Sundoga si Jehova Pinaagig Tiunay nga Pagtagad sa Uban

¹ Si Jehova mao ang labing dakong sulondan sa usa kinsa nagapakitag tiunay nga pagtagad sa uban. (1 Ped. 5:7) Gidasig ni Jesus ang iyang mga sumusunod nga ipakita ang mga hiyas sa iyang Amahan. (Mat. 5:45) Masundog nimo si Jehova pinaagig pagpasundayag sa tiunay nga kabalaka sa uban​—nga andam sa pagpaambit sa mensahe sa Gingharian sa matag usa nga imong ikasugat. Pinaagig bug-os nga pagsinati sa mga brosyur nga gamiton sa ministeryo sa Hulyo, maanaa ka sa maayong kahimtang sa pagtanyag sa es­pirituwal nga tabang ngadto sa uban. Ang mosunod nga mga sugyot magatanyag ug pipila ka ideya kon unsaon nimo pagpangandam sa unang duaw ug dayon sundalon ang interes uban sa tukma-sa-panahong mga balikduaw.

² Sa dihang motanyag sa brosyur nga “Tinuod Bang May Pagtagad ang Diyos Kanato?” ikaw makaingon:

◼ “Nahibulong ka ba nganong gitugotan sa Diyos nga mag-antos ang mga tawo kon tinuod siyang nagatagad kanila? [Tugoting motubag.] Kini nga brosyur dili lamang motubag niining pangutanaha apan usab nagapakita nga ang Diyos nagsaad sa pagwagtang sa tanang kadaot nga gihimo sa tawo sa iyang kaugalingon ug sa iyang yutan-ong puy-anan.” Basaha ang parapo 23 sa panid 27. Ipakita ang ilustrasyon sa ubos niana, ug basaha ang Salmo 145:16 gikan sa parapo 22. Itanyag ang brosyur. Kon dawaton kana, isukna ang pangutana nga matubag sa sunod duaw, sama sa: “Buot ka bang masayod unsaon sa Diyos pagpalampos ang iyang katuyoan sa pagbag-o sa yuta ngadto sa usa ka paraiso?”

³ Sa dihang mobalik niadtong imong napahilunaan sa brosyur nga “Tinuod Bang May Pagtagad ang Diyos Kanato?” hayan makasugod ka ug lain pang panaghisgot nga masugdan niining paagiha:

◼ “Sa akong miaging duaw, atong nakonsiderar nga ang Diyos nagatagad gayod kanato ug maoy iyang katuyoan nga wagtangon ang tanang kadaot nga nahimo sa tawo sa iyang kaugalingon ug sa iyang yutan-ong puy-anan.” Buksi ang brosyur sa ilustrasyon sa mga panid 2-3 ug moingon: “Sa miagi atong gisukna ang pangutana, Unsaon sa Diyos pagpalampos ang iyang katuyoan sa pagbag-o sa yuta ngadto sa usa ka paraiso? Unsa may imong hunahuna?” Tugoting motubag. Ukba sa panid 17, ug basaha ang parapo 2 ug Daniel 2:44. Human niana, basaha ang parapo 12 sa panid 18. Kon mouyon ang tagbalay, tun-i ang bahin 9 sa brosyur uban kaniya.

⁴ Aniay paagi nga mahimong magamit sa pagtanyag sa brosyur nga “Sa Dihang ang Imong Minahal Mamatay.” Ipakita ang hapin niini ug moingon:

◼ “Niining adlawa among ginatanyag kining brosyur nga naghatag ug kahupayan ug paglaom sa minilyong katawhan nga nawad-an sa ilang mga minahal sa kamatayon. Nahibulong ka ba gayod kon unsay paglaom alang sa mga patay? [Tugoting motubag.] Tin-aw nga gipakita sa Bibliya ang saad sa Diyos sa usa ka pagkabanhaw.” Basaha ang Juan 5:28, 29. Buksi ang brosyur ug komentohi ang kataposang parapo sa panid 28 ug ang unang parapo sa panid 31. Maandam nimo ang dalan alang sa usa ka balikduaw pinaagig pagpangutana, “Sa unsang paagi kita makatino nga ang kamatayon pagahanawon gayod sa bug-os?”

