Paggamit sa Brosyur nga “Tan-awa!” sa mga Balikduaw
1 Si apostol Pablo nasayod sa kahinungdanon sa pag-amoma sa mga nagpakitag interes sa kamatuoran. Iyang gipakasama sila sa linghod pang mga tanom, nga nagkinahanglag pagbisibis ug pag-ugmad. (1 Cor. 3:6-9) Mao man usab karon, ang mga interesado nagkinahanglan sa atong pag-amoma nga ikahatag kanila sa dihang mohimo ta ug mga balikduaw aron pag-ugmad sa ilang espirituwal nga pagtubo.
2 Sa matag balikduaw maoy maayo nga repasohon sa mubo kon unsay imong gihisgotan sa miaging duaw, nga nagapunting sa mga puntos nga nagpakitag interes ang tagbalay. Ilangkit ang tagbalay sa panaghisgot ug tugkara ang iyang intereses ug mga panginahanglan.
3 Sa paghimog usa ka balikduaw, bisan kon ang brosyur nga “Tan-awa!” napahimutang o wala, hayan buot mong gamiton kining paagiha sa pagsugod ug usa ka pagtuon:
◼ “Daghang tawo nga among gikasulti nakakaplag ug mga tubag sa ilang mga pangutana pinaagig paggamit niining brosyura.” Dayon sa pagtagad sa 12 ka pangutana diha sa panid 30 sa “Tan-awa!” nga brosyur, makasukna ka: “Haing pangutanaha ang buot mong matubag?” Paklia ang panid nga nagatubag sa pangutana ug ipakita sa tagbalay ang mga pangutana sa matag parapo. Kobrehi ang pipila ka punto ug himoang tinong mga kahikayan nga mobalik pag-usab.
4 Ang laing paagi mahimong ingon niini:
◼ “Nahimuot gayod ako sa atong panaghisgot sa miaging semana. Daghang tawo nahibulong kon nganong kanunay kami nga nagaduaw sa ilang pinuy-anan. Akong gihunahunang ang komento nga anaa sa panid 26 niining brosyura makapainteres kanimo. [Ipakitang ilustrasyon sa pagtuon sa Bibliya ug basaha ang mga bahin sa mga parapo 51 ug 52.] Pinasukad sa atong gibasa dinhi, unsay imong ikaingon nga gikinahanglan aron makasulod sa Paraiso?” Tugoting motubag ug himoang mga kahikayan sa pagbalik aron sa pagpadayon sa pagtuon.
5 Sa pagpaloap sa miaging duaw diin napahiluna ang “Tan-awa!” nga brosyur, makaingon ka:
◼ “Sa miaging higayon nga ako miduaw, atong nahisgotan ang mga kahimtang sa kalibotan nga nagakinahanglag kausaban. Nahibulong ka ba kon nganong gitugotan sa Diyos ang pagkadaotan?” Tugoting motubag ug pakliang panid 15, mga parapo 27-9, nga nagamatikod sa mga pangutana sa pagtuon. Basaha ug hisgoti ang mga parapo.
6 Dihang ang Nabilin Mao ang Tract: Usahay ang usa ka tract gikabilin sa unang duaw. Sa paghimog mga balikduaw, ikahisgot mo ang usa o duha ka parapo gikan sa tract uban sa mga kasulatang gisitar. Unya ipakita kon sa unsang paagi ang usa sa mga kasulatan diha sa tract gihisgotan sa mas dakong detalye sa “Tan-awa!” nga brosyur. Kon ang tawo mopakitag interes, buot mong itanyag ang brosyur ug himoang mga kahikayan sa pagpadayon sa panaghisgot sa imong sunod nga duaw.
7 Sa dihang matinumanon tang ginaatiman ang pagbisibis sa linghod nga mga tanom sa Kristohanong pagtuo nga anaa sa atong pag-amoma, ang Diyos magapatubo niini ngadto sa iyang kaugalingong kadayegan ug himaya.—1 Cor. 3:7.