Ugmara ang Interes sa Mensahe sa Gingharian
1 Bisan kon ang katawhan modawat sa basahon sa Bibliya o dili, maoy mahinungdanon nga mobalik aron pag-ugmad sa bisan unsang interes sa sayo nga maarangan.
2 Repasoha ang mga nota nga mainampingon nimong nahimo sa unang duaw. Unya paneguroang makadala ug usa ka kopya sa basahon nga imong napahimutang aron ikaw makapunting niana sa pagbalikduaw.
Kon napahimutang ang “Tan-awa!” nga brosyur, makaingon ka:
◼ “Sa ulahing higayon nga nagkasulti ta, akong gipakita nimo ang hapin niining brosyura, ug mibasa tag usa ka teksto sa pagpamatuod nga, pinaagi sa iyang Gingharian, ang Diyos magtaganag pamalay ug panarbaho alang sa tanan. Apan ang Diyos usab nagasaad nga taposon ang sakit, pagkatigulang, ug bisan ang kamatayon. Nakaplagan ba nimong lisod kanang tuohan? [Tugoting makatubag ang tagbalay.] Matikdi kining puntoha sa parapo 4 sa brosyur nga akong nabilin nimo.” Basaha ang parapo, ug tagda ang usa o duha ka teksto nga nalista sa ubos sa panid. Ang usa ka pagtuon sa Bibliya nasugdan na!
3 Aron pag-andam sa dalan alang sa umaabot nga duaw, matapos mo ang panaghisgot pinaagig pag-ingon:
◼ “Siyempre, ang tanan tang nahisgotan anaa sa Bibliya, pero daghang tawo ang nahibulong kon makatuo ba gayod sila kon unsay giingon sa Bibliya. Sa sunod nga higayon nga moanhi ko, buot nakong tagdon kining ulohana uban kanimo sa pipila ka minuto.” Sa dihang mobalik ka, sugdi ang panaghisgot gikan sa sub-ulohang “Ang Basahon nga Nagapatin-aw sa Paraiso,” sa parapo 5 sa brosyur.
4 Diha sa mga Teritoryo nga Diyutay Lamang nga Basahon ang Napahimutang: Ang samang presentasyon magamit sa dihang nagaduaw sa mga tawong nagapakitag interes pero wala modawat ug basahon. Ikapunting mo ang brosyur nga imong gikatanyag sa unang duaw. Mahimong gikinahanglan ang subsob nga mga duaw nga nagagamit sa Bibliya ug sa imong personal nga kopya sa brosyur una pa ang tagbalay modawat sa usa ka brosyur.
5 Ang maayong mga balikduaw maylabot sa Kagamhanan nga brosyur maandam gikan sa materyal sa mga panid 87-9 sa librong Nangatarongan (p. 154-6 sa Ingles). O ang usa ka pagtuon sa Bibliya masugdan pinaagig pagsukna sa pangutana: “Nahibalo ka ba nga ang Bibliya nagatanyag ug duha ka paglaom? Ang usa mao ang pagpuyo sa walay kataposan sa yuta. Kining brosyura nagasaysay kon sa unsang paagi nga kana mahimo.” Unya paklia ang panid 15 sa brosyur, ug basaha ang tulo ka gisitar nga teksto.
6 Kon ikaw nakapahimutang ug basahon o yano lamang nga nakabaton ug makaiikag nga panaghisgot sa Bibliya sa usa ka tawo, ikaw adunay kaakohan sa pag-ugmad sa interes. Kami nagadasig kaninyong tanan sa paggahin ug pipila ka panahon sulod sa Agosto sa pag-ambit niining nagaluwas-kinabuhing buluhaton.—1 Tim. 4:16.