Gamita ang Lainlaing mga Brosyur sa Imong Ministeryo
1 Ang katawhan karon interesado sa lainlaing mga ulohan. Sa dihang ikaw makig-ambit sa pag-alagad sa kanataran sa Hulyo, makadala ka ug ubay-ubayng lainlaing mga brosyur, nga nagagamit sa usa niana nga makadani sa katawhan sa teritoryo. Tingali buot nimong sulayan ang usa niining mga presentasyona:
2 Sa pagtanyag sa brosyur nga “Ang Kagamhanang Mopatunghag Paraiso,” ikaw makapangutana:
◼ “Unsay imong hunahuna nga mahisama unta ang kalibotan kon ang Diyos lamang ang bugtong magmamando? [Tugoting motubag.] Kana mao gayod ang atong ginahangyo sa dihang atong giampo ang Amahan Namo nga pag-ampo. [Paklia ngadto sa panid 3, ug basaha ang unang parapo, nga nagakutlo sa Mateo 6:10.] Kon buot nimong mabuhi sa usa ka kalibotan nga sama niana, angay gayod nimong basahon kining maong brosyur.” Itanyag nga ibilin kana.
3 Ang “Sa Dihang ang Imong Minahal Mamatay” ikatanyag niining paagiha:
◼ “Gihunahuna ba nimo nga moabot ang panahon nga wala nay usa kanato nga mawad-an ug usa ka minahal diha sa kamatayon? [Tugoting motubag.] Kini nga brosyur naghupay sa minilyon uban sa saad sa Bibliya nga kanang panahona sa dili madugay moabot na. [Paklia ngadto sa panid 5, ug basaha ang ikalimang parapo, lakip ang 1 Corinto 15:21, 22. Dayon paklia ngadto sa ilustrasyon sa panid 30.] Gipakita dinhi ang kalipay nga mahimo natong matagamtam sa pag-abiabi sa mga namatay natong minahal diha sa pagkabanhaw. Apan asa man kana mahitabo? Kini nga brosyur magapakita kanimo sa tubag sa Bibliya.” Kon ang brosyur dawaton, makadugang ka: “Buot nakong mobalik ug hisgotan pag dugang kining ulohana.”
4 Hayan ikatanyag nimo ang brosyur nga “Tan-awa! Ginabag-o Ko ang Tanang Butang,” nga nagagamit niining diretsong paagi sa pagsugod ug pagtuon sa Bibliya:
◼ “Ako nakapangutana sa akong mga silingan kon sila may mga pangutana ba bahin sa Bibliya. Kining basahona nagalista sa pipila nga gipatungha. [Ipunting sa panid 30.] Kining kataposang pangutana nakapukaw sa interes sa daghan: ‘Sa unsang paagi ikaw makaandam alang sa walay kataposang kinabuhi sa Paraiso?’” Hisgoti ang mga parapo 57-8 sa mga panid 29-30 ug basaha ang Pinadayag 21:3, 5. Itanyag ang brosyur ug hikayang mobalikduaw aron hisgotan ang pipila pa sa ubang mga pangutana.
5 Hayan buot nimong sulayan kining yanong presentasyon uban sa brosyur nga “Ang Balaang Ngalan nga Magapadayon sa Walay Kataposan”:
◼ “Usa sa unang mga butang nga akong nakat-onan sa Bibliya mao ang ngalan sa Diyos. Nakaila ka ba kon unsa kana? [Tugoting motubag.] Naa kana sa Bibliya diha sa Salmo 83:18. [Basaha.] Kining brosyura nagapakita kon sa unsang paagi ang ngalan sa Diyos, si Jehova, makita diha sa daghang lainlaing pinulongan. [Ipakita ang kahon sa panid 8.] Kon buot nimong makakat-on pag dugang bahin kang Jehova ug sa iyang mga katuyoan, angay gayod nimong basahon kining maong brosyur.” Itunol ang brosyur sa tagbalay.
6 Uban nianang lainlaing maayong mga brosyur nga magamit, kita nasangkapan gayod kaayo sa “pagsulti sa maayong balita ngadto sa mga maaghop.”—Isa. 61:1.