Balika ang Imong Nakaplagang Interes
1 Maoy hinungdanon nga balikon nato ang mga napahimutangan ug mga magasin ug mga brosyur ug sulayang pukawon ang dugang interes. Ang atong kalamposan sa pagbuhat niana nagadepende kon giunsa nato pagpangandam pag-ayo una pa kita mohimog pagbalikduaw.
2 Hinumdomi nga ang kadaghanan sa mga batan-ong tawo mabalak-on sa samang mga butang nga gikabalak-an sa mga hamtong. Ang mga gula sa Mayo sa Pagmata! nagasusi sa kinabag-ohang mga suliran gikan sa panglantaw sa batan-ong mga tawo. Ang mga artikulo makabulig sa mga batan-on ug sa ilang mga ginikanan sa pagpabili kon unsa gayoy hinungdanon sa kinabuhi.
3 Kon napahimutang nimo ang Mayo 8 nga “Pagmata!,” mahimong planohon nimo ang pagpalo-ap niana pinaagig pagtanyag sa Mayo 22 nga gula. Makaingon ka:
◼ “Ang miaging gula nga akong nabilin naghisgot sa ulohan sa paglaom alang sa mga bata. Ang batan-ong mga tawo karon mibating may diyutay lamang nga paglaom alang sa umaabot. Daghan kanila nagapakitag kasilag pinaagig rebelyosong panggawi. Apan ang pipila nagahupot ug maayo kaayong mga sumbanan. Kining artikuloha sa kinabag-ohang Pagmata! nagapatin-aw kon sa unsang paagi ang hataas nga korte nagabayaw sa baroganan sa usa ka tin-edyer. Akong gihunahuna nga imong pabilhan kon unsa ang ikasulti niini.”
4 Hayan makahukom ka sa pagtanyag ug usa ka brosyur nga naggamit niining paagiha:
◼ “Ako nalipay sa atong panaghisgot sa miaging higayon bahin sa umaabot niining yutaa. [Ipakita ang hulagway sa panid 31 sa brosyur nga Unsa ang Katuyoan sa Kinabuhi—Sa Unsang Paagi Makaplagan Nimo Kini?] Matikdi kining mga bersekulo sa Bibliya sa mga panid 29 ug 30 nga nagahubit sa mga panalangin sa Gingharian sa Diyos. [Pagpilig usa ka kasulatan, ug basaha kana diha sa brosyur.] Buot nakong ibilin kini kanimo.”
5 Sa imong pagbalik, tingali imong mahibaloan nga ang tagbalay may iyang kaugalingong relihiyosong basahon ug iyang gibati nga kana igo na. Makaingon ka:
◼ “Bisan unsa ang atong relihiyon, kitang tanan naapektohan sa krimen, sa seryosong mga sakit, mga kabalaka sa palibot, di ba mao? [Tugoting mokomento.] Gibati ba nimong adunay tinuod nga sulbad niining mga sulirana? [Basahang 2 Pedro 3:13.] Ang katuyoan sa among basahon gipahayag sa panid 2 sa Ang Bantayanang Torre. [Basaha ang usa o duha ka piniling laray sa pulong.] Daghang tawo nga dili mga Saksi ni Jehova nagakalipay sa pagbasa sa among mga basahon tungod sa malaomong mensahe nga nasulod niana, nga gipasukad sa Bibliya.”
6 Hayan gamiton mo kining paagiha:
◼ “Sa miaging higayon nga dinhi ko, atong nahisgotan ang bahin sa umaabot nga mga kaugmaon alang sa atong kalibotan. Unsay imong hunahuna bahin niining maong taho? [Hisgoti ang pipila ka bag-ong gikabalak-ang balita.] Sa dihang ang mga tawo makadungog ug mga butang nga sama niana, kana makapahibulong kanila kon asa kining kalibotana mopaingon, di ba? Among gituohan nga kanang mga butanga nagapakita nga kita nagapuyo na sa ‘kataposang mga adlaw’ nga gitagna sa Bibliya sa 2 Timoteo 3:1-5.” Ipadayon uban sa panaghisgot sa usa sa mga sub-ulohan sa mga panid 121-5 (p. 234-8 sa Ingles) sa librong Nangatarongan.
7 Kon kita mangandam pag-ayo ug magapakitag tiunay nga tinguha sa pagtabang, kita makasalig nga ang mabuot-kasingkasing nga mga tawo magapatalinghog.—Juan 10:27, 28.