“Padayong Buhata Kini sa Paghinumdom Kanako”
1 Si Jesus nagsugo sa iyang mga sumosunod sa pagsaulog sa anibersaryo sa iyang kamatayon. (Luc. 22:19) Niining tuiga ang mga Saksi ni Jehova sa tibuok kalibotan magasaulog sa Memoryal sa kamatayon ni Kristo sa Biyernes, Abril 17, human sa pagsalop sa adlaw.
2 Personal nga Pagpangandam: Sa unsang paagi kita makapangandam sa tukmang pagsaulog niining mahinungdanong okasyon? Usa ka paagi mao ang mainampoong pagpamalandong sa yutan-ong kinabuhi ug ministeryo ni Jesus. (Mat. 20:28) Sa pagtabang sa matag usa nga mopabili niining taganaha, among girekomendar nga tagdon ang mga kapitulo 112 ngadto sa 116 sa Ang Labing Bantogang Tawo nga Nabuhi Sukad.
3 Ang atong pagbasa sa Bibliya una pa ang Memoryal niining tuiga naglakip sa piniling mga bersikulo gikan sa basahon sa Bibliya nga Marcos. Kining espesyal nga pagbasa sa Bibliya gieskedyol sa Abril 12-17. Kitang tanan buot nga mogugol ug igong panahon sa pagpamalandong niining ugdang nga mga hitabo.
4 Bug-os nga Pagpangandam sa mga Ansiyano: Aduna bay igong kalingkoran sa tanang gidahom nga motambong? Sa dihang labaw sa usa ka kongregasyon ang mogamit sa tigomanan, ang hapsay nga kahikayan gikinahanglan aron ang matag kongregasyon adunay igong panahon sa pagsaulog sa Memoryal. Kadtong magaalagad ingong attendants kinahanglang mapahibalo sa ilang mga katungdanan. Buot nila nga sila maoy magapanguna sa pag-abiabi sa bag-ong mga tawo nga motambong. Ang takos-kaayong mamumulong kinahanglang pilion. Magtudlog responsableng mga ansiyano o ministeryal nga mga alagad nga mopasa sa mga emblema. Ang waylebadorang tinapay ug waysambog pulang bino kinahanglang itagana. Alang sa dugang mga pahinumdom, matikdi ang Agosto 15, 1985, nga gula sa Ang Bantayanang Torre, panid 19 (Pebrero 15, 1985 sa Ingles).
5 Pinaagig bug-os abanteng pagpangandam, atong ginapasundayag nga kita bug-os nagapabili sa kahinungdanon niining espesyal nga okasyon ug nga kita nagatinguha sa pagsaulog sa Memoryal sa kamatayon ni Kristo sa pagtuman sa sugo ni Jesus.—1 Cor. 11:23-26.
[Kahon sa panid 7]
1. Ang tanan ba, lakip na ang mamumulong, napahibalo sa hustong panahon ug dapit sa pagsaulog? Aduna bay kasakyan ang mamumulong?
2. Nahimo na ba ang tinong kahikayan sa pagtagana sa mga emblema?
3. Nahimo na ba ang kahikayan sa usa nga modala ug hinlong mantel sa lamesa ug sa gikinahanglang gidaghanon sa mga baso ug mga plato?
4. Unsay kahikayan nga nahimo sa paghinlo sa tigomanan una pa ang Memoryal?
5. May natudlo na bang attendants ug mga tigsilbe? Gieskedyol ba ang miting uban kanila una pa ang Memoryal aron pagpahinumdom sa ilang mga katungdanan? Kanus-a?
6. Ang mga kahikayan ba kompleto sa pag-abag sa tigulang ug baldadong mga igsoong lalaki ug babaye? Ang kahikayan ba gihimo sa pagsilbe sa bisan kinsang dinihogan nga anaa sa balatian ug dili makahimo sa pag-adto sa Kingdom Hall?