang mga Tagbalay.” Sa mubo tagda ang kahimtang sa lokal nga teritoryo. Unsang mga isyu ang importante ngadto sa mga tagbalay? Ipunting sa introduksiyon ug presentasyon nga lagmit malamposon sa lokal. Ipasundayag sa andam-kaayong magmamantala kining presentasyona ug tanyag sa librong Worldwide Security, o ang libro nga ginatanyag diha sa inyong lokal nga pinulongan. Himoon gayod sa magmamantala ang presentasyon sumala sa gilaraw sa artikulo. Dayon ang edad-nagtunghang batan-on makapasundayag sa samang presentasyon ug motapos niana pinaagig pagtanyag sa mga magasin sa tawong interesado. Palig-onang tanan sa pagsulay niining paagiha sa pag-alagad sa kanataran.
20 min: Kon sa Unsang Paagi ang Nag-inusarang mga Ginikanan Makatabang sa Ilang mga Anak. Mubong pasiuna nga sundan sa pasundayag sa inahan uban sa duha ka anak nga nangandam alang sa pag-alagad sa kanataran. Mas daghan ang nag-inusara-ginikanan nga mga pamilya nga anaa sa organisasyon karon kay sa sukad-masukad sa miagi. Ang paagi nga ang inahan ni Timoteo ug apohan-babaye misilsil sa kamatuoran diha kaniya nagataganag maayo kaayong ehemplo alang sa tanang ginikanan nga pagasundon. (2 Tim. 1:5; 3:14, 15) Pasundayag: Inahan, tin-edyer anak babaye, ug mas batan-ong anak babaye naglingkod palibot sa lamesa sa kusina, nga human na manihapon. Inahan moingon nga sa di pa manghugas sa plato ilang sublion ang ilang mga presentasyon sa pagsangyaw ug siya ang mahimong tagbalay. Ang manghod anak babaye mogamit sa pasiuna sa panid 4 sa Atong Ministeryo sa Gingharian ug mopresenter niana ngadto sa iyang inahan. Mainitong gidayeg sa inahan ang iyang maayong paghimo niana ug mihangyo kaniyang basahon ang teksto nga gisugyot sa Sosyedad. Gilantaw dayon sa manghod anak babaye ang Isaias 9:6, 7 ug mibasa niana. Dayon misukna ang inahan sa magwang anak babaye kon unsaon niya sa pagtanyag sa libro. Anak babaye mipili sa usa ka pagbalhin (transition) gikan sa panid 1 sa Atong Ministeryo sa Gingharian ug mitanyag niana ngadto sa iyang inahan. Gidayeg siya sa inahan ug unya mipalig-on sa duha ka babaye sa pagpraktis sa introduksiyon ug pagbalhin (transition) aron sa pagtanyag sa libro diha sa pag-alagad sa kanataran. Ang mga anak babaye gisultihan nga ila pa kanang bansaybansayon ug dayon manghugas na sa plato. Gitiklopan sa ansiyano ang bahin pinaagig pagdasig sa tanang pamilya diha sa kongregasyon nga tagan-an ug mahigugmaong tabang ang ilang mga anak.
Awit 183 ug paniklop nga pag-ampo.
Semana sa Peb. 24–Mar. 1
15 min: Dumalahon sa ansiyano ang lokal nga mga pahibalo ug tagdon ang lokal nga mga panginahanglan. Segon sa itugot sa panahon, hisgotan ang lainlaing mga puntong igsusulti gikan sa kinabag-ohang mga magasin. Magpilig usa nga makasumpay ug maayo sa usa sa gisugyot nga mga pasiuna ug mga pagbalhin (transitions) niini nga gula sa Atong Ministeryo sa Gingharian. Dayon ipasundayag sa maayo-pagkaandam nga magmamantala ang bug-os nga presentasyon ginamit ang introduksiyon ug ang pagbalhin, nga nagatanyag sa mga magasin ngadto sa tawong interesado. Ipunting nga pinaagig pagpakighisgot sa mga tawo ug sa paggamit sa gisugyot nga mga presentasyon, dili malisod sa pag-ila sa mga tawong interesado.
15 min: “Dawata ang Kaakohan sa mga Balikduaw.” Pangutanag tubag. Sa kainit palig-ona ang tanang bug-os moambit sa paghimog mga balikduaw. Dasigang tanang mobalik sa sunod nga semana sa dihang ang Tigom sa Pag-alagad maghisgot kon unsay isulti sa balikduaw.
15 min: Ang Payunir nga Pag-alagad Alang ba Kanako? Niining nasora mga 14 porsiyento sa tanang magmamantala maoy mga regular payunir. Ibutyag ang lokal nga gidaghanon alang sa pagtandi. Ang dugang pa ba kanato, apil ang mga batan-on nga mograduaw na sa hayskol sa di madugay, makahimog luna alang sa bug-os panahong pag-alagad? Interbiyuha ang tulo ka regular payunir, ilabina ang usa ka batan-on, usa ka asawa, ug usa ka retirado. (Kon walay mga regular payunir, magamit man ang katabang nga mga payunir o mga magmamantala nga nakapayunir na.) Tagda ang mga galastohan. Unsang mga matang sa di-bug-os-panahong trabaho ang mabatonan diha sa inyong lugar? Sa unsang paagi ang usa makaayom-ayom sa iyang mga magamit? Unsang mga kausaban sa batasan sa paggasto ang ilang gihimo? Tagda ang eskedyol sa pagkab-ot sa gikinahanglang oras. Aduna ba silay mga suliran sa panglawas? Sa unsang paagi ilang nabuntog kana? Unsang ubang mga hagit nga sa malamposon nabuntog nila? Ang mga interbiyu kinahanglang positibo ug makapalig-on. Himoang mainitong pagdani sa tigpaminaw nga tagdon ang personal nga mga kahimtang aron tinoon kon mas pa ang makasulod sa tibuok-panahong pag-alagad.
Awit 164 ug paniklop nga pag-ampo.
Semana sa Marso 2-8
10 min: Lokal nga mga pahibalo. Dasigang mga magmamantala nga mag-oksilyare payunir sa Marso ug Abril. Palig-onang mga pamilya, ingon man ang batan-ong mga magmamantala nga bakasyon sa Marso ug Abril, sa pagtino kon unsang mga kahikayan ang ilang mahimo aron mas pang makaambit diha sa pag-alagad sa kanataran nga buluhaton.
20 min: “Unsa May Imong Isulti sa Panahong Mobalik Ka?” Hisgotan sa mamiminaw ug ang andam nga mga magmamantala mopasundayag sa mga sugyot nga anaa sa mga parapo samtang kini ginatagad. Kining mubong mga demonstrasyon kinahanglang ensayohon nga abante pa sa panahon.
15 min: “Pagpahulam ug Kuwarta sa Isigka-Kristohanon.” Pakigpulong sa ansiyano sa maong artikulo gikan sa Oktubre 15, 1991, Bantayanang Torre, mga panid 25-8.
Awit 147 ug paniklop nga pag-ampo.