⁵ Diin imong napahiluna ang brosyur nga “Sa Dihang ang Imong Minahal Mamatay,” hayan buot nimong gamiton kining presentasyona sa imong balikduaw:

◼ “Sa atong panaghisgot sa miagi, atong nahisgotan ang kahibulongang paglaom sa pagkabanhaw. Ang brosyur nga akong gibilin kanimo nagasaysay kon nganong kita makatino nga ang kamatayon pagahanawon gayod sa bug-os. Wala ba nimo makaplaging ang mga saad sa Diyos maoy makapahupay ug makapalig-on?” Tugoting motubag. Dayon ukba ang panid 31 sa brosyur, ug basaha ang ikaduha ug ikatulong mga parapo, uban sa Pinadayag 21:1-4. Depende sa gipakitang interes, hayan ikatanyag nimo ang pagtuon sa Bibliya sa basahong Kahibalo o isukna ang lain pang pangutana aron buksan ang dalan alang sa sunod nga balikduaw.

⁶ Hayan imong isulti ang mosunod sa dihang ipresentar ang brosyur nga “Unsa ang Katuyoan sa Kinabuhi​—Sa Unsang Paagi Makaplagan Nimo Kini?”:

◼ Daghang tawo nahibulong kon unsay katuyoan sa kinabuhi. Ilang gisukna ang ilang kaugalingon: ‘Nganong ako ania dinhi? Unsa may akong kaugmaon?’ Diin nimo gihunahunang makaplagan ang mga tubag? [Tugoting motubag.] Matikdi kon unsay giingon sa Bibliya. [Basaha ang Salmo 36:9.] Dili ba ang Maglalalang sa tawo mao ang labing kuwalipikado sa pagsaysay kon nganong kita ania dinhi? [Tugoting motubag.] Gipakita niining brosyura ang dakong katuyoan nga giandam sa Diyos alang kanato.” Ukba sa mga panid 20-1, basaha ang kapsiyon, ug komentohi ang ilustrasyon; dayon itanyag ang brosyur. Kon dawaton, pangutan-a: “Sa unsang paagi atong matino nga mao gihapoy katuyoan sa Diyos alang sa katawhan nga mabuhi sa walay kataposan sa Paraiso sa yuta?” Paggahin ug panahon nga mobalik.

⁷ Kon ang brosyur nga “Unsa ang Katuyoan sa Kinabuhi​—Sa Unsang Paagi Makaplagan Nimo Kini?” napahiluna, makasulti ka ug ingon niini sa dihang mobalik ka:

◼ “Sa miagi nakong duaw, nalipay gayod ako sa pagpakighisgot kanimo nga ang tawhanong kinabuhi aduna gayoy katuyoan.” Ipakita ang ilustrasyon sa panid 31 ug pangutan-a, “Sa unsang paagi kita makatino nga mao gihapoy katuyoan sa Diyos alang sa katawhan nga mabuhi sa walay kataposan sa Paraiso sa yuta?” Basaha ang parapo 3 sa panid 20. Hisgoti ang mga puntos ubos sa subtitulong, “Katuyoan Gihapon sa Diyos,” sa panid 21. Ipakita ang likod sa brosyur, ug basaha ang bahin sa tanyag sa usa ka pagtuon Bibliya. Itanyag nga ipasundayag ang pagtuon sa basahong Kahibalo.

⁸ Ang atong ministeryo angayng magsumbaliksilaw sa atong tiunay nga interes sa pagtabang sa mga mabuot-kasingkasing nga “makadangat sa tukmang kahibalo sa kamatuoran.” (1 Tim. 2:4) Busa, gahinig panahon ang pagbalikduaw sa matag tawo nga imong napahilunaan sa brosyur. Ang imong pagpasundayag ug matuod nga kahangawa kanila mahimong moresulta sa pagtabang niadtong kinsa nanghupaw ug nanag-agulo tungod sa dulumtanang mga butang nga ginahimo diha sa bakak nga relihiyon aron mailhan alang sa kaluwasan. (Ezeq. 9:4, 6) Matagamtam usab nimo ang kasinatian sa katagbawan nga maangkon gumikan sa pagsundog kang Jehova pinaagig tiunay nga pagtagad sa uban.​—Itandi ang Filipos 2:20.