Pag-ila sa Kahulogan sa mga Hitabo Niining mga Adlawa
1 “Ang talan-awon niining kalibotana nagakabalhin.” (1 Cor. 7:31) Kini makita diha sa paspas nga mga hitabo niining mga adlawa. Uban sa tanang nagakahitabo sa sulod sa kapunongan ni Jehova, unsay kahulogan niini alang kanimo sa personal?—Luc. 21:28.
2 Ang katumanan sa tagna sa Bibliya nagapamatuod nga ang interong daotang sistema sa mga butang anaa na sa iyang kataposang mga adlaw. (Mat. 24:3-14; Luc. 21:7-11) Si Jesus miingon nga “kining kaliwatana dili gayod molabay hangtod mahitabo ang tanang mga butang.” (Luc. 21:32) Imo bang ginaila kon unsay kahulogan niini alang sa katawhan sa imong teritoryo nga wala pa makabarog dapig sa kiliran ni Jehova? Kon ginaila mo, unsa may epekto niini diha sa imong ministeryo sa kanataran?—Luc. 21:34-36.
3 Tabangi ang Uban Samtang May Panahon Pa: Si Jesus miawhag sa iyang mga tinun-an sa pagpahimulos sa pabarobleng mga kahimtang sa pagpahibalo sa maayong balita. (Juan 9:4) Si apostol Pablo mihatag sa samang tambag sa dihang iyang giawhag ang mga igsoon sa Colosas nga “magapadayon sa paggawi diha sa kaalam ngadto sa mga taga-gawas, nga magapahimulos sa kahigayonan.”—Col. 4:5.
4 Ang pipila misanong sa tambag sa apostol nga magpahimulos sa panahon ug nahimong mga regular payunir. Daghang mga batan-on ang misulod sa regular payunir nga pag-alagad samtang nagatungha pa ug nakabaton ug maayong kalamposan sa pagbuhat niana. Ang mga batan-on sa eskuwelahan makapahimulos sa kahigayonan sa pagtabang sa mga klasmet nga makasabot sa kahulogan sa kon unsay nagakahitabo karon ug sa paglaom sa umaabot ubos sa Gingharian sa Diyos.—Eccl. 12:1.
5 Mapahimuslan ta ug maayo ang atong panahon diha sa ministeryo sa kanataran sa Oktubre pinaagig pagtanyag sa magasing Pagmata! sa tanang kahigayonan. Kining basahona nagahatag ug pagsabot sa tinuod nga kahulogan sa mga hitabo niining mga adlawa. Itanyag kini sa nabalakang katawhan nga imong makaplagan sa balaybalay nga buluhaton. Itanyag kini ngadto sa mga klasmet o sa katawhan sa dapit nga imong gitrabahoan. Ipatugbaw ang mga ulohan nga mahimong sa linain magpainteres sa mga tawong imong nailhan. Pananglitan, ang Oktubre 8, 1992 nga Pagmata! nasudlan sa mga artikulo bahin sa negatibong mga emosyon, nga nagapakita kon sa unsang paagi mabuntog ang kabalaka, kahadlok, kasuko, kapakyasan, ug depresyon.
6 Sa pagtanyag sa Pagmata!, sagad nga maayong ipakita ang bahin nga “Kon Nganong Gipatik ang Pagmata!” diha sa panid 4 sa kada magasin. Depende sa matang sa tawo nga imong gikasulti, imong ikapunting nga kini nagataganag pagpasabot sa interong pamilya, kini nagapakita kon unsaon pagbuntog ang mga suliran (ingon sa gipakita diha sa Oktubre 8 nga gula), ug kini dili lamang kay nagataho sa mga balita kondili nagapunting kini sa tinuod nga kahulogan nga anaa sa luyo sa mga hitabo niining mga adlawa, apan wala magadapig sa politikanhon nga paagi. Ang mahunahunaong mga tawo mopabili gayod nga kining mga bahina nagapahimo sa Pagmata! nga tinuod gayod nga bililhon alang kanila.
7 Kini maoy makapahinam nga mga panahon sa pag-alagad kang Jehova. Hinaot nga kining kamatuorana mopalihok kanato nga magpahimulos sa mga kahigayonan niining bulana sa pagbulig sa dugang pang sinserong mga tawo nga makasabot sa tinuod nga kahulogan nga anaa sa luyo sa mga hitabo niining mga adlawa.